Туман сайлов комиссияси: сайловга қизғин тайёргарлик кўрилмоқда

Айни кунларда мамлакатимизда муҳим сиёсий жараён – Олий Мажлис қонунчилик палатаси ва маҳаллий Кенгашларга ўтказиладиган сайловларга тайёргарлик ишлари қизғин паллага кирди. Амалдаги қонунчиликка кўра бу жараёнга Марказий сайлов комиссияси, ҳудудий сайлов комиссиялари, туман ва шаҳар сайлов комиссиялари ҳамда халқ депутатлари вилоятлар ва Тошкент шаҳар Кенгашларига сайлов ўтказиш бўйича округ сайлов комиссиялари, участка сайлов комиссиялари томонидан пухта тайёргарлик кўрилмоқда.

Амударё тумани сайлов комиссияси ҳам бу борада самарали фаолият олиб бормоқда. Туман сайлов комиссиясининг қарори билан бир мандатли сайлов округлари тузилиб, уларнинг чегаралари, сайловчилар сони тўғрисидаги маълумотлар оммавий ахборот воситаларида эълон қилинди. Белгиланган муддатларда Халқ депутатлари туман Кенгаши депутатлигига номзодлар кўрсатган сиёсий партиялардан зарур ҳужжатлар қабул қилиб олиниб, 125 нафар депутатликка номзодлар рўйхатга олинди ҳамда уларга гувоҳномалар берилди.

Комиссия аъзолари номзодларга ва сиёсий партияларга сайлов кампаниясида иштирок этиш учун тенг шароитларни яратган ҳолда сайловни моддий-техник жиҳатдан таъминлашга доир масалаларни ҳал қилишда фаоллик кўрсатмоқда.

Туман сайлов комиссияси туман ҳудудидаги сиёсий партиялар, бошқа жамоат бирлашмалари, маҳаллий давлат ҳокимияти органлари, фуқароларнинг ўзини ўзи бошқариш органлари вакилларининг ҳамда корхоналар, муассасалар ва ташкилотлар раҳбарларининг сайловга тайёргарлик кўриш ҳамда уни ўтказиш билан боғлиқ масалалар юзасидан ахборотини эшитиб, сайлов жараёнига тайёргарлик кўриш ишларини назорат қилиб бормоқда.

Сайловчилар рўйхатларининг тузилишини ва ҳамма танишиб чиқиши учун тақдим этилишини назорат қилиш ҳам туман сайлов комиссиясининг ваколатига киради. Туман сайлов комиссияси ва участка сайлов комиссиялари сайлов жараёнини бошқариш ахборот тизимига уланган бўлиб, тумандаги сайловчиларнинг дастлабки рўйхати шакллантирилган.

Комиссия томонидан Ҳалқ депутатлари Амударё туман Кенгаши депутатлигига номзодлар рўйхатга олинган бўлиб, айни кунларда номзодлар ва сиёсий партиялар вакиллари сайловолди ташвиқот ишларини амалга оширмоқдалар. Сайловолди ташвиқоти доирасида одамлар гавжум жойларга сиёсий партияларнинг мақсад ва вазифалари, номзодларнинг сайловолди дастурига оид баннерлар  ва бошқа тарғибот воситалари жойлаштирилган бўлиб, жойларда сайловчилар билан учрашувлар белгиланган жадвал асосида ташкил қилинмоқда.

Байроқ, герб, яширин овоз бериш кабинаси, стационар ва кўчма овоз бериш қутиси каби сайлов жиҳозларини участка сайлов комиссияларига етказиш ишлари сайловга тайёргарлик кўриш ва уни ўтказиш бўйича туман сайлов комиссиясининг календарь режасида кўрсатилган муддатларда амалга оширилди. Эндиликда туман сайлов комиссияси томонидан муддатидан олдин овоз бериш ва сайлов куни овоз бериш учун сайлов бюллетенларини тайёрлаш ва уларни сайлов участкаларига етказиб беришга тайёргарлик кўрилмоқда.

Тасдиқланган календарь режасига асосан 16 октябрга қадар овоз бериш куни, вақти ва жойи тўғрисида сайловчиларни хабардор қилиш, 16-23 октябрь кунлари муддатидан олдин овоз беришни ташкил этиш ва 27 октябрь куни, яъни сайлов кунида соат 8:00дан 20:00гача овоз беришни қонун талаблари асосида ташкил этиш кўзда тутилган.

Я.Шамуратов, Халқ депутатлари Амударё туман Кенгашига сайлов ўтказувчи туман сайлов комиссияси раиси