40 ёшдан ошган аҳоли ўртасида қандли диабетга скрининг текширувлари ўтказилди

Қандли диабет — бу инсон саломатлигига жиддий таҳдид солувчи касалликлардан бири ҳисобланади. Бу касаллик углеводлар алмашинувининг бузилиши билан боғлиқ бўлиб, инсулин ишлаб чиқариш ёки унинг таъсирининг етишмаслиги натижасида пайдо бўлади. Қандли диабетнинг эрта аниқланиши ва самарали даволаниши касалликнинг оғир асоратларининг олдини олишда муҳим аҳамиятга эга.

Шу мақсадда академик Ёлқин Тўрақулов номидаги Республика Ихтисослаштирилган Эндокринология илмий-амалий тиббиёт маркази мутахассислари томонидан Қорақалпоғистон Республикасининг бир қатор ҳудудларида 40 ёшдан ошган аҳоли ўртасида скрининг текширувлари ўтказилди.

Скрининг текширувлари — бу касалликнинг бор-йўқлигини аниқлаш учун амалга ошириладиган тестлардир. Бу тестлар орқали диабетнинг дастлабки босқичларидаёқ уни аниқлаш мумкин, бу эса касалликнинг олдини олиш ёки ривожланишини секинлаштириш имконини беради.

Республика Ихтисослаштирилган Эндокринология илмий-амалий тиббиёт маркази мутахассислари Амударё тумани Тиббиёт бирлашмасига қарашли даволаш ва профилактика муассасаларида бўлиб, беморлар аҳволидан хабар олди ва уларни даволовчи шифокорларга тегишли тавсиялар берди.

Айтиш жоизки, Ўзбекистонда қандли диабет ва диабет олди ҳолатларини аниқлаш учун скрининг текширувларини ўтказиш амалиёти кенг жорий қилинмоқда. Амударё тумани бўйича 2,5 мингдан ортиқ қандли диабетга чалинган беморлар рўйхатга олинган. Дунё бўйича ҳамда Ўзбекистон миқёсида олиб қаралганда аҳолининг 8-10 фоизи ушбу касалликдан азият чекади. Бундан келиб чиқадики, туман бўйича 20 мингга яқин одам қандли диабетга чалинган бўлиши, аммо аксарияти бу ҳақида билмаслиги ёки шифокорга вақтида мурожаат қилмаган бўлиши мумкин. Бу эса келгусида касалликнинг оғир асоратлар билан кечишига олиб келади.

Шу сабабли ҳам юқори хавф гуруҳида бўлган инсонлар, жумладан 40 ёшдан ошганлар ҳар йили бир маротаба қондаги қанд миқдорини аниқлаш учун тегишли таҳлилларни топширишлари тавсия этилади.

Академик Ёлқин Тўрақулов номидаги Республика Ихтисослаштирилган Эндокринология илмий-амалий тиббиёт марказининг мутахассислари марказнинг Қорақалпоғистон Республикаси филиали реконструктив пластик жарроҳлик бўлимида ҳам бўлиб, 16 нафар қандли диабет асоратлари мавжуд бўлган беморларни чуқурлаштирилигна тиббий кўрикдан ўтказиди ва улардан 4 нафарида жарроҳлик операцияларини бажарди. 

Малакали врачлар ташрифи Амударё тумани Тиббиёт бирлашмасига қарашли даволаш-профилактика муассасалари шифокорларининг билим ва тажрибаларини янада такомиллаштиришда ҳам муҳим имконият бўлди.

Нотўғри овқатланиш, камҳаракатлилик оқибатида келиб чиқадиган ортиқча вазн, носоғлом турмуш тарзи сабаб қандли диабет билан касалланганлар сони йилдан-йилга кўпайиб, касалликнинг ўзи эса борган сари ёшармоқда. Шу боис, диабетнинг олдини олиш бугун соҳа вакиллари олдида турган муҳим вазифалардан биридир. “Қарс икки қўлдан чиқади” деганларидек, нафақат тиббиёт ходимлари, балки аҳоли, айниқса 40 ёшдан ошган юртдошларимиз ҳам ўз саломатликларига бефарқ бўлмай, ҳар йили қондаги қанд миқдорини текширтириб туришлари лозим. Бу эса касаллик келиб чиқишининг олдини олиб, уни барвақт аниқлаш ва даволаш имконини беради.

Ғ.Ешниёзов