Ҳарбий-ватанпарварлик мусобақаларида ёшларнинг жисмоний тайёргарлиги ва ақлий салоҳияти синовдан ўтказилди

Маълумки, Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев раислигида жорий йилнинг 12 январь куни ўтказилган Хавфсизлик кенгашининг кенгайтирилган йиғилишида Мудофаа вазирлигига 1 млн нафар ёшларни оталиққа олиш ҳамда улар билан манзилли ишлаш юзасидан зарур топшириқлар берилган эди.

Дарҳақиқат, одамлар, айниқса, ёш авлоднинг қалби ва онги учун кураш кучайиб бораётган ҳозирги ўта мураккаб шароитда ҳарбий-ватанпарварлик руҳидаги тарбиянинг ўрни ва аҳамияти тобора ортиб бормоқда. Шу мақсадда мамлакатимизда ёшларни ҳарбий-ватанпарварлик руҳида тарбиялаш, навқирон авлод вакилларининг юртимиздаги ислоҳотлар жараёнидаги иштирокини ошириш, улар ўз интеллектуал ва ижодий салоҳиятини рўёбга чиқариши учун барча шароитлар яратилмоқда.

Яқинда Амударё туманининг Дўстлик маҳалласида жойлашган болалар ва ўсмирлар марказий ўйингоҳида “Биз бир бўлсак – ягона халқмиз, бирлашсак – Ватанмиз” шиори остида ўтказилган ҳарбий-ватанпарварлик мусобақалари ҳам ёш авлодни она Ватанга садоқат руҳида тарбиялашга қаратилгани билан муҳим аҳамият касб этди.

Мусобақа шартларини бажариш давомида 1-сектор ҳудудидаги овул ва маҳаллалар ёшларидан таркиб топган жамоалар ўзларининг жисмоний тайёргарликларини намойиш этишди.

Тадбирда Амударё тумани ҳокими ўринбосари Нодирбек Камолов, туман Мудофаа ишлари бўлими бошлиғи Шерзод Муродов, Миллий гвардия туман бўлими бошлиғи Бахтиёр Атажанов, Фавқулодда вазиятлар бўлими бошлиғи Зафар Аҳмедов ва бошқалар иштирок этишди.

Тадбирда сўзга чиққанлар томонидан ёш авлодни ватанпарварлик руҳида тарбиялашнинг аҳамияти, уларнинг бўш вақтини самарали ташкил этиш, ҳаётда ўз ўрнини топишларига кўмаклашиш мақсадида мамлакатимизда амалга оширилаётган чора-тадбирлар ҳақида фикр-мулоҳазалар билдирилди.

Таъкидланганидек, ҳозирги ўта таҳликали шароитда ҳар бир фарзанд Ватан ҳимоячиси бўлиши лозим. Ёшларни ватанпарварлик руҳида камол топтириш энг долзарб масалалардан ҳисобланади. Шу мақсадда навқирон авлод вакилларининг юртимиздаги ислоҳотлар жараёнидаги иштирокини ошириш, уларнинг ўз интеллектуал ва ижодий салоҳиятини рўёбга чиқариш учун бир қатор шароитлар яратилмоқда. Ҳозирги кунда Қуролли Кучларнинг замонавий инфратузилмаси негизида ва мономарказларда ёшларни ҳарбий-ватанпарварлик руҳида тарбиялаш борасидаги ишлар йўлга қўйилган.

Мусобақада жамоалар “Ҳарбийлаштирилган спорт эстафетаси”, “Арқон тортиш” ва “Заковат” интеллектуал ўйини” йўналишларида ўзаро куч синашди.

“Ҳарбийлаштирилган спорт эстафетаси” йўналишида ёшлар ҳарбий қуролларни сочиб-қайта йиғиш, махсус жанговар югуриш ва турникка тортиниш машқларини эпчиллик билан бажаришди.

Ўқотар милтиқлар армиянинг асосий қуролларидан ҳисобланади. Уни қисмларга ажратиб, тезкорлик билан қайта йиғиш жанговар маҳоратни кўрсатади. Ўқотар милтиқларнинг ҳар куни қисмларга ажратиб тозаланиши ҳарбий аскарнинг қуроли доимо соз ҳолатда бўлишига хизмат қилади.

Югуриш эса бўлғуси аскарларнинг ҳар томонлама ривожланишига замин яратади. Югуриш машқлари тезкор, чидамли, кучли бўлиш ва юқори натижалар кўрсатишда катта аҳамиятга эга. Иштирокчилар бу машқларни бажариш жараёнида ўзларининг жисмоний тайёргарликларини яна бир бора синовдан ўтказишди.

Турникка тортилиш мушакларни бақувват қилиб, тананинг тўғри шаклланишига ёрдам беради. Бу машқлар одамни чиниқишга ҳам ўргатади. Масъуллар томонидан ёшларнинг ушбу машқларни ҳам тўғри ва юқори аниқликда бажаришлари кузатиб борилди.

“Арқон тортиш” машқларида гуруҳ аъзолари ўзаро бирдамликларини намойиш этиб, рақиб жамоалардан устун чиқишга ҳаракат қилишди. Бунда ғолиб бўлиш учун жамоанинг тактик ҳамкорлиги муҳим аҳамиятга эга ҳисобланади.

Ҳарбий кадрлардан жисмоний чиниқиш билан бир қаторда тезкор фикрлаш ва юқори ақлий салоҳият ҳам талаб қилинади. Ёшларнинг маънавий савияси ва интеллектуал салоҳиятини юксалтиришда “Заковат” интеллектуал ўйинлари муҳим аҳамиятга эга ҳисобланади. Мусобақа давомида жамоалар жисмоний тайёргаликлари билан бир қаторда назарий билимлари ва ақлий салоҳиятини ҳам синовдан ўтказишди. Махсус тайёрланган саволлар ёшларнинг билимларини янада мустаҳкамлаб, мавжуд камчиликларини амалда кўрсатди.

Мусобақанинг якуний натижаларига кўра, 3-ўринга “Қиличбой” жамоаси, 2-ўринга “Бургутлар” ҳамда 1-ўринга “Ватанпарвар” жамоалари сазовор бўлишди. Ташкилотчилар томонидан ғолиб жамоалар диплом билан тақдирланди.

Шоҳзод Қурбонбоев