19-сонли мактабда Хотира ва қадрлаш кунига бағишлаб спорт мусобақалари ўтказилди

9 май ­– Хотира ва қадрлаш куни муносабати билан мамлакатимиздаги таълим масканларида, муассаса ва ташкилотларда, меҳнат жамоаларида хотира кечалари, турли спорт тадбирлари ўтказиш анъанага айланган. Бундан кўзланган асосий мақсад ёшларнинг бўш вақтларини мазмунли ўтказишларига кўмаклашиш, уларни турли ёт ғоя ва иллатлардан асраш, маънавий иммунитетини мустаҳкамлаш, ўтмишдаги суронли йилларни эслатиб, тинчликнинг қадрига етишга чорлашдир.

Амударё тумани Мактабгача ва мактаб таълими бўлимига қарашли 19-сонли мактабда ҳам шу каби тадбир ўтказилди. Мактабнинг олий тоифали жисмоний тарбия ўқитувчилари Муборак Машарипова ҳамда Шукуржон Жумамуродовалар томонидан ташкил қилинган мусобақалар мактаб ўқувчилари учун чинакам спорт байрамига айланди.

Мактаб ўқувчилари ўртасида спортнинг бадминтон, стол тенниси, баскетбол ва енгил атлетика каби турлари бўйича ўтказилган мусобақалар иштирокчилар ҳамда томошабинлар орасида спортга қизиқувчи ёшлар сафини янада оширди.

Айтиш жоизки, мактаб ўқувчилари орасида турли спорт мусобақалари иштирокчилари, ғолиб ва совриндорлари сафи кун сайин ортиб бормоқда. Жумладан, мактабнинг баскетболчи қизлари 2022 йилда “Умид ниҳоллари” спорт мусобақаларининг сектор ва туман босқичларида 1-ўринни, Қорақалпоғистон Республикаси босқичида эса 3-ўринни қўлга киритган эди. Енгил атлетикачи қизлар ҳам сектор, туман босқларида ғолиб бўлиб, Қорақалпоғистон Республикаси босқичида 2-ўринни эгаллашган эди. 2022, 2023 йилда ҳам мактаб ўқувчилари қатор мусобақаларда ғолиб ва совриндорлар қаторидан жой эгаллади.

Жорий йилда ўтказилган “Умид Ниҳоллари” спорт мусобақаларининг туман босқичида эса мактаб ўқувчилари стритбол бўйича 2- ва 3-ўринларни эгаллашди. Бандминтон бўйича ҳам 1-, 2- ва 3-ўринларни қўлга киритдиган ёшлар сафидан 19-сонли мактаб ўқувчилари ҳам жой эгаллашди.

Бундан ташқари, жорий йилда ўтказилган “Беш ташаббус олимпиадаси” мусобақаларида мактабнинг енгил атлетикачи қизлари аввал сектор, кейинчалик туман босқичида 1-ўринни эгаллаб, Қорақалпоғистон Республикаси босқичига йўлланмани қўлга киритишди ва айни кунларида июнь ойида ўтказиладиган мусобақаларга тайёргарлик кўришмоқда.

Айтиш жоизки, жисмоний тарбия ва спорт ёшларнинг жисмоний ва маънавий камолотида муҳим рол ўйнайди. У ёшлар жисми ва руҳини нафақат жисмонан, балки ижтимоий ва психологик жиҳатдан ҳам мустаҳкамлайди, уларнинг ўзига бўлган ишончини оширади ва жамият ҳаётида фаол иштирок этишга тайёрлайди.

Айниқса, жамоавий спорт турлари ёшларда жамоа билан ишлаш қобилиятини, лидерлик хусусиятларини ва жамоадошлари олдида масъулият туйғусини шакллантиради. Шунингдек, спорт орқали ёшлар ўзларининг стрессга чидамлилигини ва муаммоларни ҳал қилиш қобилиятини оширишади.

Жисмоний тарбия ва спортнинг яна бир муҳим жиҳати ёшларни соғлом турмуш тарзига йўналтиришдир. Спорт билан мунтазам шуғулланиш, ёшларни турли касалликлардан ҳимоя қилиш ва уларнинг умумий саломатлигини яхшилашга ёрдам беради. Бу эса ўз навбатида ёшларнинг ўқиш, билим ва кўникмаларни эгаллаш самарадорлигини оширади.

19-сонли мактаб ўқувчилари иштирокида ўтказилган спорт мусобақалари ҳам иштирокчи ўқувчи ёшларнинг жисмоний, маънавий ва ижтимоий ривожланишида катта аҳамиятга эга тадбир бўлди.

Мактабнинг олий тоифали жисмоний тарбия ўқитувчилари Муборак Машарипова ҳамда Шукуржон Жумамуродовалар келгусида ҳам турли байрамлар ва саналар муносабати билан ўқувчилар ўртасида турли спорт мусобақаларини ўтказиб, уларнинг иқтидорларини янада ривожлантириш, шу орқали Куюк кўпир овули, Амударё тумани ва Қорақалпоғистоннинг шарафини мамлакат миқёсидаги ва халқаро мусобақаларда ҳимоя қиладиган спортчилар етишиб чиқишига замин яратишни ўз олдларига мақсад қилиб қўйишган.