1 июнь – Халқаро болаларни ҳимоя қилиш куни муносабати билан “Болаларга беринг дунёни!” номли байрам тадбири ўтказилди
Дунёда болаларни яхши кўрмайдиган миллат йўқ. Аммо биз каби болажон халқ бошқа бўлмаса керак. Донишманд ота-боболаримизнинг “Бир болага етти маҳалла ота-она” деган нақли ҳам болажонлик халқимизнинг қадриятига айланганини ифодалайди.
Амударё туманидаги Маданият ва истироҳат боғида 1 июнь – Халқаро болаларни ҳимоя қилиш куни муносабати билан ташкил этилган байрам тадбири аҳоли, айниқса божонлар учун унитилмас қувончли лаҳзаларга бой бўлди.
“Болаларга беринг дунёни!” – тадбирнинг айнан шундай номланиши ҳам бежизга эмас. Чунки бу куннинг бутун шодликлари келажагимиз эгалари – болажонларга бағишланди. Шу куни истироҳат боғи болалар билан гавжум бўлди, аттракционлардан уларнинг шодон кулгуси янгради. Болаларнинг қувончи дунёни тўлдирди, гўё.
Байрам тадбирида туман ҳокими Собир Хўжаметов, сектор раҳбарлари, ҳоким ўринбосарлари, Мактабгача ва мактаб таълими бўлими масъуллари, мактабгача таълим ташкилотлари раҳбарлари, болажонлар ва уларнинг ота-оналари қатнашди.
Дастлаб, туман ҳокими Собир Хўжаметов мутасаддилар билан биргаликда таълим ташкилотлари ходимлари ва ўқувчилар тамонидан намойиш қилинган байрам-кўргазмаси билан яқиндан танишди. Мутасаддилар келажагимиз эгалари бўлган болажонларнинг севимли машғулотларига қизиқиб, уларни байрам билан табриклади ва дилдан мулоқот қилишди. Кўплаб мусобақа ва беллашувларда қатнашиб, юқори натижаларга эришган болажонлар, мактабгача таълим ташкилотлари тарбияланувчиларининг ютуқлари эътироф этилиб, уларга фахрий ёрлиқлар ва байрам совғалари топширилди.
Кўргазмада боларнинг қай бири шахмат-шашка доскасида дона сурар, бошқа бири эндигина чизган расмларига ранг берар, яна бошқа бола эса акробатик машқларини намойиш қиларди. Стулларга чиройли қилиб тахланган ҳар хил буюмлар ва ўйинчоқлар севимли эртак қаҳрамонларини эслатади. Йиғилганлар болалар таълим-тарбия олишдан бўш вақтларида қандай машғулотлар билан машғул эканликларини кўриб, хурсанд бўлишди.
Меҳмонлар Маданият бўлими тамононидан тайёрланган байрам тадбирига ташриф буюриб, она-оналарни, нуронийларни ҳамда барча болажонларни 1 июнь – Халқаро болаларни ҳимоя қилиш куни байрам билан самимий табрикладилар. Туман ҳокими Собир Хўжаметов табрик нутқида Янги Ўзбекистонда болаларга эътибор давлат сиёсати даражасига кўтарилгани, уларни асраб-авайлаш, ҳар тамонлама баркамол қилиб вояга етказиш йўлида амалга оширилаётган ислоҳотлар ҳақида айтиб ўтди.
Юртимиз келгусида янада равнақ топиб, халқ турмуши бундан-да фаровон бўлиши учун фарзандларимиз комил инсонлар бўлиб улғайишлари зарурлиги алоҳида таъкидланди. Замонавий услубларда қурилган ва қайта жиҳозланган мактабгача таълим тшкилотлари ва мактаблар, спорт-соғломлаштириш муассасалари болажонларимизнинг чуқур билим олиб, истеъдодларини юзага чиқаришларига хизмат қилмоқда. Бир сўз билан айтганда, давлат ва жамият болажонларнинг соғлом ва баркамол бўлиб вояга етишлари учун барча имкониятларини ишга солмоқда.
Тадбир давомида мактабгача таълим ташкилоти тарбияланувчилари ва мактаб ўқувчиларининг чиқишлари, машхарабоз ва цирк томошалари, севимли эртак ва мультфильм қаҳрамонларининг ҳар хил ўйинлари, беғубор болаликни тараннум этувчи куй-қўшиқлар болажонларга олам олам қувонч бағишлади.
Шунингдек, истироҳат боғига йиғилган болажонларга туман ҳокимлиги томонидан музқаймоқлар улашилди.
Бахтли болалик мана шундай байрамлар билан гўзал. Фурсатдан фойдаланиб, биз ҳам барча болажонларни 1 июнь – Халқаро болаларни ҳимоя қилиш куни билан табриклаб, уларнинг Ватанга, эл-у юртга хизмат қиладиган маънан етук, жисмонан соғлом бўлиб улғайишларини тилаб қоламиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
