АМУДАРЁ ТУМАНИДА МУСТАҚИЛЛИК БАЙРАМИ ТАНТАНАЛИ ТАРЗДА НИШОНЛАНДИ

Халқимиз севиб нишонлайдиган байрамлар кўп. Ҳар бири ўзининг анъанавийлиги, кўп миллатли ватандошларимизнинг орзу-интилишларига ҳамоҳанглиги билан ҳаётимизга ўзига хос файз-тароват бағишлайди. Лекин Мустақиллик байрамининг файзи ҳам, таровати ҳам бошқача: тантанали байрам оқшомларида санъаткорларимиз томонидан ижро этиладиган куй-қўшиқлар жарангидаги, бошдан-оёқ безанган шаҳар-у қишлоқлар қиёфасидаги ажиб жилвалар ҳам ўзгача! Боиси, бу айёмда Она Юрт қадри, ТИНЧЛИК, ТОТУВЛИК, ДЎСТЛИК, ЭРК ва ОЗОДЛИК туйғулари янада улуғланади. Ватанпарварлик, миллатлараро тотувлик, Истиқлол неъматларидан баҳраманд Янги Ўзбекистоннинг навқирон авлодлари мадҳ этилиб, ЭРК ва ОЗОДЛИК учун жон фидо қилган аждодлар – жадид боболар хотирланади.

Президентимизнинг 2024 йил 18 июлдаги “Ўзбекистон Республикаси давлат Мустақиллигининг ўттиз уч йиллик байрамига тайёргарлик кўриш ва уни ўтказиш тўғрисида”ги Қарори ҳам барча соҳаларда тобора юксак тараққиёт сари дадил одимлаётган Янги Ўзбекистондаги янгиланишлар, халқимиз ҳаётида рўй бераётган ўзгаришлар, Президентимиз таъбири билан айтганда “Мустақил Ватанимизнинг тоза қон томирлари” бўлган ёшлар эришаётган катта муваффақиятларни, жадид боболаримизнинг эзгу орзуларини амалга ошириш борасидаги фидойиликларини ўзида мужассам этган тантанали байрам тадбирларини ташкиллаштириш ва унда кенг халқ оммасининг иштирокини таъминлашга асосий эътибор қаратиш зарурлиги таъкидланган.

Азалдан юқоридан бирон бир кўрсатма кутишга одатланмаган амударёликлар бу йил ҳам Мустақилликнинг ўттиз уч йиллик айёми тантаналарини барвақт бошлаб юбордилар. Август ойининг илк кунлариданоқ қишлоқ ва маҳаллаларда катта тантаналар билан бошланган байрамона тадбирлар 29 август куни Амударё тумани Болалар ва ўсмирлар спорт мактабига қарашли ўйингоҳда жўшқинлик билан давом этди.

Туман Маданият бўлими томонидан тайёрланган, “Бир бўлсак — ягона халқмиз, бирлашсак — Ватанмиз!” эзгу шиорини ўзида мужассам этган олти бўлимдан иборат театрлаштирилган байрам тадбирининг бутун мазмун-моҳиятида халқимизнинг асрлар бўйи шаклланган умрибоқий қадриятлари, Истиқлол берган улуғвор имкониятлар ўз ифодасини топгани билан қалбларда гўзал таассуротлар уйғотди. Байрам тантаналарида кўп миллатли халқимизнинг жипслиги, бирдамлиги ва мустақиллик ғояларига содиқлиги яна бир бор намоён бўлди.

“Мустақил Ватанда эл азиз, инсон азиз!” “2024 йил – ёшлар ва бизнесни қўллаб-қувватлаш йили”, “Бир бўлсак – ягона халқмиз, бирлашсак – Ватанмиз!” каби шиорлар билан безатилган йўл-у йўлаклар, амударёлик миришкор деҳқонлар, қўли гул ҳунармандлар-у тадбиркорлар меҳнатларининг самаралари, илмда, спорт ва санъатда иқтидорли ёшлар эришаётган ютуқлар акс эттирилган кўргазмалар кўзларни қувонтирди. Назаримда ҳар дилда Ватанга меҳр, тинчлик ва аҳилликдан шукроналик туйғулари ҳоким бу лаҳзалардан кўнгиллар янада тозарди.

Ватан, мунча ширин нон-у тузларинг,

Оҳанрабоси бор дала-тузларинг.

Дунёга юз тутган ўғил-қизларинг

Туғингни бошида тутганда, жаҳон

Кўрди! Ҳар юракда бир Ўзбекистон!

Байрам тадбирининг мезбони ҳам, меҳмонлари ҳам аҳил ва иноқ, эт билан тирноқ каби тақдирлари бир-бирларига туташ ўзбек, қорақалпоқ, қозоқ, туркман, қирғиз, тожик, рус, татар, бошқирд, корейс, украин каби халқлар вакиллари бўлдилар ва барчалари “Бир бўлсак – ягона халқмиз, бирлашсак – Ватанмиз!” эзгу шиори остида янада жипслашдилар. Чунки “Инсон қадри улуғланган Янги Ўзбекистон!” шиори билан бошланган байрам тадбирининг илк лаҳзалариданоқ Амударё тумани ҳокими С.Хўжаметовнинг азиз халқига йўллаган байрам табриги ҳар бир инсон қалбида ўзи туғилиб ўсган муқаддас заминга нисбатан чексиз меҳр-муҳаббат, ифтихор туйғусини уйғотди.

Туман ҳокими С.Хўжаметов амалга оширилаётган катта муваффақиятлар, амударёликлар ҳаётидаги ижобий ўзгаришлар ва янгиланишлар давлатимиз раҳбарининг одилона сиёсати, халқ закоси, миллатлар дўстлигининг ҳаётий ифодаси эканлигини чин дилдан эътироф этиб, Аму халқига хос бўлган минг йиллик қадриятлар бардавомлигини тилади.

Байрам тадбирига майдон узра янграган “Янги Ўзбекистонда эл азиз, инсон азиз!” шиори янада жўшқинлик бахш этди. Амударёлик санъаткорлар томонидан тайёрланган театрлаштирилган адабий-мусиқий дастур байрам иштирокчилари томонидан олқишлар билан кутиб олинди. Айниқса, жадид боболар, қатағон қурбонлари ҳақидаги саҳна кўринишлари бугунги дориломон кунлар халқимизга осонликча келмаганини, мустақиллик, эрк ва озодлик учун курашларда қурбон бўлган улуғ аждодларимиз хотираси олдида қарздорлик ҳисси билан яшашга бурчли эканлигимизни англатиб, тарихий хотиралар келажак пойдеворини мукаммал барпо этишга даъваткор куч бўлажагини ҳар бир қалбда муствҳкам муҳрлади гўё.

Тадбирга ёш ва иқтидорли санъаткорларнинг, “Баркамол авлод” болалар мактаби жажжи болажонларининг чиқишлари, “Ўзбекистон – ягона уйимиз!” шиори остидаги санъаткорларнинг жўшқин куй-қўшиқлари, дилрабо рақслари янада файз ва тароват бағишлади.

Назаримда, амударёликлар мустақилликдек бебаҳо, олий неъматнинг қадр-қимматини янада теранроқ ҳис этиб, байрам баҳона бир-бирлари ила дийдорлашган қозоқ, қорақалпоқ, туркман-у қирғиз, тожик, бошқирд, татар, рус ва украин каби миллатлар Ўзбекистон ичра аҳил ва тотув бир оила бўлиб яшаётганларидан мамнун, бир-бирларига, Аму элига хуш кайфият улашдилар. Зотан,

Ягона халқ бўлиб бирлашган миллат,

Тотувлик қалбларда энг олий неъмат.

Сиёсатда ўктам, собит мамлакат –

Истиқбол уфқлари порлоқ, чароғон,

Имконлари улуғ, бағри кенг ошён!

Кўнгиллар бирлашган азал-у азал,

Меҳр гули унган минг йиллар аввал.

Бир юз қирқ миллатнинг эрки мукаммал

Қомусий шарҳ ила яққол намоён –

Унда қадр топган Ҳазрати инсон!

Тонгги саболардан кўнгиллар хуррам,

Ҳар битта гўшада тантана, байрам.

Зироатга тўла далалари ҳам

Шунчалар ободон, шунчалар кўркам,

Бахтга ёр тақдирим – ёруғ пешонам!

Тотувлик базмига, қаранг, жамлашган

Миллатлар, элатлар аҳил, сирлашган.

Аслида барчаси маънан бирлашган –

Ўзбекистон маним ягонам – онам –

Удир Шарқ гавҳари – олтин остонам!

Робия Йўлдошева.