ARNABOʻYI MAHALLASI OBOD VA FAROVON GOʻShAGA AYLANMOQDA: BU MAHALLA HUDUDIDA BOʻLIB OʻTGAN SEMINARDA EʼTIROF ETILDI

Soʻnggi yillarda mamlakatimizda koʻkalamzorlashtirish, oʻsimliklarni muhofaza qilish hamda yashil maydonlarni kengaytirish borasida keng koʻlamli ishlar amalga oshirilmoqda. Koʻchat ekib, bogʻ yaratish – xalqimizning azaliy qadriyatlaridan biri. Zero, oʻzimiz yashab turgan joyni obodonlashtirish va koʻkalamzorlashtirish tufayli koʻnglimiz shodlikka toʻladi, turmushimiz fayzli va farovon boʻladi. Muhtaram Prezidentimiz tomonidan Oliy Majlis Qonunchilik palatasining navbatdagi yigʻilishida 2025-yilga “Atrof-muhitni asrash va “yashil” iqtisodiyot yili” deb eʼlon qilingani Yangi Oʻzbekistonda ona tabiatni asrab-avaylab, ekologik barqarorlikni taʼminlashga qaratilgan yuksak eʼtiborning amaliy ifodasi boʻldi.

Ayni chogʻda bogʻlar, koʻchalar hamda yoʻl chetlarida yashnab turgan daraxtlar tevarak-atrofga koʻrk ulashishi barobarida havo musaffoligini taʼminlab, dasturxonimizni mevalar bilan toʻldiradi. Daraxtlarga mehr berish, ularni parvarishlash eng ezgu va xayrli amal sanaladi. Koʻchat ekib, bogʻ yaratish, atrof-muhitni toza va ozoda saqlash xalqimizning asrlar sinovidan oʻtgan milliy qadriyatidir. Zero, ajdodlarimiz oilada yangi tugʻilgan farzandga atab yerga nihol qadagan. Oʻsha daraxt bilan birga farzand ham ulgʻaygan.

Demak, xalqimizning ibratli oʻtmishi oʻzimiz yashayotgan muhitda tabiatga oqilona munosabatda boʻlib, uni asrab avaylash, kelgusi avlodlar ham yashashi uchun qulay makon barpo etishga undaydi. Bu borada mamlakatimiz boʻylab keng quloch yoygan “yashil makon” umummilliy loyihasi doirasida amalga oshirilayotgan ishlar muhim ahamiyat kasb etmoqda.

Amudaryo tumanining Arna boʻyi mahalla fuqarolar yigʻinida boʻlib oʻtgan koʻrgazmali seminarda ham hududlarni koʻkalamzor goʻshaga aylantirish, tumandagi bogʻ, tok qator oralari va dala chetlaridan samarali foydalanish, aholi tomorqalari, guzar yoʻl boʻylari hamda boʻsh yotgan yerlarga mevali va manzarali daraxt koʻchatlarini ekish orqali eksportbop hoʻl va quruq mevalar yetishtirishni koʻpaytirish masalalari atroflicha muhokama qilindi.

Seminarda Oʻzbekiston fermer, dehqon xoʻjaliklari va tomorqa yer egalari Kengashi boʻlim boshligʻi Mehriddin Muhammadiyev, Qoraqalpogʻiston fermer, dehqon xoʻjaliklari va tomorqa yer egalari Kengashi raisining oʻrinbosari Faxriddin Bekanov, tuman fermer, dehqon xoʻjaliklari va tomorqa yer egalari Kengashi raisi Ilhom Polvonov, Kengash mutaxassislari, Arna boʻyi mahalla fuqarolar yigʻini masʼullari hamda mahalla faollari, tajribali tomorqa yer egalari, nuroniylar katnashdilar.

Tadbirda masʼullar tomonidan yerlarning meliorativ xususiyatiga muvofiq ravishda qanday koʻchatlar ekish zarurligi va ularninig tuproqqa ildiz qoʻyib, yaxshi rivojlanib ketishini taʼminlashga qaratilgan agrotexnik chora-tadbirlar yuzasidan muhim yoʻl-yoʻriqlar va tavsiyalar berildi. Shu bilan birga, kech kuzda ekilgan toʻqsonbosti ekinlar parvarishi boʻyicha ham zarur maʼlumotlar taqdim etildi.

Shundan soʻng, seminar ishtirokchilari Arnaboʻyi mahallasi hududiga mevali va manzarali daraxt koʻchatlarini oʻtqazishdi. Aholining “yashil makon” umummilliy loyihasi doirasidagi koʻchat ekish mavsumida faol ishtirokini taʼminlash maqsadida mahalla ahliga 10tadan mevali va manzarali daraxt koʻchatlari tarqatildi.

– Shunday bir kun keladi, Arnaboʻyi mahallasi Amudaryo tumanining eng obod, farovon va koʻkalamzor goʻshalaridan biriga aylanadi, – dedi seminarda soʻzga chiqqan Oʻzbekiston fermer, dehqon xoʻjaliklari va tomorqa yer egalari Kengashi boʻlim boshligʻi Mehriddin Muhammadiyev.

Haqiqatdan ham mahalla ahlining saʼy-harakatlari bilan amalga oshirilayotgan koʻchat ekish, bogʻ yaratish ishlari koʻzlarni quvontiradi. Mahallaning har bir qarich yeri bugungi yosh avlod koʻz oʻngida tobora obod boʻlib borayotgani buning yaqqol dalilidir.

Ravshan Bahromov.