Амударёлик пиллакорлар юксак хирмон бунёд этдилар

Амударё тумани Қорақалпоғистондагина эмас, балки Ўзбекистон миқёсида энг кўп ва сифатли пилла етиштирувчи туманлардан бири саналади. Туман пиллакорлари ҳар йили шартномавий режаларини ортиғи билан адо этиб, қорақалпоғистонлик пиллакорлар орасида пешқадамлик қилиб келишмоқда. Албатта, бундай мавқега эришишнинг ўзи бўлмайди. Бунинг учун энг аввало соҳани ривожлантиришнинг бирдан-бир омили – озуқа базасини мустаҳкамлаш, ижарачи пиллакорлар учун зарур шарт-шароитлар яратиш, бундан ҳам муҳими, уларнинг фидойи меҳнатларини муносиб рағбатлантириб боришда адолат тамойилларига амал қилиниши жоиз.

Халқимиз пиллачиликни етти хазинанинг бири сифатида қадрлашади. Шунданми, ипак қурти парваришлаш мавсуми жуда қисқа, бир ойдан сал зиёд вақт давом этиб, ҳар бир куни, ҳатто лаҳзалари ўта масъулиятли бўлишига қарамай, йиллар давомида ипак қуртини меҳр билан парваришлаб, юқори ҳосил олиб келаётган моҳир пиллакорларимиз жуда кўп. Катта миннатдорчилик ва мамнуният билан шуни алоҳида эътироф этиш жоизки, айнан ана шундай фидойи, меҳнаткаш инсонлар саъй-ҳаракатлари туфайли жорий йилги пилла хирмонимиз янада юксак бўлди.

Бу йилги ипак қурти парваришлаш мавсумига жиддий тайёргарлик кўрилди. Тумандаги пиллачилик тармоғи мавжуд бўлган фермер хўжаликлари томонидан барча тутзорлар, ҳатто дала йўллари, ички сув йўллари бўйларига экилган тут дарахтлари – жами 525,2 гектар майдондаги салкам 2400 тупга яқин серҳосил тут ниҳоллари эрта баҳорданоқ алоҳида рўйхатга олинди ва зарур агротехник тадбирлар амалга оширилиб, озиқлантирилди.

Ҳудудлардаги ижарачи пиллакорлар ихтиёридаги қуртхоналар соҳа мутахассислари томонидан жиддий назоратга олиниб, санитария талаблари даражасида мавсумга тайёрланди. Барча зарур шароитлар яратилгач, пиллачилик тармоғи бор бўлган фермер хўжаликларининг ижарачи пиллакорлари билан “Jayxun Silk” МЧЖ пиллани қайта ишлаш корхонаси ўртасида жорий йилги мавсумда 296 тонна пилла етиштириш бўйича шартнома тузилди. Амалга оширилган барча саъй-ҳаракатлар бугунги юксак пилла хирмонини яратиш имконини берди.

Жорий йилнинг 13 июнь санасигача пиллакорларимизнинг тун-у кун олиб борган фидойи меҳнатларининг натижаси – шартномавий режадагидан 14 тонна зиёд, яъни 296 тонна ўрнига 310 тонналик қимматбаҳо саноат хом ашёси – юқори сифатли пилла хирмони бунёд этилди. Бу борадаги режа 104 фоизга бажарилди.

Эришилган бу юксак натижаларга тумандаги пиллачилик тармоғи бор бўлган фермер хўжаликлари муносиб ҳиссаларини қўшдилар. Туманда энг кўп пилла ҳосилини етиштирган чойкўллик ижарачи пиллакорлар 27 тоннадан ортиқ хирмони билан карвонбошилик қилдилар. Тўлқинликлар 17,9 тонна, қанглилик ижарачилар 18,8 тонна, қипчоқлик пиллакорлар 14,2 тонна, оқ олтинликлар 12,8 тонна, Бобур овуллик пиллакорлар 20,2 тонна ҳосил йиғиб, сарбаланд хирмонлар бунёд этишди. Шунингдек, Куюк кўпир, Хитой, Бўз ёп, Намуна, Дўрман, Холимбег, Қиличбой, Ўрта қалъа, Тош ёп ва Амир Темур номли овул ҳамда маҳаллалар пиллакорлари ҳам ибрат намуналарини кўрсатдилар.

Қайси соҳа бўлишидан қатъий назар, қилинган фидойи меҳнат қадрланмаса, моддий манфаатдорлик масаласида адолат бўлмаса, албатта ўша соҳа бир кун келиб таназзулга юз тутади. Бу замонлар синовидан ўтган ҳақиқат. Шу нуқтаи назардан олиб қараганда “Jayxun Silk” МЧЖ пиллани қайта ишлаш корхонаси билан ижарачи пиллакорлар ўртасида тузилган шартномага мувофиқ пиллакорларнинг фидойи меҳнатлари муносиб баҳоланди ва топширилган ҳосил учун иш ҳақлари шу куннинг ўзида, тарози бошида ҳисоб-китоб қилиниб, ижарачиларга бериб борилди. Қилган меҳнатлари, етиштирган сифатли пилла ҳосили салмоғига яраша 5-6 миллион, баъзи пиллакорлар ҳатто 10-15, 20-21 миллион сўмгача даромад олишга муваффақ бўлдилар.

Фурсатдан фойдаланиб, соҳа ходимларини, кунни-тунга улаб, қуртхоналарда сифатли пилла етиштириш мақсадида ўзларининг ҳаловатидан кечиб фидойи меҳнат қилган ва бугунги кунда ёруғ юз билан юксак Амударё пилла хирмони яратган барча азиз пиллакорларимизни эришилган катта меҳнат ғалабаси билан чин дилдан муборакбод этаман, оилаларига фаровонлик, мустаҳкам соғлик тилайман.

Эркабой Юсупов, “Jayxun Silk” МЧЖ раҳбари.