Амударё туманида пахта йиғим-терими мавсуми бошланди

Амударё туманида 2024 йил ҳосили учун етиштирилган пахта хомашёсини йиғиб-териб олиш мавсумининг рамзий бошланиши сифатида “Пахта карвони” тадбири ўтказилди.

Тумандаги Қипчоқ пахта қабул қилиш масканида бўлиб ўтган тадбирда туман ҳокими Собир Хўжаметов, секторлар раҳбарлари, ҳоким ўринбосарлари, қишлоқ хўжалиги соҳаси масъуллари, фермерлар иштирок этдилар. Тадбирни туман ҳокими Собир Хўжаметов очиб берди ва барчани жорий йилги пахта ҳосилини йиғиб-териб олиш мавсумининг бошлангани билан табриклаб, фермер хўжаликлари масъуллари ва теримчиларни ҳосилни нест-нобуд қилмасдан йиғиб-териб олиш, мавсумни уюшқоқлик билан ўтказиш ҳамда контрактация шартномаларини ортиғи билан бажаришга чақирди.

Тадбирида қишлоқ хўжалиги соҳаси вакиллари ҳамда илғор фермер хўжаликлари раҳбарлари сўзга чиқиб, пахтакорларни мавсум давомида ғўзани парваришлаш борасида машаққатли меҳнат қилганининг, агротехник тадбирларни ўз вақтида ва сифатли бажарганининг натижаси, яъни ҳосилни йиғиб олишдек масъулиятли мавсумга етиб келганликлари билан табриклади.

Сўзга чиққанлар деҳқонларнинг пешона тери эвазига етиштирилган ҳосилнинг қисқа муддатларда сифатли териб олинишида барча пахтакорларга куч-ғайрат тилади. Шунингдек, барчани ҳосилни нест-нобуд қилмай йиғиб-териб олишга бор имкониятни сафарбар қилишга чақирди. Тадбирга йиғилганлар юқори кайфиятда бошланган терим мавсумида Амударё тумани энг илғорлар қаторида бўлишини тилаб дуога қўл очдилар.

Тадбир мобайнида “Қипчоқ” пахта қабул қилиш масканининг дарвозалари очилиб, илк пахта хомашёси қабул қилиниши бошланди. Мавсумни фаоллик билан бошлаган ва пахта карвонига карвонбошилик қилган 3та фермер хўжаликлари раҳбарларига туман ҳокими Собир Хўжаметов томонидан қимматбаҳо совғалар топширилди. Жумладан, Қипчоқ овули ҳудудидаги “Умида Турсунбоева” фермер хўжалиги биринчи бўлиб пахта топширган хўжалик сифатида қайд этилиб, 15 тоннадан ортиқ пахта хомашёсини, “Файз баргида” фермер хўжалиги 10 тоннага яқин пахта хомашёсини, Амир Темур овули ҳудудидаги “Қурбаниязов Латифбой” фермер хўжалиги 5 тоннадан ортиқ пахта хомашёсини илғорлар қаторида топширдилар ҳам эсдалик совғалари билан рағбатлантирилдилар.

Шу каби тадбир туманнинг Аёқчи маҳалласидаги пахта қабул қилиш масканида ҳам ўтказилди. Қиличбой овулидаги фермер хўжаликлари далаларида ҳам бу йил мўл ҳосил тўпланди. Ҳудудда жойлашган фермер хўжаликларининг барчасида пахта йиғим-теримига уюшқоқлик билан киришилди ва ҳосилни тўлиқ қабул масканларига топшириб, “оқ олтин”дан юқори даромад олиш кўзланмоқда.

Маълумот ўрнида айтиш керакки, тумандаги жами 13 минг 900га экин майдонларида пахта чигити экилган бўлиб, 352 та фермер хўжаликлари томонидан ғўзани парваришлаш, агротехник тадбирларини амалга ошириш ишлари ўз вақтида ташкил этилиб, пахта етиштирилди. Тумандаги фермер хўжаликлари кластерлар билан тузилган контрактация шартномаларига мувофиқ жорий йилги мавсум мобайнида жами 48 минг 500 тонна хом-ашё етиштириш мажбуриятини олган. 13 сентябрь ҳолатига фермер хўжаликлари томонидан жами 842 тонна ҳосил йиғиб-териб олинган. Шундан 1-сектор ҳудудидаги пахта етиштирувчи фермер хўжаликлари 215 тонна, 2-сектор ҳудудидаги пахтакорлар 275 тонна, 3-сектор ҳудудидаги хўжаликлар 249 тонна ва 4-сектор ҳудудидаги фермер хўжаликлари жами 103 тонна пахта ҳосилини топширган.

“Пахта карвони” тадбири мобайнида етиштирилган пахта хомашёсини қисқа муддатларда, совуқ кунларга қолдирмасдан йиғиб-териб олиш борасида олдинда турган вазифалар хусусида сўз юритилди. Отряд раҳбарлари томонидан терим жараёнларини белгиланган тартибга мувофиқ ташкил этиш, дала бошида теримчилар учун зарур шарт-шароитлар яратиш зарурлиги алоҳида қайд этилиб, тегишли масъулларга таклиф ва кўрсатмалар берилди.

Чарос Арслонова, туман ҳокимлигининг Ахборот хизмати раҳбари.