Ўзбекистон ва Қорақалпоғистон Ёзувчилар уюшмалари аъзоси, атоқли шоира Зулфия Оллоёрова муборак 60 ёшни қарши олди

Адабиёт – кўнгил иши, илҳом самараси, руҳият ва кечинмалар ифодасидир. Ижод – мураккаб жараён. Сўзга умрини баҳшида этиш учун инсонда катта жасорат бўлиши лозим. Адабиёт халқни тарбиялаб, ёш авлодни бегона ғоялар таъсиридан сақлайди. Ўлмас ижод намуналари эса ҳар биримизни эзгуликка чорлаб туради. Шоир ва ёзувчилар маънавий обидаларнинг моҳир меъморларидир. Уларнинг ибратли умр йўлини тарғиб қилиш ёш авлоднинг маънавий камолотида муҳим омил бўлиб хизмат қилади.

Шу мақсадда мамлакатимизда шоир ва ёзувчилар ҳамда ижод аҳлига алоҳида эҳтиром кўрсатилиб, таваллудига бағишланган адабий-бадиий кечалар, юбилей тадбирлари мунтазам равишда ташкил қилинади. Давлатимиз томонидан ҳар йили ўз ижодий меҳнати билан халқ фаровонлиги ва юрт равнақи йўлида хизмат қилиб, жамият тараққиётига муносиб ҳисса қўшаётган ижодкорлар меҳнатининг эътироф этилиши жамиятда зиёли қатламнинг мавқейини янада оширяпти.

Жорий йилда Ўзбекистон ва Қорақалпоғистон Ёзувчилар уюшмаси аъзоси, амударёлик таниқли шоира, бир қатор китоблар муаллифи, кўплаб ёш ижодкорларнинг севимли устози Зулфия Оллоёрова муборак 60 ёшни қарши олдилар. Сана муносабати билан Қорақалпоғистон Ёзувчилар уюшмаси томонидан Амударё тумани Маданият бўлимида юбилей тадбири ташкил этилди.

Тадбирга Қорақалпоғистон ёзувчилар уюшмаси масъул котиби Бекназар Ерназаров ва Қорақалпоғистонда хизмат кўрсатган журналист, шоир ва ёзувчи Жолдасбай Нуриллаевлар ташриф буюрди. Шунингдек кечада, туман Маънавият ва маърифат бўлими муутахассиси Зарифа Соатбоева, туманимизнинг таниқли шоирлари Турсунбой Абдуллаев, Аҳмад Нафасов, Шомурод Хўжанов, Худойберган Жумамуродов, шоира Зуҳра Аҳмедовалар ҳамда ижодкорнинг муҳлислари, шогирдлари, қариндошлари ва кенг жамоатчилик иштирок этди. Кечага ажойиб сухандон Қудрат Матсафоев бошловчилик қилди. Санъаткор Ваҳобжон Абдуллаев ижросидаги жонли қўшиқлар кечага ўзгача файз бағишлади.

Дастлаб устоз шоир, сухандон Турсунбой Абдуллаев сўзга чиқиб, муборак 60 ёшни қарши олганлиги билан Зулфия Оллоёровани табриклаб, ўзининг самимий тилакларини изҳор этди. Шоиранинг ижод йўли хусусида тўхталиб, ижоди ҳақида илиқ фикрларини билдирди.

Шунингдек, меҳмон ижодкорлар Қорақалпоғистон Ёзувчилар уюшмаси масъул котиби Бекназар Ерназаров ва Қорақалпоғистонда хизмат кўрсатган журналист, шоир ва ёзувчи Жолдасбай Нуриллаевлар ҳам сўзга чиқиб, шоирани юбилей ёш билан самимий қутладилар. Меҳмонлар юбилярга уюшма томонидан тақдим этилган табрикнома ва совғаларни тантали равишда топширишди.

Шуни қайд этишимиз керакки, Зулфия Оллоёрованинг бугунги кунга қадар “Уфққа қоқилган ишқ”, “Дунёликда дунё ранглари”, “Кўнгилнинг чор нағмаси” каби шеърий топламлари нашр қилинган. Ўзбекистон ва Қорақалпоғистон халқ шоири Жиенбай Избасқанов томонидан шоира шеърлари қорақалпоқ тилига тажрима қилинган ва 2013 йилда “Муҳаррир” нашриётида “Суйемен ақ булттай паклик жолын” номи билан нашр қилинган. Зулфия Оллаёрова 2014 йил Ўзбекистон Ёзувчилар уюшмаси аъзолигига қабул қилинган. У 2012-2019 йиллар давомида Амударё тумани “Баркамол авлод” болалар марказида тўгарак раҳбари вазифасида фаолият юритган. Ҳозирги кунда “Боғ” маҳалла фуқаролар йиғинида маслаҳатчи вазифасида меҳнат қиляпти.

Юбилей тадбири давомида устоз шоир Аҳмад Нафасов ва Шомурод Хўжоновлар ҳам сана муносабати билан Зулфия Оллаёровани самимий қутлаб, шоирага бағишланган табрик шеърларини ўқидилар. Шунингдек, 14-сонли мактаб ўқувчилари томонидан тайёрланган саҳна чиқишлари ҳам кечага файз бағишлади. Зулфия мукофоти соҳибаси Барно Самандарова ҳам устозини табриклаб, шоира ижодидан ёд олган шеърларини ифодали ўқиди.

Кеча якунида Зулфия Оллоёрова тадбир ташкилотчиларига, меҳмонларга ва барча иштирокчиларга самимий миннатдорлик билдирди.

Фурсатдан фойдаланиб биз ҳам Зулфия Оллоёровани 60 ёшлик юбилейи билан муборакбод этиб, шоирага сиҳат-саломатлик ва бардавом ижод тилаймиз. Адабиётга бўлган муҳаббат кўнглимизни асло тарк этмасин.

Шоҳзод Қурбонбоев