“Ёш гвардиячилар” синфида ўқувчилар ҳарбий ватанпарварлик руҳида тарбияланади

Маълумки, жорий йилнинг 5 февраль куни давлатимиз раҳбарининг ижтимоий соҳалардаги устувор вазифалар муҳокамаси юзасидан ўтказилган видеоселектор йиғилишида мактабдаги тарбия ва манавият масаласига алоҳида урғу берилиб, дарслардаги давомат қониқарсиз эканлиги танқид қилинган эди.

Шундан кейин, ўқувчи ёшларни ҳарбий ватанпарварлик руҳида тарбиялашга қаратилган чора тадбирлар доирасида Мактабгача ва мактаб таълими вазирлигининг “Умумий ўрта таълим мактабларида “Ёш гаврдиячилар” ихтисослаштирилган синфлари фаолиятини ташкил этиш чора-тадбирлари тўғрисида”ги қўшма қарори тайёрланди.

Қарорга асосан Амударё туманидаги 11-сонли умумтаълим мактабида ҳам “Ёш гврадиячилар” ихтисослаштирилган синфи ташкил этилди ва мазкур синфнинг очилиш маросими бўлиб ўтди.

Мазкур тадбирда Ўзбекистон Республикаси мактабгача ва мактаб таълими вазирининг биринчи ўринбосари Усмон Шарифходжаев, Қорақалпоғистон Республикаси Мактабгача ва мактаб таълими вазири Гулистан Қожабаева, Миллий гвардиянинг Қорақалпоғистон Республикаси бўйича бошқарма бошлиғи полковник Мухтор Юсупов ҳамда туманимизнинг соҳага масъул мутасаддилари иштирок этди.

Тадбир аввалида Ўзбекистон ва Қорақалпоғистон Республикаларининг давлат мадҳиялари янгради. Ўқувчилар мактаб олдида ҳарбийларга монанд сафланишди. Уларнинг кўзларида она Ватанга бўлган оташин муҳаббат, юрт тинчлиги ва халқ осойишталигини сақлашга дахлдорлик туйғулари акс этган.

Шундан сўнг Ўзбекистон Республикаси Мактабгача ва мактаб таълими вазирининг биринчи ўринбосари Усмон Шарифходжаев ва Миллий гвардиянинг Қорақалпоғистон Республикаси бўйича бошқармаси бошлиғи полковник Мухтор Юсуповлар сўзга чиқиб, ўқувчиларни ва мактаб жамоасини “Ёш гвардиячилар” ихтисослаштирилган синфи ташкил этилганлиги билан самимий табриклади. Бундай хайрли ишлар ва инсонпарвар ислоҳотлар мамлакатимиздаги тинч ва одилона сиёсатнинг натижаси эканлиги таъкидланди. Мактаб таълими тизимда Ўзбекистон Республикаси Миллий гвардияси билан ҳамкорликда амалга оширилаётган ўзгаришлар сабаб мактабларда давомат кўрсаткичлари анча яхшиланаётгани қайд этилди.

Тадбир давомида янги ташкил этилган “Ёш гвардиячилар” ихтисослаштирилган синфи ўқувчилари Ватанга содиқ фарзандлар бўлишга қасамёд қилишди. Тадбир иштирокчилари ва меҳмонлар уларни қарсаклар билан олқишлади. Ўзбекистон Республикаси Мактабгача ва мактаб таълими вазирининг биринчи ўринбосари Усмон Шарифходжаев томонидан ёш гвардиячиларга Ўзбекистон Республикаси Миллий гвардияси байроғи тантанали равишда топширилди.

Ҳарбий оркестр жамоаларининг ўқувчилар иштирокида ижро этган тантанавор марши тадбирга байрамона кайфият бағишлади.

Мактаб ўқувчилари тамонидан тайёрланган қўл жанги усуллари бўйича кўргазмали чиқишларда ёшларнинг жисмонан соғлом, руҳан тетик эканликлари яна бир бора намоён бўлди. Кўргазмали чиқиш якунида ўқувчилар Ўзбекистон ва Қорақалпоғистон Республикаларининг давлат байроқларини боши узра баланд кўтаришди.

Тадбир давомида меҳмонлар мактабга ташриф буюриб, маросим учун махсус тайёрланган рамзий лентани кесишди. Мутасаддилар синфхоналарга кириб, мактабда ўқувчиларнинг таълим олишлари учун яратилган шароитлар билан яқиндан танишдилар. “Ёш гвардиячилар” ихтисослаштирилган синфи ўқувчилари билан самимий суҳбатлашиб, уларга келгуси ўқишларида омад тиладилар. Бўлғуси гвардиячилар нафақат ҳарбий билимларни, балки мактабда ҳам барча умумталим фанларини яхши ўзлаштириши лозимлигини билдириб, зарур тавсилар беришди.

Киндик қонимиз томган она Ватанга бўлган муҳаббат қалбимизга болаликдан сингдирилар экан, фарзандларимиз юртга садоқатли, ватанпарвар инсонлар бўлиб улғайишига ишонамиз. Янги ташкил этилаётган “Ёш гвардиячилар” ихтисослаштирилган синфи ҳам айни мақсадларимизга хизмат қилиши билан аҳамиятлидир.

Шоҳзод Қурбонбоев