БИР МИСКИН КЎНГИЛНИ ШОД ЭТИШ – КАЪБАНИ ЗИЁРАТ ҚИЛГАН КАБИ САВОБДИР

Ҳа азизлар, кўнгли ярим, ўзгалар парваришига муҳтож инсонларга қувонч ва шодлик улашиш мисли Каъбани зиёрат қилган каби савоб, дейишади. Ҳақиқатдан ҳам, салгина меҳр-мурувватдан кўнгиллари тоғдай юксалиб, қалбларида самимият, миннатдорлик, ҳаётсеварлик туйғулари билан боққан нигоҳлардаги қувонч улар учун нақадар азиз. Назаримда, бу нигоҳлардаги ватанпарварлик, маънавий бирдамлик, ўзаро меҳр-оқибат каби эзгу фазилатлар ҳар биримизни янада кучлироқ ва янада жипсроқ бўлишга ундаётгандай.

Амударё тумани “Инсон” ижтимоий хизматлар маркази ҳамда “Нуроний” жамғармаси туман бўлинмаси ҳамкорлигида “Сиз ёлғиз эмассиз, ортингизда Ватан бор!” шиори остида ташкиллаштирилган “Эъзоз ва эътибор сизлар учун!” мавзусидаги маънавий-маърифий тадбирда ҳам инсон омилига эътибор, ғамхўрлик ва меҳр-оқибат каби инсоний фазилатлар улуғланиб, Амударё туманининг барча қишлоқ ва маҳаллаларида истиқомат қилувчи, ўзгалар парваришига муҳтож, ногиронлиги бўлган, шунингдек, якка-ёлғиз яшовчи юртдошларимиз эъзозланди.

Тадбирни “Нуроний” жамғармаси Амударё туман бўлинмаси раиси Бекман бобо Алламберганов самимий тилаклар билан очди ва олиб борди. “Инсон” ижтимоий хизматлар маркази шўъба мудири Ҳамиджон Норбоев, психологлар Мавлуда Тўраева, Юлдуз Султоновалар, шунингдек, тумандаги қишлоқ ва маҳаллаларда истиқомат қилувчи ногиронлиги бор бўлган фуқаролар, ўзгалар парваришига ва ижтимоий ҳимояга муҳтож якка-ёлғиз яшовчи фуқаролар иштирок этган мазкур тадбирда Бекман бобо Алламберганов мамлакатимизда ҳеч бир инсон давлатимиз эътибори ва ғамхўрлигидан четда қолмаслигини таъкидлаб, айниқса, ногиронлиги бўлган ўзгалар парваришига муҳтож инсонлар учун қулай шарт-шароитлар яратишга қаратилган чора-тадбирлар хусусида батафсил тўхталди.

Айниқса, муҳтарам Президентимиз кўрсатмалари билан кўчаларда, катта-катта савдо шохобчаларида, бозорларда, дам олиш уйлари, истироҳат боғлари ва йўловчи ташиш транспортларида ногирон инсонлар ва ўзгалар ёрдамига муҳтож инсонларнинг хавфсиз, эркин ҳаракатланишлари учун зарур шарт-шароитлар яратилаётгани, уларнинг турмуш фаровонлигини ошириш борасидаги амалий чора-тадбирлар, саломатликларини тиклаш мақсадида қилинаётган эътибор ва ғамхўрликлар ҳақида сўз юритди.

Тадбир давомида тажрибали психологлар Мавлуда Тўраева ҳамда Юлдуз Султоновалар томонидан “Нуронийлар учун илм зиёси” китобхонлик тадбири, фитнес-соғломлаштириш ва гимнастика машғулотлари ташкил этилиб, китобхонликнинг инсон ҳаётида тутган ўрни, спорт-соғломлаштириш, айниқса, фитнес-соғломлаштириш машғулотларининг аҳамияти бўйича маънавий соғломлик ҳамда жисмоний саломатлик юзасидан суҳбатлар ташкил этилди.

Шунингдек, психологлар тадбирнинг якуний қисмида “Ногиронларни психологик қўллаб-қувватлаш” мавзусида тренинг ҳам ташкил этишиб, тадбир иштирокчиларининг саволларига жавоблар беришди.

Юксак инсоний фазилатлар, меҳр-оқибат, қалбан бирдамлик туйғулари улуғланган, “Сиз ёлғиз эмассиз, ортингизда Ватан бор!” шиори остида ўтказилган “Эъзоз ва эътибор сизлар учун!” мавзусидаги тадбирда инсон қадри ҳамма нарсадан буюклиги амалда намоён бўлди.

Робия Йўлдошева.