Yoz mavsumida kuzatiladigan yuqumli kasalliklarning oldini olishga qaratilgan profilaktik tadbirlar oʻtkazilmoqda
Soha xodimlariga yaxshi maʼlumki, mart oyidan boshlab oktyabr oyigacha boʻlgan davr kanalarning rivojlanishi uchun juda qulay mavsum hisoblanadi. Shu sababli Qrim-Kongo gemorragik isitma kasalligining oldini olish maqsadida Amudaryo tumani Sanitariya-epidemiologik osoyishtalik va jamoat salomatligi boʻlimi tomidan aholi orasida targʻibot-tashviqot ishlari kuchaytirilmoqda.
Bu kasallik oʻtmishda qora halak, qoʻra oʻlim deb nomlangan boʻlib, kanalar chaqishi yoki kanani terish va ezib oʻldirish, shuningdek, qoʻy-echkilarning junini qirqish vaqtida odamlarga yuqadi. Bemorlar oʻz vaqtida shifokorga murojaat qilmasa, ahvoli ogʻirlashib, ayrim holatlarda oʻlim bilan tugashi mumkin.
Qrim-Kongo gemorragik isitma kasalligini yuqtirib olmaslik uchun chorvachilik bilan shugʻullanuvchi fuqarolar belgilangan sanitariya qoidalariga amal qilgan holda xonadonlarda boqilayotgan chorva mollarida kanalar bor-yoqligini tekshirib turishlari shart.
Bundan tashqari, yoz kunlarida aholi, ayniqsa yoshlar orasida salqin ichimliklar va muzqaymoqlarning sevib istemol qilinishi oqibatida, oʻtkir yuqumli ichak kasalliklari, ovqatdan zaharlanish hamda yuqumli boʻlmagan boshqa kasalliklar ham kelib chiqishi mumkin.
Amudaryo tumani Sanitariya-epidemiologik osoyishtalik va jamoat salomatligi boʻlimi mutaxassislari tomonidan salqin ichimliklar, muzqaymoqlar shuningdek issiq kunlarda sifati tez buziluvchi oziq-ovqat mahsulotlaridan zaharlanishning oldini olish maqsadida aholi gavjum joylar, jumladan, kafelarda, bozorlarda va jamoat joylarida profilaktik tadbirlar oʻtkazilyapti. Shuningdek, turgʻun savdo shohobchalari tomonidan sotuvga chiqarilayotgan salqin ichimliklar va muzqaymoqlarning kimyoviy va bakteriologik tarkibini aniqlash maqsadida boʻlim laboratoriyasiga namunalar olinib, tegishli tartibda tekshirilmoqda.
Maʼlumot oʻrnida aytish joizki, tugʻun savdo shahobchalaridagi salqin ichimliklar va muzqaymoqlar inson salomatligiga salbiy taʼsir koʻrsatmasligi uchun bir qator belgilangan talablarga javob berishi zarur. Xususan, savdoga chiqarilgan salqin ichimliklar va muzqaymoqlarning sifati va xavfsizligini kafolatlovchi hujjati boʻlishi kerak. Shuningdek, salqin ichimlik solingan katta hajmdagi idishlar meʼyoriy talab boʻyicha oziq-ovqat mahsulotlariga moʻljallangan, xavsizligi kafolatlangan boʻlishi lozim. Bundan tashqari, katta hajmdagi idishlarda sotilayotgan salqin ichimliklar va muzqaymoqlar bir marotaba ishlatiladigan idishlarda quyib berilishi va ishlatilgandan soʻng idishlar yaroqsiz holatga keltirilib, maxsus konteynerda yigʻilishi belgilangan. Sotuvchilar esa Oʻzbekiston Respublikasi Sogʻliqni saqlash vazirligining tegishli buyrugʻi asosida davriy tibbiy koʻrikdan oʻtishi va maxsus ish kiyimiga ega boʻlishi hamda shaxsiy gigiyena qoidalariga rioya etishi zarur.
Aziz isteʼmolchilar! Sizdan shuni iltimos qilib soʻrab qolamizki, yozning issiq kunlarida quyosh nuri tik tushadigan va ochiq sharoitda saqlangan, polietilen idishlarda qadoqlangan salqin ichimliklar, fuqarolar tomonidan nomaʼlum sharoitda tayyorlanib, sanitariya-gigena talablariga javob bermaydigan idishlarga solingan turli chanqoqbosdi ichimliklar va xavfsizligi kafolatlanmagan oziq-ovqat mahsulotlarini isteʼmol qilishdan saqlaning. Chunki bunday ichimlik hamda oziq-ovqat mahsulotlari oʻz sifat va xavfsizligini yoʻqotgan hisoblanadi.
D.Babajanov, D.Baltabayeva, Amudaryo tumani SEO va JSB oliy toifali shifokorlari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
