Amudaryo tumanida Oʻqituvchi va murabbiylar kuni keng nishonlandi

Xalqimizning milliy-maʼnaviy qadriyatlari nafaqat oilalar va har bir inson shaxsiyatida, balki barcha sohalar, ayniqsa, taʼlim-tarbiya tizimida oʻz aksini topgan. Shu bois, umumtaʼlim maktablarida olib borilayotgan dars mashgʻulotlarining mazmun-mohiyatida ham xalqimizga xos boʻlgan vatanparvarlik, oʻzaro mehr-oqibat, xalqparvarlik, birdamlik tuygʻulariga alohida urgʻu beriladi. Bundan koʻzlangan yagona maqsad – yangilanayotgan Oʻzbekistonga munosib, maʼnan va jismonan yetuk avlodlarni tarbiyalab, voyaga yetkazishdir.

Amudaryo tumanidagi 86ta umumtaʼlim maktablarida soʻnggi yillarda taʼlim-tarbiya jarayonida erishilayotgan muvaffaqiyatlar zamirida ham pedagogik jamoalarning oʻzaro ahilliklari, barkamol avlod tarbiyasi yoʻlidagi birdamligi mujassam. Amudaryo tumani Maktabgacha va maktab taʼlimi boʻlimi maʼmuriyati tumandagi ushbu soha muassasalarining faoliyatini metodik jihatdan qoʻllab-quvvatlab, amaliy yordam koʻrsatib kelmoqda.

Ayni paytda maktablarda 38 ming 769 nafar oʻquvchi-yoshlar zamonaviy pedtexnologiyalar asosida taʼlim-tarbiya olishmoqda. 4 ming 61 nafar oʻqituvchilarning 97 foizi oliy maʼlumotli mutaxassis fan oʻqituvchilari boʻlib, ulardan 421 nafari oliy, salkam 1000 nafari 1-toifaga ega boʻlgan oʻz kasbining fidoyilaridir.

Soʻnggi yillarda maktablarning moddiy-texnik taʼminoti yaxshilandi va 44-, 45-, 1-, 31-, 86-sonli maktablar binolarini mukammal va joriy taʼmirlash ishlari amalga oshirilib, oʻqituvchi hamda oʻquvchilar uchun zarur sharoitlar yaratildi. Taʼlim-tarbiya sifati va samaradorligini oshirishga qaratilgan chora-tadbirlarga muvofiq mahalliy byudjet mab­lagʻlari hisobidan 4ta maktab zarur jihozlar bilan taʼminlandi. Koreyaning EKSIMBANKi grantlari hisobidan 6ta maktabga 96 dona, Respublika byudjeti hisobidan 17ta maktabga 176 dona  kompyuter jamlanmalari yetkazib berildi.

Davlatimiz tomonidan taʼlim-tarbiya sohasiga qaratilayotgan eʼtibor va ragʻbat tufayli kadrlar salohiyati ham yil sayin oshib bormoqda. Natijada bitiruvchi yoshlarning OTMlarga oʻqishga kirish koʻrsatkichi ham yuqori boʻlmoqda. Ayni paytda kadrlar salohiyati jihatidan 40-sonli maktab pedagogika jamoasi erishayotgan yutuqlar quvonarli. Mazkur ilm maskanida faoliyat olib boruvchi 103 nafar pedagog kadrlarning 43 nafari oliy va 1-toifaga, 13 nafar ingliz tili fani oʻqituvchilarining barchasi xorijiy tilni oʻqitish boʻyicha xalqaro va unga tenglashtirilgan sertifikatga ega yuqori malakali pedagoglardir. 2023-2024 oʻquv yilida mazkur maktabning 53 nafar oʻquvchilari chet tili fanidan xalqaro va unga tenglashtirilgan sertifikatga ega boʻlib, tumanda yetakchilik qildi.

Prezident sovrini uchun oʻtkazib kelinayotgan “Xorijiy tillarni oʻqitish boʻyicha eng yaxshi maktab” tanlovida ham 40-sonli maktab jamoasi 3-yildan buyon tumanda gʻoliblikni qoʻlga kiritib kelmoqda.

Oʻtgan oʻquv yilida 11-sinfni tuman boʻyicha 27 nafar oʻquvchi oltin, 4 nafar oʻquvchi kumush medallar bilan bitirib, OTM ga kirish imtihonlarida 67-sonli maktab oʻrtacha 104 ball, 43-maktab 102,7 ball, 40-maktab 98,4 ball toʻplab, birinchi uchlikdan joy oldilar. Maktab bitiruvchilari OTMga kirish boʻyicha 22-sonli maktab tumanda 1-oʻrinni egalladi. Mazkur maktabni 2023-2024 oʻquv yilida 48 nafar oʻquvchi bitirib, shundan 30 nafari, yaʼni 63 foizi davlat OTMga oʻqishga kirishga muvaffaq boʻldi.

Kasb faoliyati davomida mana shunday yuksak marralarni zabt etayotgan, yosh avlodga munosib taʼlim-tarbiya berib, Uchinchi Renessans poydevorini barpo qilayotgan amudaryolik oʻqituvchilar kasb bayramini ham munosib nishonladilar.

30-sentyabr kuni sana munosabati bilan tashkil qilingan tantanali tadbirga taʼlim sohasi ilgʻorlari, faxriy oʻqituvchilar, yuksak natijalarga erishayotgan ustozlar va tajribali murabbiylar taklif qilindi.

Tadbir avvalida tuman hokimining birinchi oʻrinbosari Faxriddin Yusupov, nuroniy Bekman Allaberganov, faxriy oʻqituvchi Ashirboy Qoʻshayev, Qoraqalpogʻiston Respublikasi Maktabgacha va maktab taʼlimi vazirligi boʻlim boshligʻi Hamidulla Begdullayev va boshqalar soʻzga chiqib, yurtimizda taʼlim tizimida amalga oshirilayotgan islohotlar haqida soʻz yuritib, oʻqituvchi va murabbiylarni 1-oktyabr – kasb bayramlari bilan muborakbod etdilar.

Chindan ham, oʻqituvchilik kasbi insonning shaxs sifatida kamol topishida muhim ahamiyat kasb etadi. Ular bilimning chirogʻini yoqib, yosh avlodning ongi va qalbini yoritadilar. Oʻqituvchilar nafaqat bilim beradi, balki hayot koʻnikmalarini ham oʻrgatadilar, shu bilan birga oʻquvchilarning axloqiy va ijtimoiy tarbiyasida ham hal qiluvchi ahamiyat kasb etadi. Ustozlarning bizga bergan bilim va koʻnikmalari butun umrimiz davomida yoʻlchi yulduz boʻlib hayot yoʻlimizni yoritadi. Insoniyat ibtidosidan to bugunga qadar erishilgan barcha yutuqlar aynan ustoz va murabbiylar tufaylidir. Shu sababli ham yurtimizda oʻqituvchilik kasbining maqomini yuksaltirish, soha xodimlarini har tomonlama qoʻllab-quvvatlashga qaratilgan tizimli islohotlar amalga oshirilmoqda.

Aytish joizki, Amudaryo tumani maktablarida malakali oʻqituvchilar koʻp. Xususan, 36-sonli maktabning fizika fani oʻqituvchisi Xushnud Chorshamov va matematika fani oʻqituvchisi Azim Saparboyevlar hamkorligida tashkil etilgan 11-“G” variativ sinfida 25 nafar oʻquvchi taʼlim olib, barchasi – 100 foiz OTMga kirishga muvaffaq boʻldilar. Shunisi eʼtiborliki, ulardan 12 nafari davlat granti, 13 nafari toʻlov-shartnoma asosida talabalikka qabul qilindilar. 40-sonli maktabning ingliz tili oʻqituvchisi Nurbek Jumaniyazov va matematika fani oʻqituvchisi Sherzod Ashirovlar hamkorligida tashkil etilgan 11-“D” variativ sinf oʻquvchilarining ham barchasi, shu jumladan 4 nafari davlat granti, 23 nafari toʻlov-shartnoma asosida talabalikka qabul qilindilar.

Amudaryolik pedagoglar joriy 2024-2025 oʻquv yilini ham yanada jipslik va birdamlik bilan boshladilar. Ular yosh avlod taʼlim-tarbiyasi yoʻlida yanada faol mehnat qilib, mamlakat kelajagi va xalq farovonligiga munosib hissa qoʻshadigan kadrlarni tarbiyalashni oʻz oldlariga maqsad qilib qoʻyganlar. Mana shunday qadrli va ardoqli ustozlarga bayram munosabati bilan yanada chuqur ehtirom koʻrsatilib, ularning fidoyi mehnatlari eʼtirof etildi. Bayram tadbiri soʻngida faol oʻqituvchilar, tajribali murabbiylar va ilgʻor tarbiyachilar tuman hokimligining tashakkurnomasi va esdalik sovgʻalari bilan taqdirlandi.

Fursatdan foydalanib, taʼlim-tarbiya sohasining barcha fidoyilarini, faxriy ustozlarni Oʻqituvchi va murabbiylar kuni – umumxalq bayrami bilan chin dildan tabriklab, oilalariga farovonlik, birdamlik, mustahkam sogʻlik tilaymiz.

Aziz ustoz va murabbiylar! Sizning saʼy-harakatlaringiz tufayli yosh avlod nafaqat ilm-fan sohasida, balki maʼnaviy va jismoniy jihatdan ham kamol topmoqda. Davlatimiz va jamiyatimiz Siz azizlarning mehnatlaringizni yuksak eʼtirof etadi va qadrlaydi. Doimo el-yurt ardogʻida, shogirdlaringizning eʼzozida boʻling, Oʻqituvchi va murabbiylar kuni muborak boʻlsin, aziz ustozlar!

Tahririyat