ЁЗГИ СОҒЛОМЛАШТИРИШ ТАДБИРЛАРИ БОЛАНИ ҲАМ МАЪНАН, ҲАМ ЖИСМОНАН РИВОЖЛАНТИРАДИ
“–Мактабгача таълим ташкилоти болани жуда ёшлигидан жамиятга фаол аралашишга ўргатади, жамият қонун-қоидаларини эрта таниган болалар ватанпарвар, халқпарвар инсонлар бўлиб вояга етадилар", – деган эдилар муҳтарам Президентимиз соҳа вакиллари билан учрашувлардан бирида.
Ҳақиқатдан ҳам, бошланғич синфлар ўқитувчилари Президентимиз эътироф этганларидай, мактаб ёшига етгунга қадар мактабгача таълим ташкилотида тарбияланган бола билан оилада, ота-онаси ва яқинлари даврасида улғайган, 1-синфга қабул қилинган болалар ўртасида кескин фарқ борлигини айтишади.
Бир неча йил давомида МТТда тарбияланган болалар мактаб ҳаётига жуда тез кўникишлари билан бирга, шахсий фикрини ифода этишда тезкор ва мослашувчан, эпчиллиги билан ажралиб туришади. Оилада тарбияланиб, мактабга чиққан болалар хулқ-атворида эса тортинчоқлик, ўқитувчи билан мулоқот жараёнидаги ўз фикрини мустақил ифода этиш қобилияти суст бўлади. Ана шу сусткашлик ва тортинчоқлик туфайли бола мактаб таълимини ўзлаштиришда тенгдошларидан орқада қолади. Шу жиҳатдан олиб қараганда, келажагимиз эгалари бўлган ёш авлодни баркамол инсонлар қилиб тарбиялашда мактабгача таълим ташкилотларининг тутган ўрни муҳим аҳамиятга эга.
Амударё туманидаги 23-сонли мактабгача таълим ташкилотида “Ёзги соғломлаштириш ойлиги” доирасида бўлиб ўтган ўқув-услубий кўргазмали семинарда бу ҳақда соҳа мутахассислари томонидан қимматли фикрлар билдирилиб, илғор тажрибалар кўргазмали равишда намойиш этилди.
Ўқув-услубий кўргазмали семинар ишида тумандаги мавжуд 52 та мактабгача таълим ташкилотлари раҳбарлари ва услубчилари иштирок этишди. Семинар машғулотларини олиб бориш учун бежизга мазкур МТТ танланмаган. Чунки 23- сонли МТТда болажонларнинг яйраб ўсишлари, табиат бағрида мириқиб ўйнашлари, ўз орзу-интилишларини амалда намоён этишлари, нутқий салоҳиятини ривожлантиришлари учун барча шароитлар яратилган. Айни пайтда 5та асосий гуруҳда 150 нафар кичкинтойлар таълим-тарбия олаётган муассасада 5та йўналиш бўйича машғулотлар қатъий режа асосида олиб борилади.
Унга кўра, муассаса ходимлари томонидан ижодкорлик, хусусан, тасвирий санъат, мусиқий ва дидактик ўйинлар, шунингдек, сув ва қум ўйинлари учун ўйинчоқ ҳамда жиҳозлар, спорт майдончасида ҳар хил ҳаракатли ўйинлар тарзидаги машғулотлар орқали болажонларда мантиқий фикрлаш, соғлик учун фойдали бўлган мантиқий ҳаракатли ўйинларни тўғри бажариш кўникмалари шакллантирилади.
“Ёзги соғломлаштириш ойлиги” доирасида ўтказилган семинарда болажонларни жисмоний ривожлантириш ва соғлом турмуш тарзини шакллантириш, ижтимоий-ҳиссий ривожланиш, нутқ ва мулоқот, ўқиш ҳамда ёзиш малакалари, билиш жараёнининг ривожланиши, ижодий ривожланиш соҳалари кўникмалари асосида бола қобилиятини ривожлантиришга қаратилган таълим- тарбия соатлари кўргазмали тарзда амалга оширилди.
Ўқув-услубий кўргазмали семинари давомида иштирокчилар 23-сонли МТТ ходимларининг илғор тажрибаларини кўргазмали воситалар ёрдамида ўргандилар ва ўз фаолиятларида татбиқ этиш бўйича ўзларини қизиқтирган йўналишлар юзасидан саволлар билан мурожаат қилдилар ҳамда барча саволларига жавоблар олдилар.
“Ёзги соғломлаштириш ойлиги” доирасида ўтказилган мазкур тадбир МТТ ходимларининг билим ва малакаларини оширишга қаратилгани билан иштирокчиларда катта таассуротлар қолдирди.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
