Хитой овулидаги оилавий поликлиника биноси мукаммал таъмирланиб, фойдаланишга топширилди
Қишлоқ жойларда бирламчи тиббиёт муассасалари аҳолининг саломатлигини сақлашда муҳим аҳамият касб этади. Улар касалликларнинг олдини олиш, профилактика ишлари ва патронаж хизматларини амалга оширишда асосий ўрин тутади. Шу сабабли ҳам кейинги йилларда ҳудудлардаги бирламчи тиббий-санитария ёрдами муассасалари фаолиятини такомиллаштиришга қаратилган қатор қарорлар қабул қилиниб, ислоҳотлар амалга оширилмоқда. Натижада аҳолига юқори сифатли тиббий хизмат кўрсатиш, шунингдек, касалликлар профилактикаси ва соғлом турмуш тарзини тарғиб қилиш ишлари янги босқичга кўтарилмоқда.
Амударё туманининг олис Хитой ва Бўз ёп овуллари ҳамда ушбу овуллар таркибидаги маҳаллалар аҳолисига хизмат кўрсатувчи 6-сонли оилавий поликлиникаси биноси анча эскиргани боис, бу ерда аҳолига бирламчи тиббий хизматни сифатли ва аъло даражада кўрсатиш борасида қийинчиликлар кузатилаётган эди. Тиббий муассасаларни босқичма-босқич қуриш ва реконструкция қилиш бўйича махсус дастур асосида мазкур 6-сонли оилавий поликлиника биноси ҳам мукаммал таъмирланиб, 23 сентябрь куни фойдаланишга топширилди.
Муассаса биносининг очилиш маросимида туман ҳокими Собир Хўжаметов, туман фаоллари ва овул аҳли иштирок этишди. “Манғит идеал қурилиш” МЧЖ томонидан 750 млн сўм маблағ эвазига амалга оширилган мазкур реконструкция ва мукаммал таъмирлаш ишлари бинога янгича қиёфа бахш этиб, нафақат сифатли бирламчи тиббий хизмат учун шароит яратди, балки овулнинг кўркам иншоотлари сонини яна биттага кўпайтирди.
Бинонинг очилиш маросимида сўз олганлар – туман ҳокими Собир Хўжаметов, меҳнат фахрийси, маҳалла фаоли Турсунбой Абдуллаев ва бошқалар таъкидлаганларидек, мамлакатимизда аҳоли, айниқса олис қишлоқларда яшовчи фуқаролар саломатлигини сақлаш давлатимизнинг доимий диққат марказидаги масала бўлиб келмоқда. Сўнгги йилларда соғлиқни сақлаш тизимида амалга оширилган ислоҳотлар натижасида аҳолининг саломатлиги ва кўрсатилаётган тиббий хизматлар ҳажми йил сайин ортиб бормоқда. Бу эса ўртача умр давомийлигининг ошишига ҳам замин яратмоқда.
Очилиш маросимидан кейин меҳмонлар поликлиника биносига кириб, бу ерда таббиёт ходимларининг фаолият юритишлари учун яратилган шароитлар ва ташриф буюрувчилар учун яратилган қулайликлар билан яқиндан танишдилар.
Айтиш жоизки, Амударё туман тиббиёт бирлашмасига қарашли мазкур 6-сонли қишлоқ оилавий поликлиникаси 4та ҳудуд – Хитой ва Бўз-ёп овуллари ҳамда Тор-ёп ва Намуна маҳаллаларидаги жами 3039та хонадонда яшовчи 16 минг 791 нафар аҳолига бирламчи тиббий ёрдам кўрсатади. Аҳолининг 8 минг 541 нафари эркаклар, 8 минг 250 нафари эса аёллардир. Улардан 14 ёшгача бўлганлар сони 5 минг 39 нафарни, 15-17 ёшлилар сони 907 нафарни, 18 ёшдан катталар сони эса 10 минг 845 нафарни ташкил қилади. Поликлиниканинг хизмат ҳудудида яшовчи 1 ёшгача бўлган чақалоқлар 432 нафар, туғиш ёшидаги аёллар эса 4 минг 279 нафарни ташкил қилади.
Бу каби катта ҳудудда яшовчи кўп сонли аҳолига сифатли бирламчи тиббий хизмат кўрсатиш учун 6-сонли оилавий поликлиникада 8та тиббий бригада ташкил этилган бўлиб, улар таркибида 8 нафар оила шифокорлари, 16 нафар патронаж ҳамшираси, 8 нафар умумий амалиёт ҳамшираси, 4 нафар тиббий бригада дояси ҳамда 5 нафар тор доирадаги шифокорлар, яъни акушер-гинеколог, жарроҳ, стоматолог, ультратовуш таҳлили шифокори, врач-лаборантлар фаолият олиб боради. Бундан ташқари, поликлиникада 4 ўринли кундузги стационар ҳам ташкил этилган.
Ишонамизки, янги бинода фаолиятини давом эттираётган оилавий поликлиниканинг меҳнат жамоаси ўз касбларини сидқидилдан, фидойилик билан бажариб, аҳоли саломатлигини сақлаш йўлида янада самарали иш олиб борадилар.
amunews.uz
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
