Ҳайдовчиларнинг маст ҳолда транспорт воситаларини бошқаришга йўл қўймаслик мақсадида рейд тадбирлари ташкил этилди
Бугунги кунда юртимиз шаҳар, туман ва қишлоқларида транспорт воситаларининг кундан кунга ортиб бориши ва йўл ҳаракати қоидаларига тўлиқ амал қилинмаслиги оқибатида турли хил йўл-транспорт ҳодисалари келиб чиқмоқда. Бу каби нохуш ҳодисаларининг олдини олиш бўйича кўпгина ишлар амалга оширилиб, мутахассислар томонидан бир қатор таклифлар билдирилмоқда. Тезликни пасайтириш, пиёдалар майдонларини кенгайтириш, жамоат транспортини ривожлантириш ва йўллар сифатини ошириш шулар жумласидандир.
Амударё тумани ҳудудидаги автотранспорт йўлларида ҳаракат хавфсизлигини таъминлаш, кўнгилсиз ҳодисалар содир этилишининг олдини олиш мақсадида дам олиш кунлари, яъни ҳафтанинг шанба ва якшанба кунлари йўл-патруль хизмати ходимлари томонидан мунтазам равишда рейд тадбирлари ўтказиб келинмоқда. Шундай тадбирлардан навбатдагиси туман марказидаги ҳамда Қипчоқ шаҳарчаси ҳудудидан ўтувчи асосий йўлларда ҳам ташкил этилди.
Рейдда туман Ички ишлар бўлими йўл-патруль хизмати бўлинмасининг ходимлари иштирок этишди ва тадбир давомида ҳуқуқбузарлик содир этган шахсларга нисбатан тегишли тартибда чоралар кўрилди. Жумладан, автотранспорт воситасини маст ҳолатда бошқарганликда гумон қилинган фуқаролар белгиланган тартибда тиббий текширувдан ўтказилди ва уларга нисбатан маъмурий баённомалар расмийлаштирилди.
Таъкидлаш жоизки, ҳафтанинг шанба ва якшанба кунлари аҳоли дам олиш масканлари ва умумий овқатланиш шохобчаларида спиртли ичимликлар истеъмол қилиб, ҳайдовчилар томонидан маст ҳолда автотранспорт воситаларини бошқариш ҳолатлари кўп кузатилмоқда. Ўтказилаётган рейд тадбирлари маст ҳолдаги ҳайдовчилар томонидан транспорт воситаларини бошқаришга йўл қўймаслик, кўнгилсиз ҳодисаларнинг олдини олишга қаратилганлиги билан аҳамиятли ҳисобланади.
Маълумотларга кўра, республика ҳудудида йилига ўртача 9-10 минг йўл-транспорт ҳодисалари содир бўлиши оқибатида 2 мингдан ортиқ фуқаролар ҳалок бўлмоқда. Мавжуд кўнгилсиз ҳодисаларнинг олдини олиш мақсадида йўл ҳаракати хавфсизлигини таъминлаш, автотранспорт бошқариш ва автомобиль ҳаракати йўлларида пиёдалар маданиятини оширишга доир тушунтириш-тарғибот тадбирлари янада кучайтирилмоқда.
Бугунги кунда йўл-транспорт ҳодисалари кўпроқ ҳаракат тезлигини ошириш, хавфсизлик камарини тақмаслик, маст ҳолда транспорт воситасини бошқариш, ҳаракат вақтида телефондан фойдаланиш оқибатида содир этилганаётгани аниқланган. Ушбу элементар йўл ҳаракати қоидаларига риоя қилиш орқали йўл-транспорт ҳодисалари сонини кескин камайтиришга эришиш мумкин.
Рейд тадбири давомида инспекторлар томонидан тегишли ҳужжатларсиз транспорт воситасини бошқарган, йўловчи ташиш қоидаларини бузган, ҳужжатлари носоз бўлган ҳамда бошқа турдаги қоидабузарликларга йўл қўйган ҳайдовчиларга нисбатан тегишли чоралар кўрилди. Шунингдек, йўловчи ва енгил турдаги юк ташувчи транспорт воситалари кўздан кечирилиб, автотураргоҳ ва йўллардаги ҳаракат вақтида пиёдаларга нисбатан ҳушёрликни ошириш юзасидан профилактик суҳбатлар ўтказилди.
Йўл ҳаракати қоидаларига амал қилмаслик ва пиёдаларнинг тасодифий хатти-ҳаракатлари, афсуски, ўлим ва жиддий жароҳатларга олиб келяпти. Айниқса, маст ҳолатда транспорт воситаларини бошқариш оқибати аянчли якун топиши мумкин. Кўнгилсиз ҳолатларнинг олдини олиш учун ҳар бир ҳайдовчи ва йўловчи ҳаракат вақтида белгиланган хавфсизлик қоидаларига тўла амал қилиши лозим.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
