2919 нафар битирувчи, 27та олтин ва 4та кумуш медаль: умумтаълим мактабларида ўқув йили ниҳоясига етди

25 май – унитилмас лаҳзалар ва ҳис-туйғуларга бой кун. Ушбу санада мамлакатимиздаги барча умумтаълим мактабларида “Сўнгги қўнғироқ” садолари янграб, яна бир ўқув йили якунланди. Ҳамманинг кўнглида ҳаяжон. Битирувчи синф ўқувчилари катта ҳаёт остонасида турибди. Бошқа ўқувчилар эса, яна бир синф юқорилайди. Фарзандининг бугунги камолидан, эришган ютуқларидан ота-оналар хурсанд. Уларнинг кўзларида қувонч ёшлари. Ўқитувчи-устозлар эса ўз фарзандидек ардоқлаб, таълим-тарбия берган ўқувчиларини қадрдон даргоҳ остонасидан янги марралар тамон кузатди.

Жорий йилда Амударё туманидаги умумий ўрта таълим мактабларининг 11-синфини жами 2919 нафар ўқувчи ёшлар битирди. Уларнинг 27 нафари олтин ва 4 нафари кумуш медаль соҳиб ва соҳибалари бўлишди.

25 май куни барча мактабларда 1-, 4-, 9- ва 11-синф ўқувчилари иштирокида “Сўнгги қўнғироқ” тадбирлари ўтказилди.

Туманимиздаги 55-сонли умумий ўрта таълим мактабида бўлиб ўтган битирув кечасига Қорақалпоғистон Республикаси Ахборот ва оммавий коммуникациялар бошқармаси бошлиғи Азамат Бекмуротов, Амударё тумани Мактабгача ва мактаб таълими бўлими бошлиғи Ялғашбой Шомуротовлар ташриф буюрди.

Дастлаб, Ўзбекистон ва Қорақалпоғистон Республикаларининг давлат мадҳиялари янгради. Шундан сўнг Амударё тумани Мактабгача ва мактаб таълими бўлими бошлиғи Ялғашбой Шомуротовлар ва Қорақалпоғистон Республикаси Ахборот ва оммавий коммуникациялар бошқармаси бошлиғи Азамат Бекмуротовлар сўзга чиқиб, битирувчи синф ўқувчиларини ҳаётларидаги катта вазифани муваффақиятли бажаргани билан самимий табриклаб, келгуси ишларида омад ва зафарлар тилади. Улар ўзлари таҳсил олган даврларни эслаб, бугун давлатимиз тамонидан яратилган шарт-шароит ва берилаётган имкониятлардан ёшлар тўғри фойдаланишлари зарурлигини алоҳида таъкидлашди.

Сўнгги йилларда соҳаларда амалга оширилаётган ислоҳотлар сабаб таълим тизими замон талаблари даражасида тараққий этмоқда. “Янги Ўзбекистон мактаб остонасидан бошланади” шиори остида мактаб таълимини ривожлантириш умумхалқ ҳаракатига айланди. Президент мактаблари, ижод ва ихтисослаштирилган таълим муассасаларида билмга чанқоқ ёшлар замонавий шароитларда инновацион метод ва дарсликлар асосида жаҳон андозаларига мос сифатли таълим олишяпти. Янги олий ўқув юртлари ташкил қилиниб, ўрта ва ўрта махсус маълумотлиларни таълимнинг кейинги босқичига қамраб олиш даражаси ошмоқда.

Тадбирда мактаб директори Даврон Ариков битирувчиларни ва уларнинг ота-оналарини яна бир ўқув йили муваффақиятли якунлангани билан самимий табриклаб, жорий ўқув йилида эришилган ютуқлар ҳақида тўхталиб ўтди. Қайд этилганидек, 11-синф ўқувчиси Ҳафиза Мақсудова хорижий тилдан халқаро сертификат соҳибаси бўлди. Ҳулкарой Юлдашева, Севинч Шомуротова, Шаҳзода Юсуповалар ҳам хорижий тилдан миллий сертификани қўлга киритишди. Дилдора Сафарбоэва эса умумтаълим мактаблари ўртасида ўтказилган фанлар олимпиадасининг Қорақалпоғистон Республикаси босқичида география фанидан фахрли 1-ўринни қўлга киритди. Тадбирда қатнашган ота-оналар ўқитувчи-устозларга миннатдорлик билдиришди.

“Сўнгги қўнғироқ” тадбирлари Амударё тумани ихтисослаштирилган мактабида ҳам кўтаринки руҳда ўтказилди.

Жорий ўқув йилида Амударё тумани ихтисослаштирилган мактабини 45 нафар ўқувчи битирди. Уларнинг 28 нафари миллий ва 20 нафари халқаро сертификатларга эга бўлди. Жумладан, Худойберган Шарифов ва Шоҳруҳ Раҳимовлар инглиз тилидан B2 ҳамда математика бўйича миллий сертификатидан А+ даражаларини олишга муваффақ бўлишди. Ботиржон Камолов эса муддатидан олдин 4та халқаро олийгоҳга ўқишга қабул қилинди.

Тадбир якунида “Аълочи ўқувчи”, “Жонкуяр она”, “Фаол ота”, “Масъулиятли ота-она” номинациялари бўйича ташаккурномалар ўз эгаларига тантанали тарзда топширилди.

Жорий ўқув йили давомида Амударё туманидаги 40-сонли умумтаълим мактаби ҳам кўплаб ютуқларга эришди. Хусусан, бу йил мактабни 160 нафар ёшлар тамомлаган бўлса, уларнинг 3 нафари – Лайло Илҳомова, Ирода Исмоилова, Дилафруз Баҳтиёровалар муваффақиятли олтин медаль соҳибалари бўлишди. 6 нафар ўқувчи эса муддатидан олдин талабалик бахтига муяссар бўлди. Жумладан Лайло Илҳомова Кореа Республикасидаги олий таълим муассасасига ўқишга қабул қилинган.

Битирувчилар учун бу кун ҳаяжон ва қувончга тўла унутилмас сана ҳисобланади. Чунки улар жонажон мактаби, дўстлари ва ардоқли устозлари билан хайрлашади ҳамда янги ҳаёт сари қадам қўядилар. Ўқитувчилар учун эса бу сана ўз ишларини сарҳисоб қилиш, меҳнатларининг самарасини кўриш ва битирувчилар билан хайрлашиш имкониятидир. Ушбу сана ота-оналар учун ҳам унутилмас таассуротларга бой бўлди. Улардан қай бирлари болажонининг 1-синфни тугатаётганига қувонса, яна бирлари дилбандининг биринчи устози билан хайрлашмоқда. 9-синфни тамомлаётган аксарият ўқувчиларнинг ота-оналари фарзандларини касб-ҳунар таълимига йўналтиришни мўлжаллаётган бўлса, 11-синф битирувчиларининг ота-оналари эса қайси таълим муассасаларига ҳужжат топширишни ўйлаб, режалар тузмоқда.

Тадбир сўнгида “Сўнгги қўнғироқ” жаранглаб, ўқув йили расман ниҳоясига етди.

25 май куни эрталаб туманимизнинг илғор таълим муассасаларидан ҳисобланган 16-сонли мактабда ҳам “Сўнги қўнғироқ” тадбирлари кўтаринки руҳда ўтказилди.

Жорий ўқув йилида мазкур мактабнинг 4та 11-синфларини жами 102 нафар ўғил-қизлар тамомлашди. Улар орасида юқори натижаларни қайд этган иқтидорли ўқувчилар талайгина. Жумладан, Зоҳиджон Озодов муддатидан олдин талаба бўлиб, Тошкент халқаро Вестминстер университетига ўқишга қабул қилинди. Шунингдек, Маҳмуд Қозоқбоев ҳамда Шавкат Қўчқоровлар хорижий тил бўйича B2 даража сертифатларини қўлга киритишди.

Тадбирда сўзга чиққан мактаб масъуллари ва ота-оналар битирувчиларнинг келажакдаги ҳаёт йўлларида муваффақиятлар ёр бўлишига, орзу-ниятларининг рўёбга чиқишига тилакдош бўлдилар. Фурсатдан фойдаланиб, барча битирувчиларга ҳаётнинг янги босқичига қўяётган қадамлари муборак бўлишини тилаймиз, ўзларининг чексиз салоҳиятларини ишга солиб, дунёни ўзгартиришга қодир бўлган янгиликлар ва ижод маҳсуллари яратишларига ишонамиз. Зеро, ёшларимизнинг бугунги ҳаракати Янги Ўзбекистоннинг эртанги тақдирини белгилаб беради. “Сўнгги қўнғироқ” садолари билан янги ҳаётга қадам қўяётган битирувчилар Учинчи Ренассанснинг мустаҳкам пойдеворини яратиш йўлида илм-марифат ва куч-ғайрат билан хизмат қилишига ишонамиз.

Шоҳзод Қурбонбоев