АРНАБЎЙИ МАҲАЛЛАСИ ОБОД ВА ФАРОВОН ГЎШАГА АЙЛАНМОҚДА: БУ МАҲАЛЛА ҲУДУДИДА БЎЛИБ ЎТГАН СЕМИНАРДА ЭЪТИРОФ ЭТИЛДИ

Сўнгги йилларда мамлакатимизда кўкаламзорлаштириш, ўсимликларни муҳофаза қилиш ҳамда яшил майдонларни кенгайтириш борасида кенг кўламли ишлар амалга оширилмоқда. Кўчат экиб, боғ яратиш – халқимизнинг азалий қадриятларидан бири. Зеро, ўзимиз яшаб турган жойни ободонлаштириш ва кўкаламзорлаштириш туфайли кўнглимиз шодликка тўлади, турмушимиз файзли ва фаровон бўлади. Муҳтарам Президентимиз томонидан Олий Мажлис Қонунчилик палатасининг навбатдаги йиғилишида 2025 йилга “Атроф-муҳитни асраш ва “яшил” иқтисодиёт йили” деб эълон қилингани Янги Ўзбекистонда она табиатни асраб-авайлаб, экологик барқарорликни таъминлашга қаратилган юксак эътиборнинг амалий ифодаси бўлди.

Aйни чоғда боғлар, кўчалар ҳамда йўл четларида яшнаб турган дарахтлар теварак-атрофга кўрк улашиши баробарида ҳаво мусаффолигини таъминлаб, дастурхонимизни мевалар билан тўлдиради. Дарахтларга меҳр бериш, уларни парваришлаш энг эзгу ва хайрли амал саналади. Кўчат экиб, боғ яратиш, атроф-муҳитни тоза ва озода сақлаш халқимизнинг асрлар синовидан ўтган миллий қадриятидир. Зеро, аждодларимиз оилада янги туғилган фарзандга атаб ерга ниҳол қадаган. Ўша дарахт билан бирга фарзанд ҳам улғайган.

Демак, халқимизнинг ибратли ўтмиши ўзимиз яшаётган муҳитда табиатга оқилона муносабатда бўлиб, уни асраб авайлаш, келгуси авлодлар ҳам яшаши учун қулай макон барпо этишга ундайди. Бу борада мамлакатимиз бўйлаб кенг қулоч ёйган “яшил макон” умуммиллий лойиҳаси доирасида амалга оширилаётган ишлар муҳим аҳамият касб этмоқда.

Амударё туманининг Арна бўйи маҳалла фуқаролар йиғинида бўлиб ўтган кўргазмали семинарда ҳам ҳудудларни кўкаламзор гўшага айлантириш, тумандаги боғ, ток қатор оралари ва дала четларидан самарали фойдаланиш, аҳоли томорқалари, гузар йўл бўйлари ҳамда бўш ётган ерларга мевали ва манзарали дарахт кўчатларини экиш орқали экспортбоп ҳўл ва қуруқ мевалар етиштиришни кўпайтириш масалалари атрофлича муҳокама қилинди.

Семинарда Ўзбекистон фермер, деҳқон хўжаликлари ва томорқа ер эгалари Кенгаши бўлим бошлиғи Меҳриддин Муҳаммадиев, Қорақалпоғистон фермер, деҳқон хўжаликлари ва томорқа ер эгалари Кенгаши раисининг ўринбосари Фахриддин Беканов, туман фермер, деҳқон хўжаликлари ва томорқа ер эгалари Кенгаши раиси Илҳом Полвонов, Кенгаш мутахассислари, Арна бўйи маҳалла фуқаролар йиғини масъуллари ҳамда маҳалла фаоллари, тажрибали томорқа ер эгалари, нуронийлар катнашдилар.

Тадбирда масъуллар томонидан ерларнинг мелиоратив хусусиятига мувофиқ равишда қандай кўчатлар экиш зарурлиги ва уларниниг тупроққа илдиз қўйиб, яхши ривожланиб кетишини таъминлашга қаратилган агротехник чора-тадбирлар юзасидан муҳим йўл-йўриқлар ва тавсиялар берилди. Шу билан бирга, кеч кузда экилган тўқсонбости экинлар парвариши бўйича ҳам зарур маълумотлар тақдим этилди.

Шундан сўнг, семинар иштирокчилари Арнабўйи маҳалласи ҳудудига мевали ва манзарали дарахт кўчатларини ўтқазишди. Аҳолининг “яшил макон” умуммиллий лойиҳаси доирасидаги кўчат экиш мавсумида фаол иштирокини таъминлаш мақсадида маҳалла аҳлига 10тадан мевали ва манзарали дарахт кўчатлари тарқатилди.

– Шундай бир кун келади, Арнабўйи маҳалласи Амударё туманининг энг обод, фаровон ва кўкаламзор гўшаларидан бирига айланади, – деди семинарда сўзга чиққан Ўзбекистон фермер, деҳқон хўжаликлари ва томорқа ер эгалари Кенгаши бўлим бошлиғи Меҳриддин Муҳаммадиев.

Ҳақиқатдан ҳам маҳалла аҳлининг саъй-ҳаракатлари билан амалга оширилаётган кўчат экиш, боғ яратиш ишлари кўзларни қувонтиради. Маҳалланинг ҳар бир қарич ери бугунги ёш авлод кўз ўнгида тобора обод бўлиб бораётгани бунинг яққол далилидир.

Равшан Баҳромов.