BIR MISKIN KOʻNGILNI ShOD ETISh – KAʼBANI ZIYoRAT QILGAN KABI SAVOBDIR
Ha azizlar, koʻngli yarim, oʻzgalar parvarishiga muhtoj insonlarga quvonch va shodlik ulashish misli Kaʼbani ziyorat qilgan kabi savob, deyishadi. Haqiqatdan ham, salgina mehr-muruvvatdan koʻngillari togʻday yuksalib, qalblarida samimiyat, minnatdorlik, hayotsevarlik tuygʻulari bilan boqqan nigohlardagi quvonch ular uchun naqadar aziz. Nazarimda, bu nigohlardagi vatanparvarlik, maʼnaviy birdamlik, oʻzaro mehr-oqibat kabi ezgu fazilatlar har birimizni yanada kuchliroq va yanada jipsroq boʻlishga undayotganday.
Amudaryo tumani “Inson” ijtimoiy xizmatlar markazi hamda “Nuroniy” jamgʻarmasi tuman boʻlinmasi hamkorligida “Siz yolgʻiz emassiz, ortingizda Vatan bor!” shiori ostida tashkillashtirilgan “Eʼzoz va eʼtibor sizlar uchun!” mavzusidagi maʼnaviy-maʼrifiy tadbirda ham inson omiliga eʼtibor, gʻamxoʻrlik va mehr-oqibat kabi insoniy fazilatlar ulugʻlanib, Amudaryo tumanining barcha qishloq va mahallalarida istiqomat qiluvchi, oʻzgalar parvarishiga muhtoj, nogironligi boʻlgan, shuningdek, yakka-yolgʻiz yashovchi yurtdoshlarimiz eʼzozlandi.
Tadbirni “Nuroniy” jamgʻarmasi Amudaryo tuman boʻlinmasi raisi Bekman bobo Allamberganov samimiy tilaklar bilan ochdi va olib bordi. “Inson” ijtimoiy xizmatlar markazi shoʻʼba mudiri Hamidjon Norboyev, psixologlar Mavluda Toʻrayeva, Yulduz Sultonovalar, shuningdek, tumandagi qishloq va mahallalarda istiqomat qiluvchi nogironligi bor boʻlgan fuqarolar, oʻzgalar parvarishiga va ijtimoiy himoyaga muhtoj yakka-yolgʻiz yashovchi fuqarolar ishtirok etgan mazkur tadbirda Bekman bobo Allamberganov mamlakatimizda hech bir inson davlatimiz eʼtibori va gʻamxoʻrligidan chetda qolmasligini taʼkidlab, ayniqsa, nogironligi boʻlgan oʻzgalar parvarishiga muhtoj insonlar uchun qulay shart-sharoitlar yaratishga qaratilgan chora-tadbirlar xususida batafsil toʻxtaldi.
Ayniqsa, muhtaram Prezidentimiz koʻrsatmalari bilan koʻchalarda, katta-katta savdo shoxobchalarida, bozorlarda, dam olish uylari, istirohat bogʻlari va yoʻlovchi tashish transportlarida nogiron insonlar va oʻzgalar yordamiga muhtoj insonlarning xavfsiz, erkin harakatlanishlari uchun zarur shart-sharoitlar yaratilayotgani, ularning turmush farovonligini oshirish borasidagi amaliy chora-tadbirlar, salomatliklarini tiklash maqsadida qilinayotgan eʼtibor va gʻamxoʻrliklar haqida soʻz yuritdi.
Tadbir davomida tajribali psixologlar Mavluda Toʻrayeva hamda Yulduz Sultonovalar tomonidan “Nuroniylar uchun ilm ziyosi” kitobxonlik tadbiri, fitnes-sogʻlomlashtirish va gimnastika mashgʻulotlari tashkil etilib, kitobxonlikning inson hayotida tutgan oʻrni, sport-sogʻlomlashtirish, ayniqsa, fitnes-sogʻlomlashtirish mashgʻulotlarining ahamiyati boʻyicha maʼnaviy sogʻlomlik hamda jismoniy salomatlik yuzasidan suhbatlar tashkil etildi.
Shuningdek, psixologlar tadbirning yakuniy qismida “Nogironlarni psixologik qoʻllab-quvvatlash” mavzusida trening ham tashkil etishib, tadbir ishtirokchilarining savollariga javoblar berishdi.
Yuksak insoniy fazilatlar, mehr-oqibat, qalban birdamlik tuygʻulari ulugʻlangan, “Siz yolgʻiz emassiz, ortingizda Vatan bor!” shiori ostida oʻtkazilgan “Eʼzoz va eʼtibor sizlar uchun!” mavzusidagi tadbirda inson qadri hamma narsadan buyukligi amalda namoyon boʻldi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
