Harbiy-vatanparvarlik musobaqalarida yoshlarning jismoniy tayyorgarligi va aqliy salohiyati sinovdan oʻtkazildi

Maʼlumki, Oʻzbekiston Respublikasi Prezidenti, Qurolli Kuchlar Oliy Bosh Qoʻmondoni Shavkat Mirziyoyev raisligida joriy yilning 12-yanvar kuni oʻtkazilgan Xavfsizlik kengashining kengaytirilgan yigʻilishida Mudofaa vazirligiga 1 mln nafar yoshlarni otaliqqa olish hamda ular bilan manzilli ishlash yuzasidan zarur topshiriqlar berilgan edi.

Darhaqiqat, odamlar, ayniqsa, yosh avlodning qalbi va ongi uchun kurash kuchayib borayotgan hozirgi oʻta murakkab sharoitda harbiy-vatanparvarlik ruhidagi tarbiyaning oʻrni va ahamiyati tobora ortib bormoqda. Shu maqsadda mamlakatimizda yoshlarni harbiy-vatanparvarlik ruhida tarbiyalash, navqiron avlod vakillarining yurtimizdagi islohotlar jarayonidagi ishtirokini oshirish, ular oʻz intellektual va ijodiy salohiyatini roʻyobga chiqarishi uchun barcha sharoitlar yaratilmoqda.

Yaqinda Amudaryo tumanining Doʻstlik mahallasida joylashgan bolalar va oʻsmirlar markaziy oʻyingohida “Biz bir boʻlsak – yagona xalqmiz, birlashsak – Vatanmiz” shiori ostida oʻtkazilgan harbiy-vatanparvarlik musobaqalari ham yosh avlodni ona Vatanga sadoqat ruhida tarbiyalashga qaratilgani bilan muhim ahamiyat kasb etdi.

Musobaqa shartlarini bajarish davomida 1-sektor hududidagi ovul va mahallalar yoshlaridan tarkib topgan jamoalar oʻzlarining jismoniy tayyorgarliklarini namoyish etishdi.

Tadbirda Amudaryo tumani hokimi oʻrinbosari Nodirbek Kamolov, tuman Mudofaa ishlari boʻlimi boshligʻi Sherzod Murodov, Milliy gvardiya tuman boʻlimi boshligʻi Baxtiyor Atajanov, Favqulodda vaziyatlar boʻlimi boshligʻi Zafar Ahmedov va boshqalar ishtirok etishdi.

Tadbirda soʻzga chiqqanlar tomonidan yosh avlodni vatanparvarlik ruhida tarbiyalashning ahamiyati, ularning boʻsh vaqtini samarali tashkil etish, hayotda oʻz oʻrnini topishlariga koʻmaklashish maqsadida mamlakatimizda amalga oshirilayotgan chora-tadbirlar haqida fikr-mulohazalar bildirildi.

Taʼkidlanganidek, hozirgi oʻta tahlikali sharoitda har bir farzand Vatan himoyachisi boʻlishi lozim. Yoshlarni vatanparvarlik ruhida kamol toptirish eng dolzarb masalalardan hisoblanadi. Shu maqsadda navqiron avlod vakillarining yurtimizdagi islohotlar jarayonidagi ishtirokini oshirish, ularning oʻz intellektual va ijodiy salohiyatini roʻyobga chiqarish uchun bir qator sharoitlar yaratilmoqda. Hozirgi kunda Qurolli Kuchlarning zamonaviy infratuzilmasi negizida va monomarkazlarda yoshlarni harbiy-vatanparvarlik ruhida tarbiyalash borasidagi ishlar yoʻlga qoʻyilgan.

Musobaqada jamoalar “Harbiylashtirilgan sport estafetasi”, “Arqon tortish” va “Zakovat” intellektual oʻyini” yoʻnalishlarida oʻzaro kuch sinashdi.

“Harbiylashtirilgan sport estafetasi” yoʻnalishida yoshlar harbiy qurollarni sochib-qayta yigʻish, maxsus jangovar yugurish va turnikka tortinish mashqlarini epchillik bilan bajarishdi.

Oʻqotar miltiqlar armiyaning asosiy qurollaridan hisoblanadi. Uni qismlarga ajratib, tezkorlik bilan qayta yigʻish jangovar mahoratni koʻrsatadi. Oʻqotar miltiqlarning har kuni qismlarga ajratib tozalanishi harbiy askarning quroli doimo soz holatda boʻlishiga xizmat qiladi.

Yugurish esa boʻlgʻusi askarlarning har tomonlama rivojlanishiga zamin yaratadi. Yugurish mashqlari tezkor, chidamli, kuchli boʻlish va yuqori natijalar koʻrsatishda katta ahamiyatga ega. Ishtirokchilar bu mashqlarni bajarish jarayonida oʻzlarining jismoniy tayyorgarliklarini yana bir bora sinovdan oʻtkazishdi.

Turnikka tortilish mushaklarni baquvvat qilib, tananing toʻgʻri shakllanishiga yordam beradi. Bu mashqlar odamni chiniqishga ham oʻrgatadi. Masʼullar tomonidan yoshlarning ushbu mashqlarni ham toʻgʻri va yuqori aniqlikda bajarishlari kuzatib borildi.

“Arqon tortish” mashqlarida guruh aʼzolari oʻzaro birdamliklarini namoyish etib, raqib jamoalardan ustun chiqishga harakat qilishdi. Bunda gʻolib boʻlish uchun jamoaning taktik hamkorligi muhim ahamiyatga ega hisoblanadi.

Harbiy kadrlardan jismoniy chiniqish bilan bir qatorda tezkor fikrlash va yuqori aqliy salohiyat ham talab qilinadi. Yoshlarning maʼnaviy saviyasi va intellektual salohiyatini yuksaltirishda “Zakovat” intellektual oʻyinlari muhim ahamiyatga ega hisoblanadi. Musobaqa davomida jamoalar jismoniy tayyorgaliklari bilan bir qatorda nazariy bilimlari va aqliy salohiyatini ham sinovdan oʻtkazishdi. Maxsus tayyorlangan savollar yoshlarning bilimlarini yanada mustahkamlab, mavjud kamchiliklarini amalda koʻrsatdi.

Musobaqaning yakuniy natijalariga koʻra, 3-oʻringa “Qilichboy” jamoasi, 2-oʻringa “Burgutlar” hamda 1-oʻringa “Vatanparvar” jamoalari sazovor boʻlishdi. Tashkilotchilar tomonidan gʻolib jamoalar diplom bilan taqdirlandi.

Shohzod Qurbonboyev