“Global position system” МЧЖнинг Амударё туман филиали томонидан қаттиқ маиший чиқиндилар ўз вақтида олиб чиқилмоқда

Йирик ишлаб чиқариш корхоналари, тадбиркорлик субъектлари ҳамда аҳоли хонадонларидан қаттиқ маиший чиқиндиларни ўз вақтида чиқинди полигонларига олиб чиқиб ташлаш, аввало атроф-муҳит тозалигини сақлаш, қолаверса, экологик вазиятни соғломлаштириш имконини беради. Шу боис, мамлакатимизда мазкур йўналишдаги ишларни замон талаблари даражасида ташкил этиш, соҳани модернизация қилиш билан бир қаторда моддий-техник таъминотини яхшилашга ҳам алоҳида эътибор қаратилмоқда.

Ўзбекистон Республикаси Президентининг 2020 йил 29 сентябрдаги “Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида”ги Қарорига мувофиқ, 2023 йилнинг 20 январь санасида Қорақалпоғистон Республикаси Вазирлар Кенгаши ҳамда Давлат экология қўмитасининг ҳудудий органи билан хусусий шерик, яъни “Global position system” МЧЖ ўртасида давлат-хусусий шериклик тўғрисида битим имзоланган эди. Мазкур битимга биноан “Global position system” МЧЖ Амударё, Тахтакўпир, Қораўзак туманларининг қаттиқ ва маиший чиқиндиларини олиб чиқиш бўйича хизматлар кўрсатиш ҳамда 18 млрд сўмлик инвестиция киритиш мажбуриятини олган эди.

Ушбу мажбуриятни бажариш мақсадида корхона томонидан шу кунгача 5 млрд 52 млн сўмлик инвестиция маблағлари киритилди. Белгиланган ҳудудлардан қаттиқ маиший чиқиндиларни санитария-гигиена қоидалари ҳамда экологик талаблар даражасида чиқинди полигонларига олиб чиқиб ташлашни таъминлаш мақсадида корхона томонидан жами 7та махсус чиқинди ташувчи автотранспорт техникалари харид қилинди. “Самарқанд авто” заводида ишлаб чиқарилган “ИСУЗУ” русумли, 12 куб метр ҳажмли 2 та махсус чиқинди ташувчи автотранспорт воситаси, Хитойда ишлаб чиқарилган “Shachman” русумли 8 куб метр ҳажмли техника ва 1 дона "ИСУЗУ" русумли мультилифт техникалари Амударё туманига олиб келинди ва туман ҳокимлиги олдидаги майдонда ҳоким ўринбосари Баҳодир Эрназаров томонидан ҳайдовчиларга топширилди.

Айни пайтда “Global position system” МЧЖ Амударё тумани филиалида аҳолига хизмат кўрсатиш учун 20 та махсус қаттиқ маиший чиқиндиларни йиғиш техникалари мавжуд бўлиб, 17 та чиқинди ташиш машинаси, 2та мультилифт, 1та ассенизатор техникасидан самарали фойдаланилмоқда.

Бу техникалар нафақат ишни сифатли ва самарали олиб бориш, балки ушбу йўналишда камида 10 та янги иш ўрни яратиш имконини ҳам берди. Ҳозирги кунда корхонада жами 60 нафар ишчи-ходимлар фаолият юритишмоқда.

Ўзбекистон Республикаси Вазирлар Маҳкамасининг 2019 йил 6 февралдаги 95-сонли қарорига мувофиқ фуқаролар йиғинлари раислари билан биргаликда жисмоний шахсларга маиший чиқиндиларни тўплаш ва олиб чиқиш учун хизматлар кўрсатиш бўйича намунавий оммавий шартнома тузилиши кўрсатиб ўтилган. Шунга кўра тумандаги 49 та фуқаролар йиғинлари билан оммавий шартномалар, юридик ташкилотлар билан 344 та шартнома тузилди. Ушбу шартномаларга мувофиқ мунтазам равишда қаттиқ маиший чиқиндиларнинг “Сигнал” усулида олиб чиқиб кетилиши таьминланмоқда.

Амалга оширилаётган бу каби изчил чора-тадбирлар туфайли ҳудудларда қаттиқ маиший чиқиндилар тўпланиб қолишига барҳам берилиб, атроф-муҳит ифлосланиши ва экологик вазият бузилишининг олди олинмоқда.

Равшан Баҳромов.