“Global position system” MChJning Amudaryo tuman filiali tomonidan qattiq maishiy chiqindilar oʻz vaqtida olib chiqilmoqda

Yirik ishlab chiqarish korxonalari, tadbirkorlik subʼektlari hamda aholi xonadonlaridan qattiq maishiy chiqindilarni oʻz vaqtida chiqindi poligonlariga olib chiqib tashlash, avvalo atrof-muhit tozaligini saqlash, qolaversa, ekologik vaziyatni sogʻlomlashtirish imkonini beradi. Shu bois, mamlakatimizda mazkur yoʻnalishdagi ishlarni zamon talablari darajasida tashkil etish, sohani modernizatsiya qilish bilan bir qatorda moddiy-texnik taʼminotini yaxshilashga ham alohida eʼtibor qaratilmoqda.

Oʻzbekiston Respublikasi Prezidentining 2020-yil 29-sentyabrdagi “Maishiy va qurilish chiqindilari bilan bogʻliq ishlarni boshqarish tizimini yanada takomillashtirish chora-tadbirlari toʻgʻrisida”gi Qaroriga muvofiq, 2023-yilning 20-yanvar sanasida Qoraqalpogʻiston Respublikasi Vazirlar Kengashi hamda Davlat ekologiya qoʻmitasining hududiy organi bilan xususiy sherik, yaʼni “Global position system” MChJ oʻrtasida davlat-xususiy sheriklik toʻgʻrisida bitim imzolangan edi. Mazkur bitimga binoan “Global position system” MChJ Amudaryo, Taxtakoʻpir, Qoraoʻzak tumanlarining qattiq va maishiy chiqindilarini olib chiqish boʻyicha xizmatlar koʻrsatish hamda 18 mlrd soʻmlik investitsiya kiritish majburiyatini olgan edi.

Ushbu majburiyatni bajarish maqsadida korxona tomonidan shu kungacha 5 mlrd 52 mln soʻmlik investitsiya mablagʻlari kiritildi. Belgilangan hududlardan qattiq maishiy chiqindilarni sanitariya-gigiyena qoidalari hamda ekologik talablar darajasida chiqindi poligonlariga olib chiqib tashlashni taʼminlash maqsadida korxona tomonidan jami 7ta maxsus chiqindi tashuvchi avtotransport texnikalari xarid qilindi. “Samarqand avto” zavodida ishlab chiqarilgan “ISUZU” rusumli, 12 kub metr hajmli 2 ta maxsus chiqindi tashuvchi avtotransport vositasi, Xitoyda ishlab chiqarilgan “Shachman” rusumli 8 kub metr hajmli texnika va 1 dona "ISUZU" rusumli multilift texnikalari Amudaryo tumaniga olib kelindi va tuman hokimligi oldidagi maydonda hokim oʻrinbosari Bahodir Ernazarov tomonidan haydovchilarga topshirildi.

Ayni paytda “Global position system” MChJ Amudaryo tumani filialida aholiga xizmat koʻrsatish uchun 20 ta maxsus qattiq maishiy chiqindilarni yigʻish texnikalari mavjud boʻlib, 17 ta chiqindi tashish mashinasi, 2ta multilift, 1ta assenizator texnikasidan samarali foydalanilmoqda.

Bu texnikalar nafaqat ishni sifatli va samarali olib borish, balki ushbu yoʻnalishda kamida 10 ta yangi ish oʻrni yaratish imkonini ham berdi. Hozirgi kunda korxonada jami 60 nafar ishchi-xodimlar faoliyat yuritishmoqda.

Oʻzbekiston Respublikasi Vazirlar Mahkamasining 2019-yil 6-fevraldagi 95-sonli qaroriga muvofiq fuqarolar yigʻinlari raislari bilan birgalikda jismoniy shaxslarga maishiy chiqindilarni toʻplash va olib chiqish uchun xizmatlar koʻrsatish boʻyicha namunaviy ommaviy shartnoma tuzilishi koʻrsatib oʻtilgan. Shunga koʻra tumandagi 49 ta fuqarolar yigʻinlari bilan ommaviy shartnomalar, yuridik tashkilotlar bilan 344 ta shartnoma tuzildi. Ushbu shartnomalarga muvofiq muntazam ravishda qattiq maishiy chiqindilarning “Signal” usulida olib chiqib ketilishi taminlanmoqda.

Amalga oshirilayotgan bu kabi izchil chora-tadbirlar tufayli hududlarda qattiq maishiy chiqindilar toʻplanib qolishiga barham berilib, atrof-muhit ifloslanishi va ekologik vaziyat buzilishining oldi olinmoqda.

Ravshan Bahromov.