Амударё тумани Камбағалликни қисқартириш ва бандликка кўмаклашиш бўлимида тегишли ташкилотлар билан ҳамкорликда меҳнат ярмаркаси ташкил этилди

Бугунги кунда аҳолини иш билан таъминлаш, янги иш ўринларини яратиш, қонуний меҳнат фаолиятига жалб этиш долзарб масалалардан ҳисобланади. Мамлакатимизда соҳага доир белгиланган вазифалар тизимли равишда бажарилиб, аҳоли, айниқса, ёшларни иш билан банд қилишга алоҳида эътибор қаратилмоқда.

Амударё тумани Камбағалликни қисқартириш ва аҳоли бандлигига кўмаклашиш бўлими томонидан доимий ташкил қилиб келинаётган меҳнат ярмаркалари натижасида кўплаб ишсиз фуқаролар иш билан таъминланяпти.

Жорий йилнинг 6 июнь куни ўтказилган бўш иш ўринлар меҳнат ярмаркаси туман Камбағалликни қисқартириш ва бантликка кўмаклашиш бўлими биносида Мажбурий ижро бюроси туман бўлими ҳамда туман ИИБ Жамоат хавфсизлиги хизмати пробация бўлими билан ҳамкорликда ташкил қилинди. Мазкур меҳнат ярмаркасида тегишли мутасаддилар ҳамда иш билан банд бўлмаган аҳоли вакиллари иштирок этди.

Тадбирни Камбағалликни қисқартириш ва бандликка кўмаклашиш бўлими бошлиғи Рашид Салаев очди ва олиб борди. У ўз сўзида мамлакатимизда аҳоли бандлигига кўмаклашиш, аҳолини иш билан таъминлаш ҳамда янги иш ўринларини яратиш борасида олиб борилаётган ислоҳатлар хусусида тўхталди.

Шунингдек, сўзга чиққан масъуллар томонидан сўнгги йилларда аҳоли бандлигини таъминлаш йўлида жорий этилган янги механизмларнинг натижадорлиги, эҳтиёжманд аҳолини меҳнат фаолиятига жалб қилишда қулай шарт-шароитлар яратилаётгани, жойларда тегишли масъуллар томонидан ёшларнинг мавжуд муаммолари ҳал қилиниб, бандлигини таъминлаш борасида қатор амалий ишлар қилинаётгани алоҳида қайд этилди.

Мазкур ярмаркада туманимизда фаолият юритаётган 29 та корхона ва ташкилотлар жами 300дан зиёд бўш иш ўринлари билан иштирок этишди. Меҳнат ярмаркасига туман ҳудудида истиқомат қилувчи ишсиз фуқаролар, жумладан, алимент бўйича қарздорлиги мавжуд бўлган ҳамда жазони ижро этиш муассасаларидан қайтган аҳоли вакиллари, шунингдек, ишсиз ёшлар ва бандлиги таъминланмаган олий таълим муассасаларининг битирувчилари ташриф буюрди.

Меҳнат ярмаркасида 50дан ортиқ меҳнатга лаёқатли ишсиз фуқаролар иштирок этишди. Уларнинг 21 нафари доимий ишга жойлаштирилган бўлса, 4 нафар ёшлар ҳақ тўланадиган жамоат ишларига жалб қилинди. Шунингдек, касбга ўқитиш ҳамда меҳнат қонунчилигига доир масалалар юзасидан 9 нафар фуқарога маслаҳатлар берилди.

Бундан ташқари, Тўлқин овулида ташкил этилган тикувчилик йўналиши бўйича қайта касбга тайёрлов ўқув курсларини муваффақиятли тугатган 10 нафар фуқарога махсус сертификатлар топширилди.

Бу каби меҳнат ярмаркаларида аҳолинининг ишсиз қатлами, айниқса ёшлар ва аёлларнинг бандлиги таъминланишига, уларнинг даромад топишига кўмаклашиш ва турмуш шароитини яхшилаш имконини беради. Натижада жамиятда ишсизлик камайиб, кўплаб кўнгилсиз ҳолатларнинг олди олиниши мумкин.

Тадбир давомида масъуллар томонидан фуқароларнинг меҳнат қонунчилигига доир барча саволларига тегишли жавоблар қайтарилди ҳамда ишга жойлашиш юзасидан зарур тавсиялар берилди.

Рашид Салаев, туман Камбағалликни қисқартириш ва бандликка кўмаклашиш бўлими бошлиғи