Qabul maskanlariga amudaryolik fermerlar tomonidan kuniga 800-900 tonna don topshirilmoqda

Xalqimiz azaldan nonni ulugʻlab, aziz neʼmat deb bilishadi. Shu sababli non dasturxonlarimizning koʻrkiga aylangan. Dalalarda pishib yetilib, quyosh nurida tovlanib turgan sap-sariq bugʻdoy boshoqlari mehnatkash xalqimizning moʻl rizqini ifodalaydi. Mavsum davomida qilingan mehnatlar samarasi yil mobaynida xonadonlarimizni sifatli un va un mahsulotlari bilan taʼminlash imkonini beradi. Bunday toʻkinlik mamlakatimizda xalq faravonligini koʻzlab qishloq xoʻjaligi sohasida amalga oshirilgan islohotlarning amaliy natijasidir.

Shu kunlarda mamlakatimizning barcha hududlari, jumladan, Amudaryo tumanida ham bugʻdoy oʻrim-yigʻim ishlari qizgʻin pallaga kirgan. Bobodehqon-u mirishkor fermerlarimizning hosil choʻgʻidan mamnun boʻlib, “bu yil gʻalla yili boʻldi”, deyishi bejizga emas. Chunki qulay kelgan ob-havo sharoiti va dalalarda oʻz vaqtida amalga oshirilgan agrotexnik tadbirlar natijasida bugʻdoy maydonlaridan reja qilinganidan ham ortiqroq don olish kutilyapti.

Dalalarga urugʻlar ekilib, hosil yetilgunga qadar soha mutaxassisilari, mirishkor fermerlarimiz tomonidan barcha zaruriy agrotexnik tadbirlar belgilangan qoidalar asosida amalga oshirildi. Bugʻdoy dalalarini kuz-qish mavsumida sugʻorish va oziqlantirish ishlariga katta eʼtibor berilib, bugʻdoy poyalarining yaxshi oʻsishiga erishildi.

Erta bahorda ekin maydonlarini sugʻorish va oziqlantirish, suspentsiya sepish, zararkunandalarga qarshi kurashish va begona oʻtlardan tozalash tadbirlari uyushqoqlik bilan amalga oshirildi. Natijada yozning oʻrtalarida bugʻdoy bashoqlari sifatli pishib yetilib oʻrim-yigʻim ishlariga tayyor holga keldi.

Joriy yilgi gʻalla hosili uchun tumanimizdagi 313 ta fermer xoʻjaliklari hamda qishloq xoʻjaligi korxonalarining jami 4 ming 800 gektar yer maydoniga dala holatidan kelib chiqib, “Antonina”, “Aleksey”, “Vassa”, “Grom”, “ASR”, “Davr” kabi navlardagi bugʻdoy ekilgan edi. Gʻalla oʻrim-yigʻim ishlari yakuniga qadar tumanimizdagi mirishkor fermer xoʻjaliklari tomonidan qabul maskanlariga jami 14 ming 400 tonna gʻalla hosilini topshirish maqsad qilingan. Yetishtirilgan gʻallaning 13 ming 500 tonnasi tovar-don va 900 tonnasi urugʻlik don shaklida topshirilishi belgilangan.

Xalqimiz rizqi boʻlgan gʻallani nest-nobud qilmasdan uyushqoqlik bilan oʻrib-yigʻib olish uchun 22 ta otryad tashkil qilindi. Ushbu otryadlarga 22 ta yuqori unumli kombaynlar, 47 nafar ichki ishlar boʻlimi va Milliy gvardiya xodimlari, 66 ta yuk mashinalari biriktirildi. Shuningdek, 14-iyundan 1-iyulga qadar gʻallani nest-nobud qilmasdan oʻrib olish boʻyicha chora-tadbirlar rejasi hamda oʻrim grafigi ishlab chiqilgan va shu asosida ishlar tashkil qilinmoqda.

Tumanimizda bugʻdoy yetishtirish boʻyicha oʻziga xos tajriba maktabiga ega boʻlgan gʻallakorlar koʻp. Gʻalla oʻrim-yigʻim ishlari boshlanganidan shu kunga qadar qabul maskanlariga don topshirish boʻyicha Doʻrman ovulidagi “Allamberganov Izzatxon”, Oq oltin ovulidagi “Yakubova Gavhar”, Namuna mahallasidagi “Muzaffar Eshchanov” fermer xoʻjaliklari va Nazarxon ovulidagi “Nazarxon Agro Servis” masʼuliyati cheklangan jamiyati yetakchilik qilib, oldinda borishyapti. Tumanimizdagi don qabul qilish korxonalari tomonidan kuniga umumiy hisobda 800-900 tonna atrofida don qabul qilinyapti.

Maʼlumot oʻrnida aytishimiz joizki, Qoraqalpogʻiston Respublikasining mavjud tabiiy xomashyo resurslaridan samarali foydalanish orqali sanoat, qishloq xoʻjaligi sohalarini jadal rivojlantirish, ijtimoiy va ishlab chiqarish infratuzilmalarini yaxshilash, tadbirkorlik va xizmatlar sohasini qoʻllab-quvvatlash, shu asosda aholi bandligini taʼminlash hamda turmush darajasini oshirish maqsadida qabul qilingan Oʻzbekiston Respublikasi Prezidentining tegishli qarorlari mirishkor fermerlarimiz va qishloq xoʻjaligi sohasida mehnat qilayotgan xodimlarning yanada samarali ishlashlariga zamin yaratdi.

Ayni kunlarda bobodehqon-u mirishkor fermerlarimiz, kombayn haydovchilari hamda mavsumga jalb qilingan barcha xodimlar xalqimiz boyligi, rizq-nasibasi boʻlgan gʻallani nest-nobud qilmasdan oʻrib-yigʻib olish maqsadida uyushqoqlik bilan mehnat qilishyapti. Fursatdan foydalanib, ularning halol mehnatlari ortidan yuksak gʻalla xirmoni bunyod etilishiga tilakdoshlik bildiramiz.

Shohzod Qurbonboyev