Давлат хавфсизлик хизмати кубоги учун ўтказилган ўйинлар ғолиблари муносиб тақдирланди

Аҳоли саломатлиги, айниқса, ёшларнинг куч ва имкониятларини юзага чиқариш, жисмоний тарбия ва оммавий спортни ривожлантириш мақсадида “Беш ташаббус олимпиадаси” доирасида ўтказилган Ўзбекистон Республикаси Давлат хавфсизлик хизмати кубоги ўйинларининг Амударё тумани босқичи якунланди. Жорий йилнинг 1 июнь куни туман Хотира майдонида мазкур мусобақанинг ғолиб ва совриндорларини тантанали тақдирлаш маросими бўлиб ўтди.

Тақдирлаш маросимида туман ҳокими Собир Хўжаметов, сектор раҳбарлари, Давлат хавсизлик хизмати туман бўлими масъуллари, ҳоким ўринбосарлари, соҳа масъуллари ҳамда спортчи ёшлар иштирок этди. Меҳмонлар қизил йўлак бўйлаб юриб келар экан, ёшлар билан дўстона саломлашиб, кўтаринки кайфият тилашди.

Тадбир аввалида Ўзбекистон ва Қорақалпоғистон Республикаларининг давлат мадҳиялари янгради.

 Шундан кейин туман ҳокими Собир Хўжаметов сўзга чиқиб, спортчи ёшларни ғолиблик билан тантанавор табриклади. Табрик нутқида такидланганидек, “Беш ташаббус олимпиадаси” доирасидаги мусобақалар чекка-чекка ҳудудлардаги ёш истеъдодларни қўллаб-қувватлаб, уларнинг орзу-истакларини амалга ошириш йўлида муҳим қадам ҳисобланади. Ўз навбатида, мазкур имкониятлар ва эътибордан самарали фойдаланган ёшларимиз салмоқли ютуқларни қўлга киритаётгани алоҳида эътироф этилди.

Жумладан, 2023 йилда спортнинг мини футбол тури бўйича Холимбег овулининг қизлар жамоаси давлат хавфсизлик хизмати кубоги мусобақаларининг Қорақалпоғистон Республикаси босқичида фахрли 1-ўринни қўлга киритиб, Ўзбекистон Республикаси босқичида муносиб иштирок этган эди.

Туман ҳокими Собир Хўжаметов ва туман Ички ишлар бўлими бошлиғи Жамолиддин Юсупов мусобақанинг кейинги босқичларида туманимизнинг обросини муносиб ҳимоя қилишларини сўраб, спортчи ёшларга омад ва зафарлар тилашди.

Шундан кейин тур ва йўналишлар бўйича мусобақа ғолиблари, фаол иштирокчилар ҳамда мураббийлар навбат билан саҳнага таклиф этилди.

Футбол – миллионлар ўйини. Болалигида майдонларда топ тепиб, “футбол юлдузлари”га ҳавас қилмаган бола кам бўлса керак. Мусобақанинг якуний натижаларига кўра футбол бўйича 1-ўринни эгаллаган Тўлқин овули жамоаси, 2-ўринни қўлга киритган Беш овул маҳалласи жамоаси ҳамда 3-ўринга лойиқ деб топилган Куюк кўпир овули жамоасининг ҳар бир аъзоси медаллар ва эсдалик совғалари билан тақдирланди.

Сўнги йилларда туманимизда ташкилотлар ва тадбиркорлар томонидан қурилиб, фойдаланишга топширилган мини футбол майдончалари ёшларнинг бўш вақти мазмунли ўтишига имконият яратмоқда. Натижада туманимизда бу спорт тури анча ривожланмоқда. Бу йилги Давлат хавфсизлик хизмати кубоги мусобақаларининг ҳар қачонгидан ҳам муросасиз тўқнашувларга бой бўлгани фикримизнинг исботидир. Ўйинлар якунига кўра ўғил болалар ўртасида спортнинг мини футбол тури бўйича 1-ўринни Бўстон маҳалласи жамоаси, 2-ўринни билан Қизилчоли маҳалласи жамоаси ва 3-ўринни Беруний маҳалласи жамоаси эгаллади. Жамоа аъзолари тегишли равишда олтин, кумуш ва бронза медаллари билан тақдирланди.

Туманимизда спортнинг мини футбол тури билан нафақат йигитлар, балки қизлар ҳам фаол шуғулланишади. Спортчи қизларимизнинг ютуқлари республика миқёсида эътироф этилган. Қизлар ўртасида ушбу спорт тури бўйича 1-ўрин Холимбег овули жамоасига, 2-ўрин Оқ олтин овули ва 3-ўрин Намуна маҳалласининг қизларига насиб қилди.

1-ўринни қўлга киритган жамоалар Давлат хавфсизлик хизмати кубоги мусобақаларининг Қорақалпоғистон Республикаси босқичига йўлланма олишди.

Ғолиб жамоаларга Давлат хавфсизлик хизмати кубоги ва медаллар тантановар равишда топширилди. Шунингдек, барча совриндорлар ташкилотчилар томонидан диплом ва қимматбаҳо совғалар билан тақдирланди.

Тадбир санъаткорлар ижросидаги концерт дастури билан давом этди. Навқирон ёшлик ва юрт мадҳи тараннум этилган шўх қўшиқлардан завқланган ёшлар ғалабани кўтаринки руҳда нишонладилар.

Фурсатдан фойдаланиб, биз ҳам мусобақа ғолибларига кейинги босқичларда омад тилаб, туманимиз шарафини муносиб ҳимоя қилишларига тилакдошмиз!

Шоҳзод Қурбонбоев