Davlat xavfsizlik xizmati kubogi uchun oʻtkazilgan oʻyinlar gʻoliblari munosib taqdirlandi

Aholi salomatligi, ayniqsa, yoshlarning kuch va imkoniyatlarini yuzaga chiqarish, jismoniy tarbiya va ommaviy sportni rivojlantirish maqsadida “Besh tashabbus olimpiadasi” doirasida oʻtkazilgan Oʻzbekiston Respublikasi Davlat xavfsizlik xizmati kubogi oʻyinlarining Amudaryo tumani bosqichi yakunlandi. Joriy yilning 1-iyun kuni tuman Xotira maydonida mazkur musobaqaning gʻolib va sovrindorlarini tantanali taqdirlash marosimi boʻlib oʻtdi.

Taqdirlash marosimida tuman hokimi Sobir Xoʻjametov, sektor rahbarlari, Davlat xavsizlik xizmati tuman boʻlimi masʼullari, hokim oʻrinbosarlari, soha masʼullari hamda sportchi yoshlar ishtirok etdi. Mehmonlar qizil yoʻlak boʻylab yurib kelar ekan, yoshlar bilan doʻstona salomlashib, koʻtarinki kayfiyat tilashdi.

Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi.

 Shundan keyin tuman hokimi Sobir Xoʻjametov soʻzga chiqib, sportchi yoshlarni gʻoliblik bilan tantanavor tabrikladi. Tabrik nutqida takidlanganidek, “Besh tashabbus olimpiadasi” doirasidagi musobaqalar chekka-chekka hududlardagi yosh isteʼdodlarni qoʻllab-quvvatlab, ularning orzu-istaklarini amalga oshirish yoʻlida muhim qadam hisoblanadi. Oʻz navbatida, mazkur imkoniyatlar va eʼtibordan samarali foydalangan yoshlarimiz salmoqli yutuqlarni qoʻlga kiritayotgani alohida eʼtirof etildi.

Jumladan, 2023-yilda sportning mini futbol turi boʻyicha Xolimbeg ovulining qizlar jamoasi davlat xavfsizlik xizmati kubogi musobaqalarining Qoraqalpogʻiston Respublikasi bosqichida faxrli 1-oʻrinni qoʻlga kiritib, Oʻzbekiston Respublikasi bosqichida munosib ishtirok etgan edi.

Tuman hokimi Sobir Xoʻjametov va tuman Ichki ishlar boʻlimi boshligʻi Jamoliddin Yusupov musobaqaning keyingi bosqichlarida tumanimizning obrosini munosib himoya qilishlarini soʻrab, sportchi yoshlarga omad va zafarlar tilashdi.

Shundan keyin tur va yoʻnalishlar boʻyicha musobaqa gʻoliblari, faol ishtirokchilar hamda murabbiylar navbat bilan sahnaga taklif etildi.

Futbol – millionlar oʻyini. Bolaligida maydonlarda top tepib, “futbol yulduzlari”ga havas qilmagan bola kam boʻlsa kerak. Musobaqaning yakuniy natijalariga koʻra futbol boʻyicha 1-oʻrinni egallagan Toʻlqin ovuli jamoasi, 2-oʻrinni qoʻlga kiritgan Besh ovul mahallasi jamoasi hamda 3-oʻringa loyiq deb topilgan Kuyuk koʻpir ovuli jamoasining har bir aʼzosi medallar va esdalik sovgʻalari bilan taqdirlandi.

Soʻngi yillarda tumanimizda tashkilotlar va tadbirkorlar tomonidan qurilib, foydalanishga topshirilgan mini futbol maydonchalari yoshlarning boʻsh vaqti mazmunli oʻtishiga imkoniyat yaratmoqda. Natijada tumanimizda bu sport turi ancha rivojlanmoqda. Bu yilgi Davlat xavfsizlik xizmati kubogi musobaqalarining har qachongidan ham murosasiz toʻqnashuvlarga boy boʻlgani fikrimizning isbotidir. Oʻyinlar yakuniga koʻra oʻgʻil bolalar oʻrtasida sportning mini futbol turi boʻyicha 1-oʻrinni Boʻston mahallasi jamoasi, 2-oʻrinni bilan Qizilcholi mahallasi jamoasi va 3-oʻrinni Beruniy mahallasi jamoasi egalladi. Jamoa aʼzolari tegishli ravishda oltin, kumush va bronza medallari bilan taqdirlandi.

Tumanimizda sportning mini futbol turi bilan nafaqat yigitlar, balki qizlar ham faol shugʻullanishadi. Sportchi qizlarimizning yutuqlari respublika miqyosida eʼtirof etilgan. Qizlar oʻrtasida ushbu sport turi boʻyicha 1-oʻrin Xolimbeg ovuli jamoasiga, 2-oʻrin Oq oltin ovuli va 3-oʻrin Namuna mahallasining qizlariga nasib qildi.

1-oʻrinni qoʻlga kiritgan jamoalar Davlat xavfsizlik xizmati kubogi musobaqalarining Qoraqalpogʻiston Respublikasi bosqichiga yoʻllanma olishdi.

Gʻolib jamoalarga Davlat xavfsizlik xizmati kubogi va medallar tantanovar ravishda topshirildi. Shuningdek, barcha sovrindorlar tashkilotchilar tomonidan diplom va qimmatbaho sovgʻalar bilan taqdirlandi.

Tadbir sanʼatkorlar ijrosidagi kontsert dasturi bilan davom etdi. Navqiron yoshlik va yurt madhi tarannum etilgan shoʻx qoʻshiqlardan zavqlangan yoshlar gʻalabani koʻtarinki ruhda nishonladilar.

Fursatdan foydalanib, biz ham musobaqa gʻoliblariga keyingi bosqichlarda omad tilab, tumanimiz sharafini munosib himoya qilishlariga tilakdoshmiz!

Shohzod Qurbonboyev