Haydovchilarning mast holda transport vositalarini boshqarishga yoʻl qoʻymaslik maqsadida reyd tadbirlari tashkil etildi
Bugungi kunda yurtimiz shahar, tuman va qishloqlarida transport vositalarining kundan kunga ortib borishi va yoʻl harakati qoidalariga toʻliq amal qilinmasligi oqibatida turli xil yoʻl-transport hodisalari kelib chiqmoqda. Bu kabi noxush hodisalarining oldini olish boʻyicha koʻpgina ishlar amalga oshirilib, mutaxassislar tomonidan bir qator takliflar bildirilmoqda. Tezlikni pasaytirish, piyodalar maydonlarini kengaytirish, jamoat transportini rivojlantirish va yoʻllar sifatini oshirish shular jumlasidandir.
Amudaryo tumani hududidagi avtotransport yoʻllarida harakat xavfsizligini taʼminlash, koʻngilsiz hodisalar sodir etilishining oldini olish maqsadida dam olish kunlari, yaʼni haftaning shanba va yakshanba kunlari yoʻl-patrul xizmati xodimlari tomonidan muntazam ravishda reyd tadbirlari oʻtkazib kelinmoqda. Shunday tadbirlardan navbatdagisi tuman markazidagi hamda Qipchoq shaharchasi hududidan oʻtuvchi asosiy yoʻllarda ham tashkil etildi.
Reydda tuman Ichki ishlar boʻlimi yoʻl-patrul xizmati boʻlinmasining xodimlari ishtirok etishdi va tadbir davomida huquqbuzarlik sodir etgan shaxslarga nisbatan tegishli tartibda choralar koʻrildi. Jumladan, avtotransport vositasini mast holatda boshqarganlikda gumon qilingan fuqarolar belgilangan tartibda tibbiy tekshiruvdan oʻtkazildi va ularga nisbatan maʼmuriy bayonnomalar rasmiylashtirildi.
Taʼkidlash joizki, haftaning shanba va yakshanba kunlari aholi dam olish maskanlari va umumiy ovqatlanish shoxobchalarida spirtli ichimliklar isteʼmol qilib, haydovchilar tomonidan mast holda avtotransport vositalarini boshqarish holatlari koʻp kuzatilmoqda. Oʻtkazilayotgan reyd tadbirlari mast holdagi haydovchilar tomonidan transport vositalarini boshqarishga yoʻl qoʻymaslik, koʻngilsiz hodisalarning oldini olishga qaratilganligi bilan ahamiyatli hisoblanadi.
Maʼlumotlarga koʻra, respublika hududida yiliga oʻrtacha 9-10 ming yoʻl-transport hodisalari sodir boʻlishi oqibatida 2 mingdan ortiq fuqarolar halok boʻlmoqda. Mavjud koʻngilsiz hodisalarning oldini olish maqsadida yoʻl harakati xavfsizligini taʼminlash, avtotransport boshqarish va avtomobil harakati yoʻllarida piyodalar madaniyatini oshirishga doir tushuntirish-targʻibot tadbirlari yanada kuchaytirilmoqda.
Bugungi kunda yoʻl-transport hodisalari koʻproq harakat tezligini oshirish, xavfsizlik kamarini taqmaslik, mast holda transport vositasini boshqarish, harakat vaqtida telefondan foydalanish oqibatida sodir etilganayotgani aniqlangan. Ushbu elementar yoʻl harakati qoidalariga rioya qilish orqali yoʻl-transport hodisalari sonini keskin kamaytirishga erishish mumkin.
Reyd tadbiri davomida inspektorlar tomonidan tegishli hujjatlarsiz transport vositasini boshqargan, yoʻlovchi tashish qoidalarini buzgan, hujjatlari nosoz boʻlgan hamda boshqa turdagi qoidabuzarliklarga yoʻl qoʻygan haydovchilarga nisbatan tegishli choralar koʻrildi. Shuningdek, yoʻlovchi va yengil turdagi yuk tashuvchi transport vositalari koʻzdan kechirilib, avtoturargoh va yoʻllardagi harakat vaqtida piyodalarga nisbatan hushyorlikni oshirish yuzasidan profilaktik suhbatlar oʻtkazildi.
Yoʻl harakati qoidalariga amal qilmaslik va piyodalarning tasodifiy xatti-harakatlari, afsuski, oʻlim va jiddiy jarohatlarga olib kelyapti. Ayniqsa, mast holatda transport vositalarini boshqarish oqibati ayanchli yakun topishi mumkin. Koʻngilsiz holatlarning oldini olish uchun har bir haydovchi va yoʻlovchi harakat vaqtida belgilangan xavfsizlik qoidalariga toʻla amal qilishi lozim.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
