AMUDARYo TUMANIDA MUSTAQILLIK BAYRAMI TANTANALI TARZDA NIShONLANDI

Xalqimiz sevib nishonlaydigan bayramlar koʻp. Har biri oʻzining anʼanaviyligi, koʻp millatli vatandoshlarimizning orzu-intilishlariga hamohangligi bilan hayotimizga oʻziga xos fayz-tarovat bagʻishlaydi. Lekin Mustaqillik bayramining fayzi ham, tarovati ham boshqacha: tantanali bayram oqshomlarida sanʼatkorlarimiz tomonidan ijro etiladigan kuy-qoʻshiqlar jarangidagi, boshdan-oyoq bezangan shahar-u qishloqlar qiyofasidagi ajib jilvalar ham oʻzgacha! Boisi, bu ayyomda Ona Yurt qadri, TINChLIK, TOTUVLIK, DOʻSTLIK, ERK va OZODLIK tuygʻulari yanada ulugʻlanadi. Vatanparvarlik, millatlararo totuvlik, Istiqlol neʼmatlaridan bahramand Yangi Oʻzbekistonning navqiron avlodlari madh etilib, ERK va OZODLIK uchun jon fido qilgan ajdodlar – jadid bobolar xotirlanadi.

Prezidentimizning 2024-yil 18-iyuldagi “Oʻzbekiston Respublikasi davlat Mustaqilligining oʻttiz uch yillik bayramiga tayyorgarlik koʻrish va uni oʻtkazish toʻgʻrisida”gi Qarori ham barcha sohalarda tobora yuksak taraqqiyot sari dadil odimlayotgan Yangi Oʻzbekistondagi yangilanishlar, xalqimiz hayotida roʻy berayotgan oʻzgarishlar, Prezidentimiz taʼbiri bilan aytganda “Mustaqil Vatanimizning toza qon tomirlari” boʻlgan yoshlar erishayotgan katta muvaffaqiyatlarni, jadid bobolarimizning ezgu orzularini amalga oshirish borasidagi fidoyiliklarini oʻzida mujassam etgan tantanali bayram tadbirlarini tashkillashtirish va unda keng xalq ommasining ishtirokini taʼminlashga asosiy eʼtibor qaratish zarurligi taʼkidlangan.

Azaldan yuqoridan biron bir koʻrsatma kutishga odatlanmagan amudaryoliklar bu yil ham Mustaqillikning oʻttiz uch yillik ayyomi tantanalarini barvaqt boshlab yubordilar. Avgust oyining ilk kunlaridanoq qishloq va mahallalarda katta tantanalar bilan boshlangan bayramona tadbirlar 29-avgust kuni Amudaryo tumani Bolalar va oʻsmirlar sport maktabiga qarashli oʻyingohda joʻshqinlik bilan davom etdi.

Tuman Madaniyat boʻlimi tomonidan tayyorlangan, “Bir boʻlsak — yagona xalqmiz, birlashsak — Vatanmiz!” ezgu shiorini oʻzida mujassam etgan olti boʻlimdan iborat teatrlashtirilgan bayram tadbirining butun mazmun-mohiyatida xalqimizning asrlar boʻyi shakllangan umriboqiy qadriyatlari, Istiqlol bergan ulugʻvor imkoniyatlar oʻz ifodasini topgani bilan qalblarda goʻzal taassurotlar uygʻotdi. Bayram tantanalarida koʻp millatli xalqimizning jipsligi, birdamligi va mustaqillik gʻoyalariga sodiqligi yana bir bor namoyon boʻldi.

“Mustaqil Vatanda el aziz, inson aziz!” “2024-yil – yoshlar va biznesni qoʻllab-quvvatlash yili”, “Bir boʻlsak – yagona xalqmiz, birlashsak – Vatanmiz!” kabi shiorlar bilan bezatilgan yoʻl-u yoʻlaklar, amudaryolik mirishkor dehqonlar, qoʻli gul hunarmandlar-u tadbirkorlar mehnatlarining samaralari, ilmda, sport va sanʼatda iqtidorli yoshlar erishayotgan yutuqlar aks ettirilgan koʻrgazmalar koʻzlarni quvontirdi. Nazarimda har dilda Vatanga mehr, tinchlik va ahillikdan shukronalik tuygʻulari hokim bu lahzalardan koʻngillar yanada tozardi.

Vatan, muncha shirin non-u tuzlaring,

Ohanrabosi bor dala-tuzlaring.

Dunyoga yuz tutgan oʻgʻil-qizlaring

Tugʻingni boshida tutganda, jahon

Koʻrdi! Har yurakda bir Oʻzbekiston!

Bayram tadbirining mezboni ham, mehmonlari ham ahil va inoq, et bilan tirnoq kabi taqdirlari bir-birlariga tutash oʻzbek, qoraqalpoq, qozoq, turkman, qirgʻiz, tojik, rus, tatar, boshqird, koreys, ukrain kabi xalqlar vakillari boʻldilar va barchalari “Bir boʻlsak – yagona xalqmiz, birlashsak – Vatanmiz!” ezgu shiori ostida yanada jipslashdilar. Chunki “Inson qadri ulugʻlangan Yangi Oʻzbekiston!” shiori bilan boshlangan bayram tadbirining ilk lahzalaridanoq Amudaryo tumani hokimi S.Xoʻjametovning aziz xalqiga yoʻllagan bayram tabrigi har bir inson qalbida oʻzi tugʻilib oʻsgan muqaddas zaminga nisbatan cheksiz mehr-muhabbat, iftixor tuygʻusini uygʻotdi.

Tuman hokimi S.Xoʻjametov amalga oshirilayotgan katta muvaffaqiyatlar, amudaryoliklar hayotidagi ijobiy oʻzgarishlar va yangilanishlar davlatimiz rahbarining odilona siyosati, xalq zakosi, millatlar doʻstligining hayotiy ifodasi ekanligini chin dildan eʼtirof etib, Amu xalqiga xos boʻlgan ming yillik qadriyatlar bardavomligini tiladi.

Bayram tadbiriga maydon uzra yangragan “Yangi Oʻzbekistonda el aziz, inson aziz!” shiori yanada joʻshqinlik baxsh etdi. Amudaryolik sanʼatkorlar tomonidan tayyorlangan teatrlashtirilgan adabiy-musiqiy dastur bayram ishtirokchilari tomonidan olqishlar bilan kutib olindi. Ayniqsa, jadid bobolar, qatagʻon qurbonlari haqidagi sahna koʻrinishlari bugungi dorilomon kunlar xalqimizga osonlikcha kelmaganini, mustaqillik, erk va ozodlik uchun kurashlarda qurbon boʻlgan ulugʻ ajdodlarimiz xotirasi oldida qarzdorlik hissi bilan yashashga burchli ekanligimizni anglatib, tarixiy xotiralar kelajak poydevorini mukammal barpo etishga daʼvatkor kuch boʻlajagini har bir qalbda mustvhkam muhrladi goʻyo.

Tadbirga yosh va iqtidorli sanʼatkorlarning, “Barkamol avlod” bolalar maktabi jajji bolajonlarining chiqishlari, “Oʻzbekiston – yagona uyimiz!” shiori ostidagi sanʼatkorlarning joʻshqin kuy-qoʻshiqlari, dilrabo raqslari yanada fayz va tarovat bagʻishladi.

Nazarimda, amudaryoliklar mustaqillikdek bebaho, oliy neʼmatning qadr-qimmatini yanada teranroq his etib, bayram bahona bir-birlari ila diydorlashgan qozoq, qoraqalpoq, turkman-u qirgʻiz, tojik, boshqird, tatar, rus va ukrain kabi millatlar Oʻzbekiston ichra ahil va totuv bir oila boʻlib yashayotganlaridan mamnun, bir-birlariga, Amu eliga xush kayfiyat ulashdilar. Zotan,

Yagona xalq boʻlib birlashgan millat,

Totuvlik qalblarda eng oliy neʼmat.

Siyosatda oʻktam, sobit mamlakat –

Istiqbol ufqlari porloq, charogʻon,

Imkonlari ulugʻ, bagʻri keng oshyon!

Koʻngillar birlashgan azal-u azal,

Mehr guli ungan ming yillar avval.

Bir yuz qirq millatning erki mukammal

Qomusiy sharh ila yaqqol namoyon –

Unda qadr topgan Hazrati inson!

Tonggi sabolardan koʻngillar xurram,

Har bitta goʻshada tantana, bayram.

Ziroatga toʻla dalalari ham

Shunchalar obodon, shunchalar koʻrkam,

Baxtga yor taqdirim – yorugʻ peshonam!

Totuvlik bazmiga, qarang, jamlashgan

Millatlar, elatlar ahil, sirlashgan.

Aslida barchasi maʼnan birlashgan –

Oʻzbekiston manim yagonam – onam –

Udir Sharq gavhari – oltin ostonam!

Robiya Yoʻldosheva.