Электромонтёрлар фаолиятида меҳнат муҳофазисини кучайтиришга доир амалий семинар ташкил қилинди

Бугун замон шиддат билан ривожланиб, вақт ўтгани сайин ҳаётимизга кўплаб янгиликлар кириб келяпти. Кундалик турмушимиз ва иш фаолиятимизни техникалардан, айниқса электр энергиясидан айро ҳолда тасаввур қилишимиз қийин. Ҳатто электр тармоғидаги қисқа узилишлар сабаб белгиланган режаларимиз ўз вақтидан кечикиб қолиши мумкин. Истемолчиларни доимий ва узлуксиз равишда электр энергияси билан таъминлаш, қурилмаларда юзага келаётган носозликлар ва аварияли ҳолатларни тезкорлик билан хавфсиз бартараф этишда соҳа ходимларининг юқори билим ва тажрибалари муҳим аҳамиятга эга.

“Ҳудудий электр тармоқлари” акциядорлик жамияти Қорақалпоғистон ҳудудий филиали томонидан Амударё туманида электромонтёрларнинг малакаларини текшириш ва ошириб бориш мақсадида белгиланган тартибда амалий семинарлар ўтказиб келинади.

Жорий йилнинг 21 июнь куни туман электр таъминоти корхонаси томонидан ташкил этилган “Хавфсизлик техникаси” амалий семинарида Нукус шаҳри ва Амударё, Тўркул, Қўнғирот, Тахтакўпир туманлари электр таъминоти корхонаси ходимларидан таркиб топган электромонтёр жамоалари маҳоратларини намойиш қилишди.

Тадбирда туман ҳокимининг ўринбосари Баҳодир Эрназаров, электр таъминоти корхонаси хавфсизлик бўйича муҳандислари Шавкат Холимбетов, Казбек Фазилбеков ҳамда соҳада узоқ йиллик тажрибага эга бўлган уста-монтёрлар иштирок этишди.

Дастлаб тадбир аввалида муҳандислар томонидан электромонтёрларга меҳнат муҳофазисини кучайтириш, бахтсиз ҳодисаларнинг олдини олиш ва эксплутация ишларини хавфсиз бажариш чораларини кўришга доир зарур кўрсатмалар берилди. Шунингдек, иш жараёнида жароҳатланишнинг олдини олиш мақсадида ҳимоя воситаларининг яроқлилик йўриқномалари текширилиб, уларни амалда самарали қўллаш тартиби ҳам тушунтириб ўтилди.

Ҳар қандай соҳада асбоб-анжомларнинг созлиги меҳнат унумдорлигини оширади. Бу қоида айниқса, электромонтёрлар фаолиятида муҳим аҳамиятга эга. Чунки уларнинг иш фаолияти юқори кучланишга эга бўлган электр энергиясига боғлиқ равишда амалга оширилди. Иш жараёнида махсус асбоб-анжомларнинг талабга жавобга бермаслиги, шошма-шошарлик ва бепарволик кўнгилсиз оқибатларга сабаб бўлиши мумкин. Шу сабабли соҳа ходимларидан шахсий масъулият ва зийраклик талаб қилинади.

Семинар давомида хавфсизлик муҳандислари ва уста-монтёрлар томонидан ходимларнинг асбоб-ускуналари ва махсус иш кийимларининг ҳолати рўйхат асосида текширилиб, ёш электромонтёрларга иш қуролларини тартибли сақлаш ва улардан самарали фойдаланишга доир амалий тавсиялар билдирилди. Шунингдек, фақулодда ҳолатларда иш жараёнини хавфсиз ташкил этиш ва айрим ускуналардан қандай фойдаланиш кераклиги тушунтирилди.

Шундан кейин, амалий машғулот полигонида электромонтёрлар ўртасида эксплуатация ишларини бажариш тадбирларига навбат берилди. Барча жамоалар темир-бетонли устунларга чиқиб, носозликни бартараф этиш, юқори кучланишни ерга йўналтириш, электр симларини бир манзилдан иккинчи манзилга йўналтириш ва соҳага доир шу каби машғулотлар орқали синовдан ўтказилди. Иштирокчилар белгиланган қоидалар асосида махсус шартларни бажариш давомида шахсий тажрибаларини намойиш этишди.

Маълумот ўрнида айтишимиз жоизки, туман электр таъминоти корхонаси томонидан электр энергиясидан самарали фойдаланиб техник йўқотишларни камайтириш, электр энергиясини иқтисод қилиш ва истеъмолчиларни узлуксиз электр энергияси билан таъминлаш мақсадида бир қатор вазифалар амалга оширилди. Хусусан, куз-қиш мавсуми давомида аварияли ҳолатларнинг олдини олиш мақсадида 56 дона трансфортматор пунктлари ва 177 кмдан ортиқ ҳаво электр тармоғида мукаммал таъмирлаш ишлари режалаштирилган бўлиб, шундан 24 дона трансформатор пунктлари ва 76 кмдан ортиқ ҳаво электр тармоғида белгиланган вазифалар сифатли бажарилди. Бундан ташқари 48 дона ишга яроқсиз таянч устунлар янгиларига алмаштирилди.

Яна шуни таъкидлашимиз жоизки, Ўзбекистон Республикаси Президентининг тегишли қарорлари асосида 9 дона трансформатор пунктларини ҳамда 23 кмдан ортиқ электр узатиш тармоқларини тортиш режалаштирилган бўлиб, бугунги кунга қадар 4 кмга яқин замонавий СИП кабель тармоғи тортилди. Шунингдек, аварияли ҳолатларни қисқа фурсатларда бартараф этиш учун махсус бригада тузилиб, қўшимча заҳира материаллари ва автотранспорт воситалари соз ҳолатга келтирилди.

Электромонтёрлар ўртасида хавфсизлик моҳафазини кучайтиришга доир ташкил қилинаётган бу каби семинарлар соҳа ходимларининг билим ва малакаларини ошириши билан ҳам аҳамиятли ҳисобланади. Зеро, ҳар қандай ишда хавфсизлик қоидаларига амал қилиш орқали кўнгилсиз воқеаларнинг олдини олиб, яхши натижаларга эришилади.

Жасур Салаев, Амударё тумани электр таъминоти корхонаси раҳбари.