Amudaryo tumani hokimligi tomonidan yetim bolalarga yangi uy-joylar topshirildi
Mamlakatimizda davlat tomonidan yetim bolalar va ota-ona qaramogʻidan mahrum boʻlgan bolalarning ijtimoiy himoyasini kuchaytirish, ularni turar joylar bilan taʼminlash, katta hayotga tayyorlash uchun qulay shart-sharoitlar yaratish tizimini takomillashtirish maqsadida bir qator amaliy ishlar qilinmoqda.
Oʻzbekiston Respublikasi Prezidentining 2021-yil 9-avgust kungi “Yetim bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlashning yangi tizimini joriy etish chora-tadbirlari toʻgʻrisida”gi Qarori ana shunday yoshlarning huquq va erkinliklarini roʻyobga chiqarish, ijtimoiy himoyasini kuchaytirishda muhim asos boʻlib xizmat qilmoqda. Ushbu Qarorga muvofiq Ijtimoiy himoya milliy agentligi va masʼul tashkilotlar hamkorligida yetim va ota-ona qaramogʻidan mahrum boʻlgan bolalarning yana bir guruhiga yangi uy-joylar xarid qilindi.
Shu munosabat bilan Amudaryo tumani hokimligida tashkil etilgan tadbirda mazkur xonadonlarning kalitlari va hujjatlari oʻz egalariga tuman hokimi Sobir Xoʻjametov tomonidan tantanali ravishda topshirildi.
“Nuroniy” jamgʻarmasi tuman boʻlimi raisi Bekman Allaberganov, tuman “Inson” ijtimoiy xizmatlar markazi direktori Gʻulomjon Duysenbayev va boshqalar yoshlarni yangi xonadon bilan tabriklab, ularning kelgusi ishlarida muvaffaqiyatlar tiladilar. Shubhasiz, ijtimoiy himoyaga muhtoj shaxslarga berilayotgan bu kabi eʼtibor mamlakatimizda “Inson qadri uchun” tamoyili asosida olib borilayotgan ishlarning amaliy ifodasi boʻldi.
Maʼlumot oʻrnida, tuman “Inson” ijtimoiy xizmatlar markazi tarkibidagi Bolalarni ijtimoiy himoya qilish shoʻʼbasi tomonidan 2024-yilning 8 oyi davomida yetim va ota-ona qaramogʻidan mahrum boʻlgan 7 nafar bolaning har biriga mahalliy byudjet hisobidan uy-joylar xarid qilindi. Xonadonlar ularning nomlariga rasmiylashtirilib, barcha zarur jihozlar bilan taʼminlandi.
Yuqorida taʼkidlangan Prezident Qaroriga koʻra, oʻzlariga biriktirilgan turar joyga ega boʻlmagan yoki turar joyga muhtojlar sifatida hisobda turgan yetim bolalar, shuningdek, ota-ona qaramogʻidan mahrum boʻlgan bolalarga ular 18 yoshga toʻlgan yilda koʻp kvartirali uy-joylardan umumiy maydoni 25 kvadrat metrdan kam boʻlmagan 1 xonali xonadonlar bilan taʼminlanishi belgilangan.
Agar voyaga yetgan yetim bolalar oʻrtasida nikoh tuzilgan boʻlsa, 50 kvadrat metrdan kam boʻlmagan 2 xonali kvartiralar yoki mazkur kvartiralar narxidan ortiq boʻlmagan yakka tartibdagi turar joy, yaʼni hovli uylar ajratilishi koʻrsatilgan.
Darhaqiqat, dunyoda har kim oʻzining shaxsiy uy-joyi boʻlishini xohlaydi. Bu yoshlar ham vatan ichra kichik vatanga ega boʻlish orzusi bilan yashagan boʻlsa, ajab emas. Davlat rahbarining otalarcha gʻamxoʻrligi sabab ularning ezgu niyatlari amalga oshdi. Xonadon sohiblarining qalbidan minnatdorlik va shukronalik tuygʻulari, koʻzlaridan quvonch yoshlari arimaydi.
Davlatimiz tomonidan yetim bolalar va ota-ona qaramogʻidan mahrum boʻlgan bolalarga xalqimizga xos bagʻrikenglik bilan qator imkoniyatlar taqdim qilinmoqda. Albatta, bu yoshlar ushbu yaxshiliklarni hech qachon unutishmaydi. Endilikda ular bu imkoniyatlardan unumli foydalanib, yurtimiz taraqqiyoti va xalqimiz farovonligi yoʻlida yanada fidoyilik bilan xizmat qilishlariga ishonamiz.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
