Ёшларга олий ҳарбий таълим муассасаларига ўқишга киришда муайян имтиёз берувчи тавсияномалар топширилди

Мамлакатимизда янги Ўзбекистонни барпо этишдек улуғвор мақсадга эришиш йўлида асосий таянчимиз бўлган азм-у шижоатли ёшларга эътибор ва ғамхўрлик кўрсатиш, уларга барча соҳаларда ўз иқтидори ва салоҳиятини тўлиқ намоён этиши учун зарур шароит ва имкониятлар яратиб бериш давлат сиёсатининг устувор йўналиши ҳисобланади. Шу мақсадда ёшларга оид давлат сиёсатини изчил ва самарали амалга ошириш, ёшларни ватанпарварлик, миллий анъана ва қадриятларимизга ҳурмат руҳида тарбиялаш, уларни ҳар томонлама қўллаб-қувватлаш, маънавий етук ва жисмонан соғлом, баркамол қилиб тарбиялаш йўлида масъул ташкилотлар томонидан тизимли ишлар амалга оширилмоқда.

Жорий йилнинг 11 июль куни Амударё туманидаги 82-сонли мактабнинг фаоллар залида умумтаълим мактабларининг 11-синф ўқувчилари – “Ватан таянчи” отряди аъзоларига республика олий ҳарбий таълим муассасаларининг тегишли таълим йўналишларига ўқишга кириш учун тест синовлари натижаларига кўра тўплаган балларининг 5 фоизи миқдорида қўшимча балл шаклида имтиёз берувчи тавсияномалар топширилди.

Тадбирда Амударё тумани Мудофаа ишлари бўлими бошлиғи Шерзод Муродов, Мактабгача ва мактаб таълими бўлими бошлиғи Ялғаш Шамуратов, Миллий гвардия туман бўлими бошлиғи Бахтиёр Атажанов ва бошқалар иштирок этди.

Дастлаб 82-сонли мактаб директори Зафар Ақманов сўзга чиқиб, йиғилганларга меҳмонларни таништирди ва ёшларни ҳарбий-ватанпарварлик руҳида тарбиялашга қаратилган “Ватан таянчи” ҳаракатининг мазмун-моҳияти ҳақида маълумотлар берди.

Шундан сўнг масъулар Ўзбекистон Республикаси Президентининг 2022 йил 2 март кунги “Ватан таянчи” болалар ва ўсмирлар ҳарбий-ватанпарварлик ҳаракати фаолиятини ташкил этиш тўғрисида”ги Қарорининг мақсади, ушбу тавсияномага эга бўлган ёшларга републикадаги олий ҳарбий таълим муассасаларининг тегишли таълим йўналишларига ўқишга қабул қилишда бериладиган имтиёзлар тўғрисида маълумотлар берди. Шунингдек, “Ватан таянчи” ҳаракатининг асл моҳияти ва унинг ёшлар ҳаётида тутган ўрни ҳақида алоҳида тўхталиб ўтилди.

Дарҳақиқат, замон шиддат билан ривожланаётган бугунги кунда ўсиб келаётган ёш авлодни Ватан тақдирига дахлдорлик, маънавий-ахлоқий, миллий ва умуминсоний қадриятлар ҳамда қонунларимизга нисбатан юксак ҳурмат руҳида тарбиялаш ҳар қачонгидан ҳам долзарб масала ҳисобланади. “Ватан таянчи” ҳаракати мана шундай эркин фикрлайдиган, мустаҳкам билимли, мамлакатимиз фаровонлиги ва янада ривожланишига муносиб ҳисса қўшиш орзусида бўлган ёшларни тарбия қилишда муҳим вазифаларни бажаради. Бу ҳаракат, айниқса, дунё глобаллашаётган бугунги даврда фарзандларимизни турли хавфли ғоялар ва “оммавий маданият” ниқоби остида ташқаридан кириб келаётган салбий таъсирлардан ҳимоя қилишда муҳим аҳамиятга эга.

Тадбир якунида масъуллар томонидан олий ҳарбий таълим муассасаларига қабул қилишда муайян имтиёз берувчи тавсияномалар ўз эгаларига тантанали равишда топширилди.

Маълумот ўрнида айтишимиз жоизки, ушбу тавсияномалар берилган санадан бошлаб 3 йил мобайнида амал қилади.

Шоҳзод Қурбонбоев