Амударё туманида Ўқитувчи ва мураббийлар куни кенг нишонланди
Халқимизнинг миллий-маънавий қадриятлари нафақат оилалар ва ҳар бир инсон шахсиятида, балки барча соҳалар, айниқса, таълим-тарбия тизимида ўз аксини топган. Шу боис, умумтаълим мактабларида олиб борилаётган дарс машғулотларининг мазмун-моҳиятида ҳам халқимизга хос бўлган ватанпарварлик, ўзаро меҳр-оқибат, халқпарварлик, бирдамлик туйғуларига алоҳида урғу берилади. Бундан кўзланган ягона мақсад – янгиланаётган Ўзбекистонга муносиб, маънан ва жисмонан етук авлодларни тарбиялаб, вояга етказишдир.
Амударё туманидаги 86та умумтаълим мактабларида сўнгги йилларда таълим-тарбия жараёнида эришилаётган муваффақиятлар замирида ҳам педагогик жамоаларнинг ўзаро аҳилликлари, баркамол авлод тарбияси йўлидаги бирдамлиги мужассам. Амударё тумани Мактабгача ва мактаб таълими бўлими маъмурияти тумандаги ушбу соҳа муассасаларининг фаолиятини методик жиҳатдан қўллаб-қувватлаб, амалий ёрдам кўрсатиб келмоқда.
Айни пайтда мактабларда 38 минг 769 нафар ўқувчи-ёшлар замонавий педтехнологиялар асосида таълим-тарбия олишмоқда. 4 минг 61 нафар ўқитувчиларнинг 97 фоизи олий маълумотли мутахассис фан ўқитувчилари бўлиб, улардан 421 нафари олий, салкам 1000 нафари 1-тоифага эга бўлган ўз касбининг фидойиларидир.
Сўнгги йилларда мактабларнинг моддий-техник таъминоти яхшиланди ва 44-, 45-, 1-, 31-, 86-сонли мактаблар биноларини мукаммал ва жорий таъмирлаш ишлари амалга оширилиб, ўқитувчи ҳамда ўқувчилар учун зарур шароитлар яратилди. Таълим-тарбия сифати ва самарадорлигини оширишга қаратилган чора-тадбирларга мувофиқ маҳаллий бюджет маблағлари ҳисобидан 4та мактаб зарур жиҳозлар билан таъминланди. Кореянинг EKSIMBANKи грантлари ҳисобидан 6та мактабга 96 дона, Республика бюджети ҳисобидан 17та мактабга 176 дона компьютер жамланмалари етказиб берилди.
Давлатимиз томонидан таълим-тарбия соҳасига қаратилаётган эътибор ва рағбат туфайли кадрлар салоҳияти ҳам йил сайин ошиб бормоқда. Натижада битирувчи ёшларнинг ОТМларга ўқишга кириш кўрсаткичи ҳам юқори бўлмоқда. Айни пайтда кадрлар салоҳияти жиҳатидан 40-сонли мактаб педагогика жамоаси эришаётган ютуқлар қувонарли. Мазкур илм масканида фаолият олиб борувчи 103 нафар педагог кадрларнинг 43 нафари олий ва 1-тоифага, 13 нафар инглиз тили фани ўқитувчиларининг барчаси хорижий тилни ўқитиш бўйича халқаро ва унга тенглаштирилган сертификатга эга юқори малакали педагоглардир. 2023-2024 ўқув йилида мазкур мактабнинг 53 нафар ўқувчилари чет тили фанидан халқаро ва унга тенглаштирилган сертификатга эга бўлиб, туманда етакчилик қилди.
Президент соврини учун ўтказиб келинаётган “Хорижий тилларни ўқитиш бўйича энг яхши мактаб” танловида ҳам 40-сонли мактаб жамоаси 3 йилдан буён туманда ғолибликни қўлга киритиб келмоқда.
Ўтган ўқув йилида 11-синфни туман бўйича 27 нафар ўқувчи олтин, 4 нафар ўқувчи кумуш медаллар билан битириб, ОТМ га кириш имтиҳонларида 67-сонли мактаб ўртача 104 балл, 43-мактаб 102,7 балл, 40-мактаб 98,4 балл тўплаб, биринчи учликдан жой олдилар. Мактаб битирувчилари ОТМга кириш бўйича 22-сонли мактаб туманда 1-ўринни эгаллади. Мазкур мактабни 2023-2024 ўқув йилида 48 нафар ўқувчи битириб, шундан 30 нафари, яъни 63 фоизи давлат ОТМга ўқишга киришга муваффақ бўлди.
Касб фаолияти давомида мана шундай юксак марраларни забт этаётган, ёш авлодга муносиб таълим-тарбия бериб, Учинчи Ренессанс пойдеворини барпо қилаётган амударёлик ўқитувчилар касб байрамини ҳам муносиб нишонладилар.
30 сентябрь куни сана муносабати билан ташкил қилинган тантанали тадбирга таълим соҳаси илғорлари, фахрий ўқитувчилар, юксак натижаларга эришаётган устозлар ва тажрибали мураббийлар таклиф қилинди.
Тадбир аввалида туман ҳокимининг биринчи ўринбосари Фахриддин Юсупов, нуроний Бекман Аллаберганов, фахрий ўқитувчи Аширбой Қўшаев, Қорақалпоғистон Республикаси Мактабгача ва мактаб таълими вазирлиги бўлим бошлиғи Ҳамидулла Бегдуллаев ва бошқалар сўзга чиқиб, юртимизда таълим тизимида амалга оширилаётган ислоҳотлар ҳақида сўз юритиб, ўқитувчи ва мураббийларни 1 октябрь – касб байрамлари билан муборакбод этдилар.
Чиндан ҳам, ўқитувчилик касби инсоннинг шахс сифатида камол топишида муҳим аҳамият касб этади. Улар билимнинг чироғини ёқиб, ёш авлоднинг онги ва қалбини ёритадилар. Ўқитувчилар нафақат билим беради, балки ҳаёт кўникмаларини ҳам ўргатадилар, шу билан бирга ўқувчиларнинг ахлоқий ва ижтимоий тарбиясида ҳам ҳал қилувчи аҳамият касб этади. Устозларнинг бизга берган билим ва кўникмалари бутун умримиз давомида йўлчи юлдуз бўлиб ҳаёт йўлимизни ёритади. Инсоният ибтидосидан то бугунга қадар эришилган барча ютуқлар айнан устоз ва мураббийлар туфайлидир. Шу сабабли ҳам юртимизда ўқитувчилик касбининг мақомини юксалтириш, соҳа ходимларини ҳар томонлама қўллаб-қувватлашга қаратилган тизимли ислоҳотлар амалга оширилмоқда.
Айтиш жоизки, Амударё тумани мактабларида малакали ўқитувчилар кўп. Хусусан, 36-сонли мактабнинг физика фани ўқитувчиси Хушнуд Чоршамов ва математика фани ўқитувчиси Азим Сапарбоевлар ҳамкорлигида ташкил этилган 11-“Г” вариатив синфида 25 нафар ўқувчи таълим олиб, барчаси – 100 фоиз ОТМга киришга муваффақ бўлдилар. Шуниси эътиборлики, улардан 12 нафари давлат гранти, 13 нафари тўлов-шартнома асосида талабаликка қабул қилиндилар. 40-сонли мактабнинг инглиз тили ўқитувчиси Нурбек Жуманиязов ва математика фани ўқитувчиси Шерзод Ашировлар ҳамкорлигида ташкил этилган 11-“Д” вариатив синф ўқувчиларининг ҳам барчаси, шу жумладан 4 нафари давлат гранти, 23 нафари тўлов-шартнома асосида талабаликка қабул қилиндилар.
Амударёлик педагоглар жорий 2024-2025 ўқув йилини ҳам янада жипслик ва бирдамлик билан бошладилар. Улар ёш авлод таълим-тарбияси йўлида янада фаол меҳнат қилиб, мамлакат келажаги ва халқ фаровонлигига муносиб ҳисса қўшадиган кадрларни тарбиялашни ўз олдларига мақсад қилиб қўйганлар. Мана шундай қадрли ва ардоқли устозларга байрам муносабати билан янада чуқур эҳтиром кўрсатилиб, уларнинг фидойи меҳнатлари эътироф этилди. Байрам тадбири сўнгида фаол ўқитувчилар, тажрибали мураббийлар ва илғор тарбиячилар туман ҳокимлигининг ташаккурномаси ва эсдалик совғалари билан тақдирланди.
Фурсатдан фойдаланиб, таълим-тарбия соҳасининг барча фидойиларини, фахрий устозларни Ўқитувчи ва мураббийлар куни – умумхалқ байрами билан чин дилдан табриклаб, оилаларига фаровонлик, бирдамлик, мустаҳкам соғлик тилаймиз.
Азиз устоз ва мураббийлар! Сизнинг саъй-ҳаракатларингиз туфайли ёш авлод нафақат илм-фан соҳасида, балки маънавий ва жисмоний жиҳатдан ҳам камол топмоқда. Давлатимиз ва жамиятимиз Сиз азизларнинг меҳнатларингизни юксак эътироф этади ва қадрлайди. Доимо эл-юрт ардоғида, шогирдларингизнинг эъзозида бўлинг, Ўқитувчи ва мураббийлар куни муборак бўлсин, азиз устозлар!
Таҳририят
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
