14-iyun – Butunjahon donorlar kuni munosabati bilan “Qon topshir – hayot inʼom et!” nomli aktsiya oʻtkazildi

Qon – insonning hayot quvvatini oshiruvchi kuch-qudrat manbai hisoblanadi. Buni hayot uchun kurashayotgan bemorlar, shu bilan birga xasta koʻngillar dardiga darmon boʻlishga intilayotgan shifo ahli juda yaxshi bilishadi. Hayotda shunday vaziyatlar boʻladiki, bemor hayoti qil ustida, uning dardini yengillashtiruvchi malham — qon plazmasi juda zarur. Ana shu daqiqalarda donorlik yordami tufayligina bemorning hayoti saqlab qolinadi. Shu bois, xalqimiz koʻngilli donorlarni xasta insonlarning najotkorlari sifatida qabul qilishadi.

2005-yilning may oyida Jahon Sogʻlikni saqlash tashkilotining xalqaro assambleyasida dunyo davlatlarining sogʻlikni saqlash xodimlari yakdillik bilan Qon donorligini qoʻllab-quvvatlashdi va shu kuni 14-iyun – Butunjahon donorlar kuni sifatida belgilandi. Har yili ushbu sana dunyo boʻylab keng nishonlanadi. Shu bilan birga ushbu sanada anʼanaviy ravishda “Qon topshir – hayot inʼom et!” mavzusida aktsiyalar oʻtkaziladi.

Statistik maʼlumotlarga qaraganda, mamlakatimizda ayni paytda har ming nafar kishiga 5 nafar donor toʻgʻri keladi. Agar har ming nafar kishiga 10 nafar donor toʻgʻri kelsa, bu yuz foiz donorlik xizmatini amalga oshirish imkonini berarkan. Demak, bizdagi koʻrsatkich xalqaro meʼyorlardan 2 baravar kam. Shu bois, mamlakatimizda koʻngilli donorlar safini oshirishga alohida eʼtibor qaratilmoqda. Xususan, 2018-yilda Oʻzbekistonda 85,2 tonna, 2019-yilda 96,5 tonna, 2020-yilda 95,5 va 2021-yilda 113 tonna sifatli donorlik qoni tibbiyot muassasalariga beminnat yetkazib berilgan. Bu esa koʻngilli donorlar safi yil sayin oshib borayotganidan dalolat beradi.

Amudaryo tumanida ham 14-iyun – Butunjahon donorlar kuni anʼanaviy tarzda keng nishonlanadi va koʻngilli donorlar tomonidan Tibbiyot birlashmasi huzuridagi Qon bankida qon topshirish tadbirlari amalga oshiriladi.

Sana munosabati bilan Tibbiyot birlashmasi huzuridagi Qon banki boʻlimida Butunjahon donorlar kuniga bagʻishlab “Qon topshir – hayot inʼom et!” nomli aktsiya oʻtkazildi. Ushbu tadbirda eng avvalo donor-shifokorlar faollik koʻrsatishdi.

Aktsiyada Tibbiyot birlashmasi jarrohi Olimboy Shomurodov, birlashma qabul boʻlimi mudiri Olimboy Qurboniyozov, Qon banki boʻlimi shifokori Zokirjon Oʻrozboyev, avtoklav hamshirasi Gulchehra Matniyozova hamda boshqalar begʻaraz qon topshirishib, oʻzlarining mehr-oqibat va insonparvarlik namunalarini koʻrsatdilar.

Aytish joizki, donorlik, yaʼni qon topshirish, insoniyat uchun juda muhim va hayotni saqlab qoluvchi amaliyotdir. Shu sababli ham yurtimizda qon donorligi aholining turli qatlamlari orasida keng targʻib qilinmoqda, chunki har kuni koʻplab insonlar jarohatlar, operatsiyalar va turli kasalliklar tufayli qonga muhtoj boʻladilar. Donor boʻlish uchun 18 yoshdan 60 yoshgacha boʻlgan, tana vazni 50 kilogrammdan yuqori va oʻzini sogʻlom deb bilgan Oʻzbekiston fuqarolari murojaat qilishlari mumkin.

Amudaryo tuman Tibbiyot birlashmasi huzuridagi Qon banki boʻlimida “Qon topshir – hayot inʼom et!” aktsiyasi muvaffaqiyatli davom etmoqda. Aziz yurtdoshlarimizni ham ushbu maskanga tashrif buyurib, qon topshirishga va ezgulik ulashishga chorlab qolamiz. Zero, xasta koʻngillarga shifo, hayotga ishonch va quvvat baxsh etish insoniylikning eng oliy belgisidir.

Robiya Yoʻldosheva.