Yoʻl harakati xavfsizligi bilan bogʻliq boʻlgan jinoyatlarni sodir etgan shaxslarga nisbatan sud hukmi oʻqildi
Mamlakatimizda soʻnggi yillarda barcha sohalar qatori sud-huquq sohasida keskin ijobiy oʻzgarishlar roʻy berdi. Mazkur islohotlarning oliy maqsadi – sud tizimini bosqichma-bosqich demokratlashtirish, inson huquq va erkinliklarini ishonchli himoya qiladigan sud hokimiyatining haqiqiy mustaqilligiga erishishdir.
Sudyalar tomonidan ishlarni koʻrishning ochiqligi, shaffofligini taʼminlash, qabul qilinayotgan qarorlarining qonuniy va adolatli boʻlishiga erishish hamda mazkur ishlarni amalga oshirishda keng aholi vakillarini jalb etish orqali odil sudlovga boʻlgan ishonchni mustahkamlash borasida qator ijobiy ishlar amalga oshirilmoqda. Ayniqsa, sudlar tomonidan ishlarning keng aholi vakillari ishtirokida koʻrilishi odamlarda huquqiy madaniyatni oshirishga xizmat qilmoqda.
2024-yilning 8-avgust kuni jinoyat ishlari boʻyicha Shoʻmanay tumani sudi tomonidan Oʻzbekiston Mahallalar uyushmasi Amudaryo tumani boʻlimi binosida ochiq va sayyor sud majlisi oʻtkazildi.
Jinoyat ishlari boʻyicha Shoʻmanay tumani sudi raisi Rasul Nazarov ishtirokida oʻtkazilgan sayyor va ochiq sudda yoʻl harakati xavfsizligi bilan bogʻliq boʻlgan jinoyat ishlari koʻrib chiqildi.
Maʼlumot oʻrnida aytish joizki, joriy yilning oʻtgan 6 oyi davomida fuqarolar tomonidan yoʻl harakati xavfsizligi bilan bogʻliq 22ta jinoyat sodir etilgan. Ushbu mudhish hodisalar oqibatida, afsuski, 8 nafar shaxs hayotdan bevaqt koʻz yumgan. Shuningdek, 17 nafar fuqaro turli xil darajadagi tan jarohatlari olgan.
Mazkur toifadagi jinoyatlarning 4tasi “Gʻuzor-Buxoro-Nukus-Beyneu” A380 avtomagistralida, 4tasi “Qipchoq-Mangʻit-Turkmaniston chegara yoʻli” davlat ahamiyatidagi avtoyoʻlida, 5tasi “Urganch-Mangʻit-Turkmaniston chegara yoʻli” avtoyoʻlida hamda 9 tasi mahalliy ichki yoʻllarda sodir etilgan.
Yuqorida qayd etib oʻtilgan jinoyatlarning 6tasi tezlikni oshirish, 1tasi yoʻnalishni oʻzgartirish, 5tasi mast holda transport vositasini boshqarish, 2tasi quvib oʻtish qoidalarini buzish, 1tasi haydovchining charchashi, 2tasi imtiyozga ega transport vositasini oʻtkazmaslik, qolgan 5tasi esa boshqa qoidabuzarliklar oqibatida sodir etilgani aniqlangan.
Afsuski, bugun qonunlarni mensimay, odamlar hayotiga xavf solgan holda yoʻl harakati qoidalarini buzib harakatlanish holatlari koʻpaymoqda. Oqibatda barchamiz yoʻllarda avtomobillarga “xavf manbai” sifatida qarashga majbur boʻlyapmiz.
Har kim yoʻlda xavfsiz harakat qilishni xohlaydi va shuning uchun yoʻl harakati qoidalari joriy etilgan. Shuni unutmaylikki, har birimiz piyoda, yoʻlovchi yoki haydovchi sifatida yoʻllarda harakatlanish madaniyatini oʻzimizda shakllantirishimiz va yoʻl harakati qoidalariga toʻla amal qilishimiz lozim.
Yoʻl harakati havfsizligi bilan bogʻliq boʻlgan jinoyatlarni ushbu ochiq va sayyor sudda koʻrib chiqishdan maqsad – huquqbuzarliklar uchun jazo muqarrarligini taʼminlash va kelgusida sodir etilishi mumkin boʻlgan salbiy oqibatlarning oldini olish hisoblanadi.
Oʻzbekiston Mahallalar uyushmasi Amudaryo tumani boʻlimi binosida oʻtkazilgan sud majlisi yakunida jinoyat ishlari boʻyicha Shoʻmanay tumani sudi raisi Rasul Nazarov tomonidan yoʻl harakati xavfsizligi bilan bogʻliq boʻlgan jinoyatlarni sodir etgan fuqarolarga nisbatan sud hukmi oʻqildi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
