Elektromontyorlar faoliyatida mehnat muhofazisini kuchaytirishga doir amaliy seminar tashkil qilindi

Bugun zamon shiddat bilan rivojlanib, vaqt oʻtgani sayin hayotimizga koʻplab yangiliklar kirib kelyapti. Kundalik turmushimiz va ish faoliyatimizni texnikalardan, ayniqsa elektr energiyasidan ayro holda tasavvur qilishimiz qiyin. Hatto elektr tarmogʻidagi qisqa uzilishlar sabab belgilangan rejalarimiz oʻz vaqtidan kechikib qolishi mumkin. Istemolchilarni doimiy va uzluksiz ravishda elektr energiyasi bilan taʼminlash, qurilmalarda yuzaga kelayotgan nosozliklar va avariyali holatlarni tezkorlik bilan xavfsiz bartaraf etishda soha xodimlarining yuqori bilim va tajribalari muhim ahamiyatga ega.

“Hududiy elektr tarmoqlari” aktsiyadorlik jamiyati Qoraqalpogʻiston hududiy filiali tomonidan Amudaryo tumanida elektromontyorlarning malakalarini tekshirish va oshirib borish maqsadida belgilangan tartibda amaliy seminarlar oʻtkazib kelinadi.

Joriy yilning 21-iyun kuni tuman elektr taʼminoti korxonasi tomonidan tashkil etilgan “Xavfsizlik texnikasi” amaliy seminarida Nukus shahri va Amudaryo, Toʻrkul, Qoʻngʻirot, Taxtakoʻpir tumanlari elektr taʼminoti korxonasi xodimlaridan tarkib topgan elektromontyor jamoalari mahoratlarini namoyish qilishdi.

Tadbirda tuman hokimining oʻrinbosari Bahodir Ernazarov, elektr taʼminoti korxonasi xavfsizlik boʻyicha muhandislari Shavkat Xolimbetov, Kazbek Fazilbekov hamda sohada uzoq yillik tajribaga ega boʻlgan usta-montyorlar ishtirok etishdi.

Dastlab tadbir avvalida muhandislar tomonidan elektromontyorlarga mehnat muhofazisini kuchaytirish, baxtsiz hodisalarning oldini olish va eksplutatsiya ishlarini xavfsiz bajarish choralarini koʻrishga doir zarur koʻrsatmalar berildi. Shuningdek, ish jarayonida jarohatlanishning oldini olish maqsadida himoya vositalarining yaroqlilik yoʻriqnomalari tekshirilib, ularni amalda samarali qoʻllash tartibi ham tushuntirib oʻtildi.

Har qanday sohada asbob-anjomlarning sozligi mehnat unumdorligini oshiradi. Bu qoida ayniqsa, elektromontyorlar faoliyatida muhim ahamiyatga ega. Chunki ularning ish faoliyati yuqori kuchlanishga ega boʻlgan elektr energiyasiga bogʻliq ravishda amalga oshirildi. Ish jarayonida maxsus asbob-anjomlarning talabga javobga bermasligi, shoshma-shosharlik va beparvolik koʻngilsiz oqibatlarga sabab boʻlishi mumkin. Shu sababli soha xodimlaridan shaxsiy masʼuliyat va ziyraklik talab qilinadi.

Seminar davomida xavfsizlik muhandislari va usta-montyorlar tomonidan xodimlarning asbob-uskunalari va maxsus ish kiyimlarining holati roʻyxat asosida tekshirilib, yosh elektromontyorlarga ish qurollarini tartibli saqlash va ulardan samarali foydalanishga doir amaliy tavsiyalar bildirildi. Shuningdek, faqulodda holatlarda ish jarayonini xavfsiz tashkil etish va ayrim uskunalardan qanday foydalanish kerakligi tushuntirildi.

Shundan keyin, amaliy mashgʻulot poligonida elektromontyorlar oʻrtasida ekspluatatsiya ishlarini bajarish tadbirlariga navbat berildi. Barcha jamoalar temir-betonli ustunlarga chiqib, nosozlikni bartaraf etish, yuqori kuchlanishni yerga yoʻnaltirish, elektr simlarini bir manzildan ikkinchi manzilga yoʻnaltirish va sohaga doir shu kabi mashgʻulotlar orqali sinovdan oʻtkazildi. Ishtirokchilar belgilangan qoidalar asosida maxsus shartlarni bajarish davomida shaxsiy tajribalarini namoyish etishdi.

Maʼlumot oʻrnida aytishimiz joizki, tuman elektr taʼminoti korxonasi tomonidan elektr energiyasidan samarali foydalanib texnik yoʻqotishlarni kamaytirish, elektr energiyasini iqtisod qilish va isteʼmolchilarni uzluksiz elektr energiyasi bilan taʼminlash maqsadida bir qator vazifalar amalga oshirildi. Xususan, kuz-qish mavsumi davomida avariyali holatlarning oldini olish maqsadida 56 dona transfortmator punktlari va 177 kmdan ortiq havo elektr tarmogʻida mukammal taʼmirlash ishlari rejalashtirilgan boʻlib, shundan 24 dona transformator punktlari va 76 kmdan ortiq havo elektr tarmogʻida belgilangan vazifalar sifatli bajarildi. Bundan tashqari 48 dona ishga yaroqsiz tayanch ustunlar yangilariga almashtirildi.

Yana shuni taʼkidlashimiz joizki, Oʻzbekiston Respublikasi Prezidentining tegishli qarorlari asosida 9 dona transformator punktlarini hamda 23 kmdan ortiq elektr uzatish tarmoqlarini tortish rejalashtirilgan boʻlib, bugungi kunga qadar 4 kmga yaqin zamonaviy SIP kabel tarmogʻi tortildi. Shuningdek, avariyali holatlarni qisqa fursatlarda bartaraf etish uchun maxsus brigada tuzilib, qoʻshimcha zahira materiallari va avtotransport vositalari soz holatga keltirildi.

Elektromontyorlar oʻrtasida xavfsizlik mohafazini kuchaytirishga doir tashkil qilinayotgan bu kabi seminarlar soha xodimlarining bilim va malakalarini oshirishi bilan ham ahamiyatli hisoblanadi. Zero, har qanday ishda xavfsizlik qoidalariga amal qilish orqali koʻngilsiz voqealarning oldini olib, yaxshi natijalarga erishiladi.

Jasur Salayev, Amudaryo tumani elektr taʼminoti korxonasi rahbari.