OʻzLiDePdan deputatlikka nomzodlarning saylovoldi uchrashuvi oʻtkazildi

Maʼlumki, joriy yil 27-oktyabr kuni Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va Xalq deputatlari mahalliy Kengashlarga saylovlar boʻlib oʻtadi. Markaziy saylov komissiyasining joriy yil 20-sentyabr kuni boʻlib oʻtgan majlisida qabul qilingan Qaror bilan Qonunchilik palatasi va mahalliy kengashlar deputatlari saylovi boʻyicha deputatlikka nomzodlarning va siyosiy partiyalarning saylovoldi tashviqoti 2024-yil 22-sentyabrdan boshlanishi belgilandi. Ayni kunlarda joylarda, ovul va mahallalarda, mehnat jamoalarida deputatlikka nomzodlarning va siyosiy partiyalarning saylovoldi tashviqot uchrashuvlari boʻlib oʻtmoqda.

25-sentyabr kuni Amudaryo tumanining Mangʻit shahridagi 9-sonli Bolalar musiqa va sanʼat maktabi binosida Tadbirkorlar va ishbilarmonlar harakati – Oʻzbekiston Liberal-demokratik partiyasi va mazkur partiyadan koʻrsatilgan nomzodlarning saylovoldi tashviqot uchrashuvi boʻlib oʻtdi.

Uchrashuvda Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashiga mazkur partiyadan koʻrsatilgan nomzodlar, partiyaning tuman Kengashi masʼullari, partiya faollari va saylovchilar vakillari ishtirok etdi.

Uchrashuv avvalida taʼkidlanganidek, partiya joriy yilgi saylovlarga “Vaʼda emas, natija, ertaga emas, bugun”, degan shior bilan kirib kelmoqda. OʻzLiDeP bu yilgi saylovoldi dasturida tadbirkorlar, ishbilarmonlar, fermerlar, fan-taʼlim, tibbiyot va ishchi-xodimlar manfaatlarini himoya qilishga jiddiy eʼtibor qaratgan.

Uchrashuvda OʻzLiDePning keyingi 5-yillik uchun belgilangan maqsad va vazifalari, xalqchil gʻoyalari haqida soʻz yuritildi. Xususan, aholining farovon hayot kechirishi, farzandlarimiz sifatli taʼlim va tibbiyotdan bahramand boʻlishi, ayollarimiz va nuroniylarimiz, jamiki yurtdoshlarimiz baxtli yashashi, xalqimiz dasturxoni toʻkin boʻlishi hamda ertangi kunimiz yorugʻ boʻlishi uchun partiya oʻz oldiga aniq maqsadlarni qoʻygan.

Tadbirda taʼlim sohasi xodimlari ham ishtirok etayotgani inobatga olinib, uchrashuvda partiyaning ushbu yoʻnalishda rejalashtirayotgan loyihalariga ham alohida toʻxtalib oʻtildi. Jumladan, maktabgacha taʼlim tashkilotlari va umumiy oʻrta taʼlim muassasalari pedagog xodimlarining oʻrtacha ish haqini 2 barobar oshirish, umumiy oʻrta taʼlim maktablarida 153 mingdan ortiq sinf rahbarlari uchun toʻlanadigan mablagʻ miqdorini koʻpaytirish taklif qilinayotgani taʼkidlandi.

Partiyadan Qoraqalpogʻiston Respublikasi Joʻqorgʻi Kengesiga koʻrsatilgan nomzod – tuman Fermer, dehqon xoʻjaliklari va tomorqa yer egalari Kengashi raisi Ilhom Polvonov soʻnggi 5-yil davomida OʻzLiDeP tashabbusi bilan fermerlikni rivojlantirish yoʻnalishida amalga oshirilgan ishlarga toʻxtalib oʻtdi. Jumladan, oʻtgan yillarda “Dehqon xoʻjaligi toʻgʻrisida”gi qonun qabul qilindi. Mazkur qonun bilan yangi va foydalanishdan chiqqan 464 ming gektar maydonni oʻzlashtirish hamda klasterlarga ochiq tanlov asosida ajratish belgilandi. Shunga muvofiq, 200 ming gektar paxta va gʻalla maydonlarini qisqartirish evaziga aholiga ochiq tanlov asosida uzoq muddatli ijaraga berish ishlari boshlandi.

Uchrashuvda soʻzga chiqqan partiya faollari va deputatlikka nomzodlar turli yoʻnalishlarda partiya ilgari surayotgan takliflar boʻyicha maʼlumotlar berib, saylovchilarni partiyaga va uning nomzodlariga ovoz berishga chaqirdi.

Yaxshimurod Ahmedov, partiyaning tuman Kengashi apparat rahbari