Ўқув-семинарда умумтаълим мактабларини аттестациядан ўтказишнинг янги тартиблари ҳақида маълумот берилди

Сўнги йилларда мамлакатимизда мактаб таълимини ривожлантириш ва мактаб таълими муассасаларининг халқаро стандартларига жавоб берадиган замонавий моделларини барпо этиш мақсадида соҳага доир қонунчилик тизими такомиллаштирилиб, қатор ишлар амалга оширилди. Амалдаги қонунчиликка кўра, умумтаълим мактабларини аттестация ва давлат аккредитациясидан ўтказишнинг янги тартиби белгиланди.

Амударё тумани Мактабгача ва мактаб таълими бўлими томонидан “Умумий ўрта таълим ташкилотларини аттестация ва давлат аккредитациясидан ўтказишнинг янги тартиби” мавзусида ўқув-семинар ташкил этилди. Семинарга тумандаги барча умумтаълим мактабларининг ўқув ишлари бўйича дирертор ўринбосарлари ва мактаблар фаолиятини мувофиқлаштириш бўлими мутахассислари таклиф қилинди.

Тадбирни туман Мактабгача ва мактаб таълими бўлимининг Мактаблар фаолиятини мувофиқлаштириш шўъбаси раҳбари Ибраҳим Раджапов очди ва семинарда белгиланган мавзулар бугунги кунда таълим сифатини оширишда долзарблигини таъкидлаб ўтди.

Шундан кейин Мактаблар фаолиятини мувофиқлаштириш шўъбаси методисти Райҳон Якубова умумтаълим мактабларини аттестация ва давлат аккредитациясидан ўтказишнинг янги тартиблари ва бу жараённинг таълим сифатини ошириш ҳамда мактаб рейтингини белгилашдаги аҳамияти тўғрисида маъруза қилди.

Тегишли ҳужжатлар билан мактабларни мажбурий аттестациядан ўтказиш даврийлиги 5 йилдан 11 йилгача узайтирилди ва ўз таълим сифатини билиш истагида бўлган мактабларга ихтиёрий равишда муддатдан олдин шартнома асосида аттестациядан ўтишга рухсат берилди. Шунингдек, умутаълим мактабларини аттестациядан ўтказиш жараёни соддалаштирилиб, 63 та мезондан 13 та мезонга қисқартирилди. Аттестация жараёнларига жалб қилинган экспертларга вазирлик жамғармаси маблағлари ҳисобидан иш ҳақи тўланиши белгиланди.

Бундан ташқари, аттестациядан ўтказиш жараёнлари қисқартирилиши натижасида аттестациядан ўтиш тўғрисидаги аризага илова қилинадиган ҳужжатлар сони ҳам қисқартирилди. Аттестациянинг асосий принциплари эса мустақиллик, холислик, ошкоралик, шаффофлик, даврийлик мажбурийлик қилиб белгиланди.

Аттестация Низомда белгиланган талаблар асосида Вазирлик томонидан ташкил этилади. Аттестация таълим ташкилотларининг фаолиятини ички ва ташқи баҳолашдан иборат босқичда ўтказилади. Умумий ўрта мактабларнинг фаолияти 6 та соҳа, 13 та мезон ва 48 та кўрсаткич орқали амалга оширилиб, 1000 баллик тизимида баҳоланади. Шу билан бирга, битирувчи синф ўқувчиларидан олинадиган назорат ишлари алоҳида 100 баллик тизимда баҳоланди.

Умумий ўрта таълим мактаби фаолиятини ички баҳолаш жараёнида барча синф ўқувчиларидан назорат иши олинади. Ички баҳолаш жараёнлари умумий ўрта таълим мактаби раҳбарияти томонидан ҳар йили ўтказилиб, платформага киритиб борилади.

Семинар қизғин муҳокамаларга бой бўлди. Тадбир давомида 28-сонли мактаб директорининг ўқув ишлари бўйича ўринбосари Баҳодир Юлдашев ва 62-сонли мактаб директорининг маънавий-марифий ишлар бўйича ўринбосари Зокир Атаевлар мавзуга доир фикр-мулоҳазаларини билдиришди.

Семинар иштирокчиларининг барча саволларига мутахассислар томонидан тўлиқ жавоб берилди.

Райҳон Якубова, туман Мактабгача ва мактаб таълими бўлимининг Мактаблар фаолиятини мувофиқлаштириш шўъбаси методисти