Amudaryo tumanida paxta yigʻim-terimi mavsumi boshlandi

Amudaryo tumanida 2024-yil hosili uchun yetishtirilgan paxta xomashyosini yigʻib-terib olish mavsumining ramziy boshlanishi sifatida “Paxta karvoni” tadbiri oʻtkazildi.

Tumandagi Qipchoq paxta qabul qilish maskanida boʻlib oʻtgan tadbirda tuman hokimi Sobir Xoʻjametov, sektorlar rahbarlari, hokim oʻrinbosarlari, qishloq xoʻjaligi sohasi masʼullari, fermerlar ishtirok etdilar. Tadbirni tuman hokimi Sobir Xoʻjametov ochib berdi va barchani joriy yilgi paxta hosilini yigʻib-terib olish mavsumining boshlangani bilan tabriklab, fermer xoʻjaliklari masʼullari va terimchilarni hosilni nest-nobud qilmasdan yigʻib-terib olish, mavsumni uyushqoqlik bilan oʻtkazish hamda kontraktatsiya shartnomalarini ortigʻi bilan bajarishga chaqirdi.

Tadbirida qishloq xoʻjaligi sohasi vakillari hamda ilgʻor fermer xoʻjaliklari rahbarlari soʻzga chiqib, paxtakorlarni mavsum davomida gʻoʻzani parvarishlash borasida mashaqqatli mehnat qilganining, agrotexnik tadbirlarni oʻz vaqtida va sifatli bajarganining natijasi, yaʼni hosilni yigʻib olishdek masʼuliyatli mavsumga yetib kelganliklari bilan tabrikladi.

Soʻzga chiqqanlar dehqonlarning peshona teri evaziga yetishtirilgan hosilning qisqa muddatlarda sifatli terib olinishida barcha paxtakorlarga kuch-gʻayrat tiladi. Shuningdek, barchani hosilni nest-nobud qilmay yigʻib-terib olishga bor imkoniyatni safarbar qilishga chaqirdi. Tadbirga yigʻilganlar yuqori kayfiyatda boshlangan terim mavsumida Amudaryo tumani eng ilgʻorlar qatorida boʻlishini tilab duoga qoʻl ochdilar.

Tadbir mobaynida “Qipchoq” paxta qabul qilish maskanining darvozalari ochilib, ilk paxta xomashyosi qabul qilinishi boshlandi. Mavsumni faollik bilan boshlagan va paxta karvoniga karvonboshilik qilgan 3ta fermer xoʻjaliklari rahbarlariga tuman hokimi Sobir Xoʻjametov tomonidan qimmatbaho sovgʻalar topshirildi. Jumladan, Qipchoq ovuli hududidagi “Umida Tursunboyeva” fermer xoʻjaligi birinchi boʻlib paxta topshirgan xoʻjalik sifatida qayd etilib, 15 tonnadan ortiq paxta xomashyosini, “Fayz bargida” fermer xoʻjaligi 10 tonnaga yaqin paxta xomashyosini, Amir Temur ovuli hududidagi “Qurbaniyazov Latifboy” fermer xoʻjaligi 5 tonnadan ortiq paxta xomashyosini ilgʻorlar qatorida topshirdilar ham esdalik sovgʻalari bilan ragʻbatlantirildilar.

Shu kabi tadbir tumanning Ayoqchi mahallasidagi paxta qabul qilish maskanida ham oʻtkazildi. Qilichboy ovulidagi fermer xoʻjaliklari dalalarida ham bu yil moʻl hosil toʻplandi. Hududda joylashgan fermer xoʻjaliklarining barchasida paxta yigʻim-terimiga uyushqoqlik bilan kirishildi va hosilni toʻliq qabul maskanlariga topshirib, “oq oltin”dan yuqori daromad olish koʻzlanmoqda.

Maʼlumot oʻrnida aytish kerakki, tumandagi jami 13 ming 900ga ekin maydonlarida paxta chigiti ekilgan boʻlib, 352 ta fermer xoʻjaliklari tomonidan gʻoʻzani parvarishlash, agrotexnik tadbirlarini amalga oshirish ishlari oʻz vaqtida tashkil etilib, paxta yetishtirildi. Tumandagi fermer xoʻjaliklari klasterlar bilan tuzilgan kontraktatsiya shartnomalariga muvofiq joriy yilgi mavsum mobaynida jami 48 ming 500 tonna xom-ashyo yetishtirish majburiyatini olgan. 13-sentyabr holatiga fermer xoʻjaliklari tomonidan jami 842 tonna hosil yigʻib-terib olingan. Shundan 1-sektor hududidagi paxta yetishtiruvchi fermer xoʻjaliklari 215 tonna, 2-sektor hududidagi paxtakorlar 275 tonna, 3-sektor hududidagi xoʻjaliklar 249 tonna va 4-sektor hududidagi fermer xoʻjaliklari jami 103 tonna paxta hosilini topshirgan.

“Paxta karvoni” tadbiri mobaynida yetishtirilgan paxta xomashyosini qisqa muddatlarda, sovuq kunlarga qoldirmasdan yigʻib-terib olish borasida oldinda turgan vazifalar xususida soʻz yuritildi. Otryad rahbarlari tomonidan terim jarayonlarini belgilangan tartibga muvofiq tashkil etish, dala boshida terimchilar uchun zarur shart-sharoitlar yaratish zarurligi alohida qayd etilib, tegishli masʼullarga taklif va koʻrsatmalar berildi.

Charos Arslonova, tuman hokimligining Axborot xizmati rahbari.