ЎзЛиДеПдан депутатликка номзодларнинг сайловолди учрашуви ўтказилди
Маълумки, жорий йил 27 октябрь куни Олий Мажлис Қонунчилик палатаси, Қорақалпоғистон Республикаси Жўқорғи Кенгеси ва Халқ депутатлари маҳаллий Кенгашларга сайловлар бўлиб ўтади. Марказий сайлов комиссиясининг жорий йил 20 сентябрь куни бўлиб ўтган мажлисида қабул қилинган Қарор билан Қонунчилик палатаси ва маҳаллий кенгашлар депутатлари сайлови бўйича депутатликка номзодларнинг ва сиёсий партияларнинг сайловолди ташвиқоти 2024 йил 22 сентябрдан бошланиши белгиланди. Айни кунларда жойларда, овул ва маҳаллаларда, меҳнат жамоаларида депутатликка номзодларнинг ва сиёсий партияларнинг сайловолди ташвиқот учрашувлари бўлиб ўтмоқда.
25 сентябрь куни Амударё туманининг Манғит шаҳридаги 9-сонли Болалар мусиқа ва санъат мактаби биносида Тадбиркорлар ва ишбилармонлар ҳаракати – Ўзбекистон Либерал-демократик партияси ва мазкур партиядан кўрсатилган номзодларнинг сайловолди ташвиқот учрашуви бўлиб ўтди.
Учрашувда Қорақалпоғистон Республикаси Жўқорғи Кенгеси ва халқ депутатлари Амударё туман Кенгашига мазкур партиядан кўрсатилган номзодлар, партиянинг туман Кенгаши масъуллари, партия фаоллари ва сайловчилар вакиллари иштирок этди.
Учрашув аввалида таъкидланганидек, партия жорий йилги сайловларга “Ваъда эмас, натижа, эртага эмас, бугун”, деган шиор билан кириб келмоқда. ЎзЛиДеП бу йилги сайловолди дастурида тадбиркорлар, ишбилармонлар, фермерлар, фан-таълим, тиббиёт ва ишчи-ходимлар манфаатларини ҳимоя қилишга жиддий эътибор қаратган.
Учрашувда ЎзЛиДеПнинг кейинги 5 йиллик учун белгиланган мақсад ва вазифалари, халқчил ғоялари ҳақида сўз юритилди. Хусусан, аҳолининг фаровон ҳаёт кечириши, фарзандларимиз сифатли таълим ва тиббиётдан баҳраманд бўлиши, аёлларимиз ва нуронийларимиз, жамики юртдошларимиз бахтли яшаши, халқимиз дастурхони тўкин бўлиши ҳамда эртанги кунимиз ёруғ бўлиши учун партия ўз олдига аниқ мақсадларни қўйган.
Тадбирда таълим соҳаси ходимлари ҳам иштирок этаётгани инобатга олиниб, учрашувда партиянинг ушбу йўналишда режалаштираётган лойиҳаларига ҳам алоҳида тўхталиб ўтилди. Жумладан, мактабгача таълим ташкилотлари ва умумий ўрта таълим муассасалари педагог ходимларининг ўртача иш ҳақини 2 баробар ошириш, умумий ўрта таълим мактабларида 153 мингдан ортиқ синф раҳбарлари учун тўланадиган маблағ миқдорини кўпайтириш таклиф қилинаётгани таъкидланди.
Партиядан Қорақалпоғистон Республикаси Жўқорғи Кенгесига кўрсатилган номзод – туман Фермер, деҳқон хўжаликлари ва томорқа ер эгалари Кенгаши раиси Илҳом Полвонов сўнгги 5 йил давомида ЎзЛиДеП ташаббуси билан фермерликни ривожлантириш йўналишида амалга оширилган ишларга тўхталиб ўтди. Жумладан, ўтган йилларда “Деҳқон хўжалиги тўғрисида”ги қонун қабул қилинди. Мазкур қонун билан янги ва фойдаланишдан чиққан 464 минг гектар майдонни ўзлаштириш ҳамда кластерларга очиқ танлов асосида ажратиш белгиланди. Шунга мувофиқ, 200 минг гектар пахта ва ғалла майдонларини қисқартириш эвазига аҳолига очиқ танлов асосида узоқ муддатли ижарага бериш ишлари бошланди.
Учрашувда сўзга чиққан партия фаоллари ва депутатликка номзодлар турли йўналишларда партия илгари сураётган таклифлар бўйича маълумотлар бериб, сайловчиларни партияга ва унинг номзодларига овоз беришга чақирди.
Яхшимурод Аҳмедов, партиянинг туман Кенгаши аппарат раҳбари
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
