2919 nafar bitiruvchi, 27ta oltin va 4ta kumush medal: umumtaʼlim maktablarida oʻquv yili nihoyasiga yetdi

25-may – unitilmas lahzalar va his-tuygʻularga boy kun. Ushbu sanada mamlakatimizdagi barcha umumtaʼlim maktablarida “Soʻnggi qoʻngʻiroq” sadolari yangrab, yana bir oʻquv yili yakunlandi. Hammaning koʻnglida hayajon. Bitiruvchi sinf oʻquvchilari katta hayot ostonasida turibdi. Boshqa oʻquvchilar esa, yana bir sinf yuqorilaydi. Farzandining bugungi kamolidan, erishgan yutuqlaridan ota-onalar xursand. Ularning koʻzlarida quvonch yoshlari. Oʻqituvchi-ustozlar esa oʻz farzandidek ardoqlab, taʼlim-tarbiya bergan oʻquvchilarini qadrdon dargoh ostonasidan yangi marralar tamon kuzatdi.

Joriy yilda Amudaryo tumanidagi umumiy oʻrta taʼlim maktablarining 11-sinfini jami 2919 nafar oʻquvchi yoshlar bitirdi. Ularning 27 nafari oltin va 4 nafari kumush medal sohib va sohibalari boʻlishdi.

25-may kuni barcha maktablarda 1-, 4-, 9- va 11-sinf oʻquvchilari ishtirokida “Soʻnggi qoʻngʻiroq” tadbirlari oʻtkazildi.

Tumanimizdagi 55-sonli umumiy oʻrta taʼlim maktabida boʻlib oʻtgan bitiruv kechasiga Qoraqalpogʻiston Respublikasi Axborot va ommaviy kommunikatsiyalar boshqarmasi boshligʻi Azamat Bekmurotov, Amudaryo tumani Maktabgacha va maktab taʼlimi boʻlimi boshligʻi Yalgʻashboy Shomurotovlar tashrif buyurdi.

Dastlab, Oʻzbekiston va Qoraqalpogʻiston Respublikalarining davlat madhiyalari yangradi. Shundan soʻng Amudaryo tumani Maktabgacha va maktab taʼlimi boʻlimi boshligʻi Yalgʻashboy Shomurotovlar va Qoraqalpogʻiston Respublikasi Axborot va ommaviy kommunikatsiyalar boshqarmasi boshligʻi Azamat Bekmurotovlar soʻzga chiqib, bitiruvchi sinf oʻquvchilarini hayotlaridagi katta vazifani muvaffaqiyatli bajargani bilan samimiy tabriklab, kelgusi ishlarida omad va zafarlar tiladi. Ular oʻzlari tahsil olgan davrlarni eslab, bugun davlatimiz tamonidan yaratilgan shart-sharoit va berilayotgan imkoniyatlardan yoshlar toʻgʻri foydalanishlari zarurligini alohida taʼkidlashdi.

Soʻnggi yillarda sohalarda amalga oshirilayotgan islohotlar sabab taʼlim tizimi zamon talablari darajasida taraqqiy etmoqda. “Yangi Oʻzbekiston maktab ostonasidan boshlanadi” shiori ostida maktab taʼlimini rivojlantirish umumxalq harakatiga aylandi. Prezident maktablari, ijod va ixtisoslashtirilgan taʼlim muassasalarida bilmga chanqoq yoshlar zamonaviy sharoitlarda innovatsion metod va darsliklar asosida jahon andozalariga mos sifatli taʼlim olishyapti. Yangi oliy oʻquv yurtlari tashkil qilinib, oʻrta va oʻrta maxsus maʼlumotlilarni taʼlimning keyingi bosqichiga qamrab olish darajasi oshmoqda.

Tadbirda maktab direktori Davron Arikov bitiruvchilarni va ularning ota-onalarini yana bir oʻquv yili muvaffaqiyatli yakunlangani bilan samimiy tabriklab, joriy oʻquv yilida erishilgan yutuqlar haqida toʻxtalib oʻtdi. Qayd etilganidek, 11-sinf oʻquvchisi Hafiza Maqsudova xorijiy tildan xalqaro sertifikat sohibasi boʻldi. Hulkaroy Yuldasheva, Sevinch Shomurotova, Shahzoda Yusupovalar ham xorijiy tildan milliy sertifikani qoʻlga kiritishdi. Dildora Safarboeva esa umumtaʼlim maktablari oʻrtasida oʻtkazilgan fanlar olimpiadasining Qoraqalpogʻiston Respublikasi bosqichida geografiya fanidan faxrli 1-oʻrinni qoʻlga kiritdi. Tadbirda qatnashgan ota-onalar oʻqituvchi-ustozlarga minnatdorlik bildirishdi.

“Soʻnggi qoʻngʻiroq” tadbirlari Amudaryo tumani ixtisoslashtirilgan maktabida ham koʻtarinki ruhda oʻtkazildi.

Joriy oʻquv yilida Amudaryo tumani ixtisoslashtirilgan maktabini 45 nafar oʻquvchi bitirdi. Ularning 28 nafari milliy va 20 nafari xalqaro sertifikatlarga ega boʻldi. Jumladan, Xudoybergan Sharifov va Shohruh Rahimovlar ingliz tilidan B2 hamda matematika boʻyicha milliy sertifikatidan A+ darajalarini olishga muvaffaq boʻlishdi. Botirjon Kamolov esa muddatidan oldin 4ta xalqaro oliygohga oʻqishga qabul qilindi.

Tadbir yakunida “Aʼlochi oʻquvchi”, “Jonkuyar ona”, “Faol ota”, “Masʼuliyatli ota-ona” nominatsiyalari boʻyicha tashakkurnomalar oʻz egalariga tantanali tarzda topshirildi.

Joriy oʻquv yili davomida Amudaryo tumanidagi 40-sonli umumtaʼlim maktabi ham koʻplab yutuqlarga erishdi. Xususan, bu yil maktabni 160 nafar yoshlar tamomlagan boʻlsa, ularning 3 nafari – Laylo Ilhomova, Iroda Ismoilova, Dilafruz Bahtiyorovalar muvaffaqiyatli oltin medal sohibalari boʻlishdi. 6 nafar oʻquvchi esa muddatidan oldin talabalik baxtiga muyassar boʻldi. Jumladan Laylo Ilhomova Korea Respublikasidagi oliy taʼlim muassasasiga oʻqishga qabul qilingan.

Bitiruvchilar uchun bu kun hayajon va quvonchga toʻla unutilmas sana hisoblanadi. Chunki ular jonajon maktabi, doʻstlari va ardoqli ustozlari bilan xayrlashadi hamda yangi hayot sari qadam qoʻyadilar. Oʻqituvchilar uchun esa bu sana oʻz ishlarini sarhisob qilish, mehnatlarining samarasini koʻrish va bitiruvchilar bilan xayrlashish imkoniyatidir. Ushbu sana ota-onalar uchun ham unutilmas taassurotlarga boy boʻldi. Ulardan qay birlari bolajonining 1-sinfni tugatayotganiga quvonsa, yana birlari dilbandining birinchi ustozi bilan xayrlashmoqda. 9-sinfni tamomlayotgan aksariyat oʻquvchilarning ota-onalari farzandlarini kasb-hunar taʼlimiga yoʻnaltirishni moʻljallayotgan boʻlsa, 11-sinf bitiruvchilarining ota-onalari esa qaysi taʼlim muassasalariga hujjat topshirishni oʻylab, rejalar tuzmoqda.

Tadbir soʻngida “Soʻnggi qoʻngʻiroq” jaranglab, oʻquv yili rasman nihoyasiga yetdi.

25-may kuni ertalab tumanimizning ilgʻor taʼlim muassasalaridan hisoblangan 16-sonli maktabda ham “Soʻngi qoʻngʻiroq” tadbirlari koʻtarinki ruhda oʻtkazildi.

Joriy oʻquv yilida mazkur maktabning 4ta 11-sinflarini jami 102 nafar oʻgʻil-qizlar tamomlashdi. Ular orasida yuqori natijalarni qayd etgan iqtidorli oʻquvchilar talaygina. Jumladan, Zohidjon Ozodov muddatidan oldin talaba boʻlib, Toshkent xalqaro Vestminster universitetiga oʻqishga qabul qilindi. Shuningdek, Mahmud Qozoqboyev hamda Shavkat Qoʻchqorovlar xorijiy til boʻyicha B2 daraja sertifatlarini qoʻlga kiritishdi.

Tadbirda soʻzga chiqqan maktab masʼullari va ota-onalar bitiruvchilarning kelajakdagi hayot yoʻllarida muvaffaqiyatlar yor boʻlishiga, orzu-niyatlarining roʻyobga chiqishiga tilakdosh boʻldilar. Fursatdan foydalanib, barcha bitiruvchilarga hayotning yangi bosqichiga qoʻyayotgan qadamlari muborak boʻlishini tilaymiz, oʻzlarining cheksiz salohiyatlarini ishga solib, dunyoni oʻzgartirishga qodir boʻlgan yangiliklar va ijod mahsullari yaratishlariga ishonamiz. Zero, yoshlarimizning bugungi harakati Yangi Oʻzbekistonning ertangi taqdirini belgilab beradi. “Soʻnggi qoʻngʻiroq” sadolari bilan yangi hayotga qadam qoʻyayotgan bitiruvchilar Uchinchi Renassansning mustahkam poydevorini yaratish yoʻlida ilm-marifat va kuch-gʻayrat bilan xizmat qilishiga ishonamiz.

Shohzod Qurbonboyev