Ёз мавсумида кузатиладиган юқумли касалликларнинг олдини олишга қаратилган профилактик тадбирлар ўтказилмоқда
Соҳа ходимларига яхши маълумки, март ойидан бошлаб октябрь ойигача бўлган давр каналарнинг ривожланиши учун жуда қулай мавсум ҳисобланади. Шу сабабли Қрим-Конго геморрагик иситма касаллигининг олдини олиш мақсадида Амударё тумани Санитария-эпидемиологик осойишталик ва жамоат саломатлиги бўлими томидан аҳоли орасида тарғибот-ташвиқот ишлари кучайтирилмоқда.
Бу касаллик ўтмишда қора ҳалак, қўра ўлим деб номланган бўлиб, каналар чақиши ёки канани териш ва эзиб ўлдириш, шунингдек, қўй-эчкиларнинг жунини қирқиш вақтида одамларга юқади. Беморлар ўз вақтида шифокорга мурожаат қилмаса, аҳволи оғирлашиб, айрим ҳолатларда ўлим билан тугаши мумкин.
Қрим-Конго геморрагик иситма касаллигини юқтириб олмаслик учун чорвачилик билан шуғулланувчи фуқаролар белгиланган санитария қоидаларига амал қилган ҳолда хонадонларда боқилаётган чорва молларида каналар бор-ёқлигини текшириб туришлари шарт.
Бундан ташқари, ёз кунларида аҳоли, айниқса ёшлар орасида салқин ичимликлар ва музқаймоқларнинг севиб истемол қилиниши оқибатида, ўткир юқумли ичак касалликлари, овқатдан заҳарланиш ҳамда юқумли бўлмаган бошқа касалликлар ҳам келиб чиқиши мумкин.
Амударё тумани Санитария-эпидемиологик осойишталик ва жамоат саломатлиги бўлими мутахассислари томонидан салқин ичимликлар, музқаймоқлар шунингдек иссиқ кунларда сифати тез бузилувчи озиқ-овқат маҳсулотларидан заҳарланишнинг олдини олиш мақсадида аҳоли гавжум жойлар, жумладан, кафеларда, бозорларда ва жамоат жойларида профилактик тадбирлар ўтказиляпти. Шунингдек, турғун савдо шоҳобчалари томонидан сотувга чиқарилаётган салқин ичимликлар ва музқаймоқларнинг кимёвий ва бактериологик таркибини аниқлаш мақсадида бўлим лабораториясига намуналар олиниб, тегишли тартибда текширилмоқда.
Маълумот ўрнида айтиш жоизки, туғун савдо шаҳобчаларидаги салқин ичимликлар ва музқаймоқлар инсон саломатлигига салбий таъсир кўрсатмаслиги учун бир қатор белгиланган талабларга жавоб бериши зарур. Хусусан, савдога чиқарилган салқин ичимликлар ва музқаймоқларнинг сифати ва хавфсизлигини кафолатловчи ҳужжати бўлиши керак. Шунингдек, салқин ичимлик солинган катта ҳажмдаги идишлар меъёрий талаб бўйича озиқ-овқат маҳсулотларига мўлжалланган, хавсизлиги кафолатланган бўлиши лозим. Бундан ташқари, катта ҳажмдаги идишларда сотилаётган салқин ичимликлар ва музқаймоқлар бир маротаба ишлатиладиган идишларда қуйиб берилиши ва ишлатилгандан сўнг идишлар яроқсиз ҳолатга келтирилиб, махсус контейнерда йиғилиши белгиланган. Сотувчилар эса Ўзбекистон Республикаси Соғлиқни сақлаш вазирлигининг тегишли буйруғи асосида даврий тиббий кўрикдан ўтиши ва махсус иш кийимига эга бўлиши ҳамда шахсий гигиена қоидаларига риоя этиши зарур.
Азиз истеъмолчилар! Сиздан шуни илтимос қилиб сўраб қоламизки, ёзнинг иссиқ кунларида қуёш нури тик тушадиган ва очиқ шароитда сақланган, полиэтилен идишларда қадоқланган салқин ичимликлар, фуқаролар томонидан номаълум шароитда тайёрланиб, санитария-гигена талабларига жавоб бермайдиган идишларга солинган турли чанқоқбосди ичимликлар ва хавфсизлиги кафолатланмаган озиқ-овқат маҳсулотларини истеъмол қилишдан сақланинг. Чунки бундай ичимлик ҳамда озиқ-овқат маҳсулотлари ўз сифат ва хавфсизлигини йўқотган ҳисобланади.
Д.Бабажанов, Д.Балтабаева, Амударё тумани СЭО ва ЖСБ олий тоифали шифокорлари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
