Йўл ҳаракати хавфсизлиги билан боғлиқ бўлган жиноятларни содир этган шахсларга нисбатан суд ҳукми ўқилди
Мамлакатимизда сўнгги йилларда барча соҳалар қатори суд-ҳуқуқ соҳасида кескин ижобий ўзгаришлар рўй берди. Мазкур ислоҳотларнинг олий мақсади – суд тизимини босқичма-босқич демократлаштириш, инсон ҳуқуқ ва эркинликларини ишончли ҳимоя қиладиган суд ҳокимиятининг ҳақиқий мустақиллигига эришишдир.
Судьялар томонидан ишларни кўришнинг очиқлиги, шаффофлигини таъминлаш, қабул қилинаётган қарорларининг қонуний ва адолатли бўлишига эришиш ҳамда мазкур ишларни амалга оширишда кенг аҳоли вакилларини жалб этиш орқали одил судловга бўлган ишончни мустаҳкамлаш борасида қатор ижобий ишлар амалга оширилмоқда. Айниқса, судлар томонидан ишларнинг кенг аҳоли вакиллари иштирокида кўрилиши одамларда ҳуқуқий маданиятни оширишга хизмат қилмоқда.
2024 йилнинг 8 август куни жиноят ишлари бўйича Шўманай тумани суди томонидан Ўзбекистон Маҳаллалар уюшмаси Амударё тумани бўлими биносида очиқ ва сайёр суд мажлиси ўтказилди.
Жиноят ишлари бўйича Шўманай тумани суди раиси Расул Назаров иштирокида ўтказилган сайёр ва очиқ судда йўл ҳаракати хавфсизлиги билан боғлиқ бўлган жиноят ишлари кўриб чиқилди.
Маълумот ўрнида айтиш жоизки, жорий йилнинг ўтган 6 ойи давомида фуқаролар томонидан йўл ҳаракати хавфсизлиги билан боғлиқ 22тa жиноят содир этилган. Ушбу мудҳиш ҳодисалар оқибатида, афсуски, 8 нафар шахс ҳаётдан бевақт кўз юмган. Шунингдек, 17 нафар фуқаро турли хил даражадаги тан жароҳатлари олган.
Мазкур тоифадаги жиноятларнинг 4таси “Ғузор-Бухоро-Нукус-Бейнеу” А380 автомагистралида, 4таси “Қипчоқ-Манғит-Туркманистон чегара йўли” давлат аҳамиятидаги автойўлида, 5таси “Урганч-Манғит-Туркманистон чегара йўли” автойўлида ҳамда 9 таси маҳаллий ички йўлларда содир этилган.
Юқорида қайд этиб ўтилган жиноятларнинг 6таси тезликни ошириш, 1таси йўналишни ўзгартириш, 5таси маст ҳолда транспорт воситасини бошқариш, 2таси қувиб ўтиш қоидаларини бузиш, 1таси ҳайдовчининг чарчаши, 2таси имтиёзга эга транспорт воситасини ўтказмаслик, қолган 5таси эса бошқа қоидабузарликлар оқибатида содир этилгани аниқланган.
Афсуски, бугун қонунларни менсимай, одамлар ҳаётига хавф солган ҳолда йўл ҳаракати қоидаларини бузиб ҳаракатланиш ҳолатлари кўпаймоқда. Оқибатда барчамиз йўлларда автомобилларга “хавф манбаи” сифатида қарашга мажбур бўляпмиз.
Ҳар ким йўлда хавфсиз ҳаракат қилишни хоҳлайди ва шунинг учун йўл ҳаракати қоидалари жорий этилган. Шуни унутмайликки, ҳар биримиз пиёда, йўловчи ёки ҳайдовчи сифатида йўлларда ҳаракатланиш маданиятини ўзимизда шакллантиришимиз ва йўл ҳаракати қоидаларига тўла амал қилишимиз лозим.
Йўл ҳаракати ҳавфсизлиги билан боғлиқ бўлган жиноятларни ушбу очиқ ва сайёр судда кўриб чиқишдан мақсад – ҳуқуқбузарликлар учун жазо муқаррарлигини таъминлаш ва келгусида содир этилиши мумкин бўлган салбий оқибатларнинг олдини олиш ҳисобланади.
Ўзбекистон Маҳаллалар уюшмаси Амударё тумани бўлими биносида ўтказилган суд мажлиси якунида жиноят ишлари бўйича Шўманай тумани суди раиси Расул Назаров томонидан йўл ҳаракати хавфсизлиги билан боғлиқ бўлган жиноятларни содир этган фуқароларга нисбатан суд ҳукми ўқилди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
