14 июнь – Бутунжаҳон донорлар куни муносабати билан “Қон топшир – ҳаёт инъом эт!” номли акция ўтказилди

Қон – инсоннинг ҳаёт қувватини оширувчи куч-қудрат манбаи ҳисобланади. Буни ҳаёт учун курашаётган беморлар, шу билан бирга хаста кўнгиллар дардига дармон бўлишга интилаётган шифо аҳли жуда яхши билишади. Ҳаётда шундай вазиятлар бўладики, бемор ҳаёти қил устида, унинг дардини енгиллаштирувчи малҳам — қон плазмаси жуда зарур. Ана шу дақиқаларда донорлик ёрдами туфайлигина беморнинг ҳаёти сақлаб қолинади. Шу боис, халқимиз кўнгилли донорларни хаста инсонларнинг нажоткорлари сифатида қабул қилишади.

2005 йилнинг май ойида Жаҳон Соғликни сақлаш ташкилотининг халқаро ассамблеясида дунё давлатларининг соғликни сақлаш ходимлари якдиллик билан Қон донорлигини қўллаб-қувватлашди ва шу куни 14 июнь – Бутунжаҳон донорлар куни сифатида белгиланди. Ҳар йили ушбу сана дунё бўйлаб кенг нишонланади. Шу билан бирга ушбу санада анъанавий равишда “Қон топшир – ҳаёт инъом эт!” мавзусида акциялар ўтказилади.

Статистик маълумотларга қараганда, мамлакатимизда айни пайтда ҳар минг нафар кишига 5 нафар донор тўғри келади. Агар ҳар минг нафар кишига 10 нафар донор тўғри келса, бу юз фоиз донорлик хизматини амалга ошириш имконини бераркан. Демак, биздаги кўрсаткич халқаро меъёрлардан 2 баравар кам. Шу боис, мамлакатимизда кўнгилли донорлар сафини оширишга алоҳида эътибор қаратилмоқда. Хусусан, 2018 йилда Ўзбекистонда 85,2 тонна, 2019 йилда 96,5 тонна, 2020 йилда 95,5 ва 2021 йилда 113 тонна сифатли донорлик қони тиббиёт муассасаларига беминнат етказиб берилган. Бу эса кўнгилли донорлар сафи йил сайин ошиб бораётганидан далолат беради.

Амударё туманида ҳам 14 июнь – Бутунжаҳон донорлар куни анъанавий тарзда кенг нишонланади ва кўнгилли донорлар томонидан Тиббиёт бирлашмаси ҳузуридаги Қон банкида қон топшириш тадбирлари амалга оширилади.

Сана муносабати билан Тиббиёт бирлашмаси ҳузуридаги Қон банки бўлимида Бутунжаҳон донорлар кунига бағишлаб “Қон топшир – ҳаёт инъом эт!” номли акция ўтказилди. Ушбу тадбирда энг аввало донор-шифокорлар фаоллик кўрсатишди.

Акцияда Тиббиёт бирлашмаси жарроҳи Олимбой Шомуродов, бирлашма қабул бўлими мудири Олимбой Қурбониёзов, Қон банки бўлими шифокори Зокиржон Ўрозбоев, автоклав ҳамшираси Гулчеҳра Матниёзова ҳамда бошқалар беғараз қон топширишиб, ўзларининг меҳр-оқибат ва инсонпарварлик намуналарини кўрсатдилар.

Айтиш жоизки, донорлик, яъни қон топшириш, инсоният учун жуда муҳим ва ҳаётни сақлаб қолувчи амалиётдир. Шу сабабли ҳам юртимизда қон донорлиги аҳолининг турли қатламлари орасида кенг тарғиб қилинмоқда, чунки ҳар куни кўплаб инсонлар жароҳатлар, операциялар ва турли касалликлар туфайли қонга муҳтож бўладилар. Донор бўлиш учун 18 ёшдан 60 ёшгача бўлган, тана вазни 50 килограммдан юқори ва ўзини соғлом деб билган Ўзбекистон фуқаролари мурожаат қилишлари мумкин.

Амударё туман Тиббиёт бирлашмаси ҳузуридаги Қон банки бўлимида “Қон топшир – ҳаёт инъом эт!” акцияси муваффақиятли давом этмоқда. Азиз юртдошларимизни ҳам ушбу масканга ташриф буюриб, қон топширишга ва эзгулик улашишга чорлаб қоламиз. Зеро, хаста кўнгилларга шифо, ҳаётга ишонч ва қувват бахш этиш инсонийликнинг энг олий белгисидир.

Робия Йўлдошева.