Қабул масканларига амударёлик фермерлар томонидан кунига 800-900 тонна дон топширилмоқда

Халқимиз азалдан нонни улуғлаб, азиз неъмат деб билишади. Шу сабабли нон дастурхонларимизнинг кўркига айланган. Далаларда пишиб етилиб, қуёш нурида товланиб турган сап-сариқ буғдой бошоқлари меҳнаткаш халқимизнинг мўл ризқини ифодалайди. Мавсум давомида қилинган меҳнатлар самараси йил мобайнида хонадонларимизни сифатли ун ва ун маҳсулотлари билан таъминлаш имконини беради. Бундай тўкинлик мамлакатимизда халқ фаравонлигини кўзлаб қишлоқ хўжалиги соҳасида амалга оширилган ислоҳотларнинг амалий натижасидир.

Шу кунларда мамлакатимизнинг барча ҳудудлари, жумладан, Амударё туманида ҳам буғдой ўрим-йиғим ишлари қизғин паллага кирган. Бободеҳқон-у миришкор фермерларимизнинг ҳосил чўғидан мамнун бўлиб, “бу йил ғалла йили бўлди”, дейиши бежизга эмас. Чунки қулай келган об-ҳаво шароити ва далаларда ўз вақтида амалга оширилган агротехник тадбирлар натижасида буғдой майдонларидан режа қилинганидан ҳам ортиқроқ дон олиш кутиляпти.

Далаларга уруғлар экилиб, ҳосил етилгунга қадар соҳа мутахассисилари, миришкор фермерларимиз томонидан барча зарурий агротехник тадбирлар белгиланган қоидалар асосида амалга оширилди. Буғдой далаларини куз-қиш мавсумида суғориш ва озиқлантириш ишларига катта эътибор берилиб, буғдой пояларининг яхши ўсишига эришилди.

Эрта баҳорда экин майдонларини суғориш ва озиқлантириш, суспенция сепиш, зараркунандаларга қарши курашиш ва бегона ўтлардан тозалаш тадбирлари уюшқоқлик билан амалга оширилди. Натижада ёзнинг ўрталарида буғдой башоқлари сифатли пишиб етилиб ўрим-йиғим ишларига тайёр ҳолга келди.

Жорий йилги ғалла ҳосили учун туманимиздаги 313 та фермер хўжаликлари ҳамда қишлоқ хўжалиги корхоналарининг жами 4 минг 800 гектар ер майдонига дала ҳолатидан келиб чиқиб, “Антонина”, “Алексей”, “Васса”, “Гром”, “АСР”, “Давр” каби навлардаги буғдой экилган эди. Ғалла ўрим-йиғим ишлари якунига қадар туманимиздаги миришкор фермер хўжаликлари томонидан қабул масканларига жами 14 минг 400 тонна ғалла ҳосилини топшириш мақсад қилинган. Етиштирилган ғалланинг 13 минг 500 тоннаси товар-дон ва 900 тоннаси уруғлик дон шаклида топширилиши белгиланган.

Халқимиз ризқи бўлган ғаллани нест-нобуд қилмасдан уюшқоқлик билан ўриб-йиғиб олиш учун 22 та отряд ташкил қилинди. Ушбу отрядларга 22 та юқори унумли комбайнлар, 47 нафар ички ишлар бўлими ва Миллий гвардия ходимлари, 66 та юк машиналари бириктирилди. Шунингдек, 14 июндан 1 июлга қадар ғаллани нест-нобуд қилмасдан ўриб олиш бўйича чора-тадбирлар режаси ҳамда ўрим графиги ишлаб чиқилган ва шу асосида ишлар ташкил қилинмоқда.

Туманимизда буғдой етиштириш бўйича ўзига хос тажриба мактабига эга бўлган ғаллакорлар кўп. Ғалла ўрим-йиғим ишлари бошланганидан шу кунга қадар қабул масканларига дон топшириш бўйича Дўрман овулидаги “Алламберганов Иззатхон”, Оқ олтин овулидаги “Якубова Гавҳар”, Намуна маҳалласидаги “Музаффар Эшчанов” фермер хўжаликлари ва Назархон овулидаги “Назархон Агро Сервис” масъулияти чекланган жамияти етакчилик қилиб, олдинда боришяпти. Туманимиздаги дон қабул қилиш корхоналари томонидан кунига умумий ҳисобда 800-900 тонна атрофида дон қабул қилиняпти.

Маълумот ўрнида айтишимиз жоизки, Қорақалпоғистон Республикасининг мавжуд табиий хомашё ресурсларидан самарали фойдаланиш орқали саноат, қишлоқ хўжалиги соҳаларини жадал ривожлантириш, ижтимоий ва ишлаб чиқариш инфратузилмаларини яхшилаш, тадбиркорлик ва хизматлар соҳасини қўллаб-қувватлаш, шу асосда аҳоли бандлигини таъминлаш ҳамда турмуш даражасини ошириш мақсадида қабул қилинган Ўзбекистон Республикаси Президентининг тегишли қарорлари миришкор фермерларимиз ва қишлоқ хўжалиги соҳасида меҳнат қилаётган ходимларнинг янада самарали ишлашларига замин яратди.

Айни кунларда бободеҳқон-у миришкор фермерларимиз, комбайн ҳайдовчилари ҳамда мавсумга жалб қилинган барча ходимлар халқимиз бойлиги, ризқ-насибаси бўлган ғаллани нест-нобуд қилмасдан ўриб-йиғиб олиш мақсадида уюшқоқлик билан меҳнат қилишяпти. Фурсатдан фойдаланиб, уларнинг ҳалол меҳнатлари ортидан юксак ғалла хирмони бунёд этилишига тилакдошлик билдирамиз.

Шоҳзод Қурбонбоев