Қишлоқ хўжалигидаги ислоҳотлар натижасида соҳа янада ривожланмоқда

Мамлакатимизда давлатимиз раҳбари ташаббуси билан барча соҳалар сингари қишлоқ хўжалигида амалга оширилаётган туб ислоҳотлар натижасида соҳа янада ривожланмоқда. Фермерларимизнинг ислоҳотлар мазмун-моҳиятини чуқур англаб етган ҳолда соҳага кириб келаётган янги замонавий технологиялардан самарали фойдаланаётгани натижасида иш унумдорлиги ва ҳосилдорлик йил сайин ошиб бормоқда.

Амударё туманидаги “Камолов Гулмирза” фермер хўжалиги раиси Акбар Камолов қишлоқ хўжалиги соҳасидаги янги имкониятлардан самарали фойдаланиб келаётган илғор фермерлардан ҳисобланади. Акбар Камолов жорий йил жами 60 гектар майдонда пахта етиштираётган бўлиб, туманимизнинг пахта хирмонини яратишга муносиб ҳисса қўшмоқда. Фермер билан суҳбатлашар эканмиз, ер майдонларини суғоришда сув тежовчи технологияларидан фойдаланиш нафақат сув ресурсини тежашга балки сифатли ҳосил олишга, ҳосилдорликни янада оширишга хизмат қилишини ишонч билан таъкидлайди.

Акбар Камолов ҳозирда 15 гектар пахта экин майдонида томчилатиб суғориш технологиясини жорий қилган ва натижада сувнинг 25-30 фоизга тежалишига эришган. Фермер қишлоқ хўжалигида замонавий технологиялардан фойдаланишнинг аҳамияти юқори даражада эканлигини таъкидлаб, келгуси йил қолган экин майдонларига ҳам томчилатиб суғориш технологияларини ўрнатишни, шу орқали суғоришда иш унумдорлигини ошириш ҳамда сув ресурсини юқори даражада тежаш ва яхши ҳосил олишни мақсад қилган.

Мутахассислар томонидан келтирилган маълумотларга кўра, томчилатиб суғоришда сув далага эмас, ўсимликка берилади. Минерал ўғитлар сув таркибига қўшилган ҳолда тўғридан-тўғри илдизга етиб боради. Аввал 10 га яқин сувчи талаб қилинган ерни атиги бир киши суғориб чиқиши мумкин. Бу усул вақтни, маблағни тежайди ва ҳосилдорликни оширади. Томчилатиб суғориш орқали фақат илдиз тизимининг намланишига эришилади. Бундай ҳолда, сув ўсимлик томонидан керакли миқдорда тезда сўрилади ва унинг ўсиши ҳамда ривожланишига зарар етказилмайди. Сув тупроқнинг фақат ўсимлик илдиз тизими ётадиган жойларига киради, у ҳар бир ўсимлик учун бир текис ва доимий равишда зарур бўлган миқдорда етказиб берилади. Анъанавий суғориш билан солиштирганда, томчилардан фойдаланиш жараёнида тупроқнинг табиий тузилиши бузилмайди. Кучли қуёш нурлари билан ўсимликлар нобуд бўлмайди, бу томчиларнинг баргларга ҳам тушиши билан изоҳланади.

Маълумот ўрнида айтиш жоизки, Амударё туманидаги жами 850 гектар экин ер майдонларида сув тежовчи технологияларни жорий қилиш режалаштирилган бўлиб, шундан 43 та фермер хўжалигининг жами 650 гектар пахта майдонларида томчилатиб суғориш, 45 та фермер хўжаликларининг 200 гектар ғалла майдонларида ёмғирлатиб суғориш технологиясини жорий қилиш бўйича шартномалар тузилган.

Туманимизда қишлоқ хўжалиги соҳасининг янада ривожланишида янги замонавий техникаларнинг кириб келиши ҳам муҳим аҳамият касб этмоқда. Муҳтарам Президентимизнинг 2024 йилнинг 9 февраль санасида имзоланган “Қорақалпоғистон Республикасини комплекс ижтимоий-иқтисодий ривожлантириш ва аҳоли бандлигини таъминлашнинг қўшимча чора-тадбирлари тўғрисида”ги 66-сонли қарори бу борадаги ишларни янги босқичга олиб чиқишда муҳим дастуруламал бўлмоқда.

Қарор билан республикамизнинг Амударё, Беруний, Чимбой ва Қонликўл туманларида 2024 йил 1 апрелга қадар қишлоқ хўжалиги техникалари билан комплекс хизмат кўрсатувчи техника-сервис марказларини давлат-хусусий шериклик асосида ташкил этиш белгилаб берилди. Шу асосда туманимизда ташкил этилган "Amudaryo Yangi Texnika Service" масъулияти чекланган жамияти ҳам бугунги кунда соҳа ривожига муносиб ҳисса қўшиб келмоқда.

Қарор ижросини таъминлаш мақсадида мазкур жамиятга 13 дона янги замонавий техникалар харид қилиш бўйича шартномалар тузилган бўлиб, бугунги кунда жами 2 млрд. 250 млн. сўм аванс маблағлари ҳисобига 11 дона техникалар етказиб берилган. 5 дона “New Xolland T-7060” русумли юқори унумли сурим тракторлари, 5 дона замонавий айланма омочлар, 1 дона механик сеялка шулар жумласидандир. Мазкур техникалар билан туманимиздаги фермер хўжаликларига шартнома асосида хизматлар кўрсатилиб, экин майдонларидан мўл ҳосил олишга замин яратилмоқда ҳамда иш унумдорлиги ва сифати янада ошиб, юқори меҳнат самарадорлигига эришилмоқда.

Таъкидлаш жоизки, Қорақалпоғистон Республикасининг мавжуд табиий хомашё ресурсларидан самарали фойдаланиш орқали саноат, қишлоқ хўжалиги соҳаларини жадал ривожлантириш, ижтимоий ва ишлаб чиқариш инфратузилмаларини яхшилаш, тадбиркорлик ва хизматлар соҳасини қўллаб-қувватлаш, шу асосда аҳоли бандлигини таъминлаш ҳамда турмуш даражасини ошириш мақсадида имзоланган Президент қарори республикамизнинг комплекс ижтимоий-иқтисодий ривожланишида устувор аҳамият касб этмоқда.

Чарос Арслонова, туман ҳокимлигининг Ахборот хизмати раҳбари.