Амударё тумани ҳокимлиги томонидан етим болаларга янги уй-жойлар топширилди
Мамлакатимизда давлат томонидан етим болалар ва ота-она қарамоғидан маҳрум бўлган болаларнинг ижтимоий ҳимоясини кучайтириш, уларни турар жойлар билан таъминлаш, катта ҳаётга тайёрлаш учун қулай шарт-шароитлар яратиш тизимини такомиллаштириш мақсадида бир қатор амалий ишлар қилинмоқда.
Ўзбекистон Республикаси Президентининг 2021 йил 9 август кунги “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида”ги Қарори ана шундай ёшларнинг ҳуқуқ ва эркинликларини рўёбга чиқариш, ижтимоий ҳимоясини кучайтиришда муҳим асос бўлиб хизмат қилмоқда. Ушбу Қарорга мувофиқ Ижтимоий ҳимоя миллий агентлиги ва масъул ташкилотлар ҳамкорлигида етим ва ота-она қарамоғидан маҳрум бўлган болаларнинг яна бир гуруҳига янги уй-жойлар харид қилинди.
Шу муносабат билан Амударё тумани ҳокимлигида ташкил этилган тадбирда мазкур хонадонларнинг калитлари ва ҳужжатлари ўз эгаларига туман ҳокими Собир Хўжаметов томонидан тантанали равишда топширилди.
“Нуроний” жамғармаси туман бўлими раиси Бекман Аллаберганов, туман “Инсон” ижтимоий хизматлар маркази директори Ғуломжон Дуйсенбаев ва бошқалар ёшларни янги хонадон билан табриклаб, уларнинг келгуси ишларида муваффақиятлар тиладилар. Шубҳасиз, ижтимоий ҳимояга муҳтож шахсларга берилаётган бу каби эътибор мамлакатимизда “Инсон қадри учун” тамойили асосида олиб борилаётган ишларнинг амалий ифодаси бўлди.
Маълумот ўрнида, туман “Инсон” ижтимоий хизматлар маркази таркибидаги Болаларни ижтимоий ҳимоя қилиш шўъбаси томонидан 2024 йилнинг 8 ойи давомида етим ва ота-она қарамоғидан маҳрум бўлган 7 нафар боланинг ҳар бирига маҳаллий бюджет ҳисобидан уй-жойлар харид қилинди. Хонадонлар уларнинг номларига расмийлаштирилиб, барча зарур жиҳозлар билан таъминланди.
Юқорида таъкидланган Президент Қарорига кўра, ўзларига бириктирилган турар жойга эга бўлмаган ёки турар жойга муҳтожлар сифатида ҳисобда турган етим болалар, шунингдек, ота-она қарамоғидан маҳрум бўлган болаларга улар 18 ёшга тўлган йилда кўп квартирали уй-жойлардан умумий майдони 25 квадрат метрдан кам бўлмаган 1 хонали хонадонлар билан таъминланиши белгиланган.
Агар вояга етган етим болалар ўртасида никоҳ тузилган бўлса, 50 квадрат метрдан кам бўлмаган 2 хонали квартиралар ёки мазкур квартиралар нархидан ортиқ бўлмаган якка тартибдаги турар жой, яъни ҳовли уйлар ажратилиши кўрсатилган.
Дарҳақиқат, дунёда ҳар ким ўзининг шахсий уй-жойи бўлишини хоҳлайди. Бу ёшлар ҳам ватан ичра кичик ватанга эга бўлиш орзуси билан яшаган бўлса, ажаб эмас. Давлат раҳбарининг оталарча ғамхўрлиги сабаб уларнинг эзгу ниятлари амалга ошди. Хонадон соҳибларининг қалбидан миннатдорлик ва шукроналик туйғулари, кўзларидан қувонч ёшлари аримайди.
Давлатимиз томонидан етим болалар ва ота-она қарамоғидан маҳрум бўлган болаларга халқимизга хос бағрикенглик билан қатор имкониятлар тақдим қилинмоқда. Албатта, бу ёшлар ушбу яхшиликларни ҳеч қачон унутишмайди. Эндиликда улар бу имкониятлардан унумли фойдаланиб, юртимиз тараққиёти ва халқимиз фаровонлиги йўлида янада фидойилик билан хизмат қилишларига ишонамиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
