1-СОНЛИ УМУМТАЪЛИМ МАКТАБИДА “КОНСТИТУЦИЯМ – ФАХРИМ” МАВЗУСИДА ТАДБИР ЎТКАЗИЛДИ
Ўқувчи-ёшларнинг ҳуқуқий маданиятини янада юксалтиришга ҳисса қўшиш мақсадида Амударё тумани Мактабгача ва мактаб таълими бўлимига қарашли 1-сонли умумтаълим мактабида “Конституциям – фахрим” мавзусида маънавий маърифий ва адабий-мусиқий тадбир ташкил қилинди.
Тадбирда Янги таҳрирдаги Ўзбекистон Республикаси Конституциясида мамлакатимизнинг яқин ва узоқ истиқболдаги барқарор тараққиёти, халқимиз фаровон ва осойишта ҳаётининг мустаҳкам ва ишончли кафолати, инсоннинг шахсий ҳуқуқлари ва эркинликлари, мактаб таълими, шахснинг саломатлиги, атроф-муҳит муҳофазаси, миллатлараро тотувлик, тинчлик ва тенглик каби принциплар қонуний мустаҳкамлаб қўйилгани эътироф этилди.
Мактабнинг ижтимоий фанлар ўқитувчилари томонидан ташкил этилган мазкур тадбирда мактаб педагогика жамоаси, Миллий гвардия инспектори, тарбиячи-психолог Нурлан Ўразбаев ҳамда юқори синф ўқувчилари иштирок этдилар.
Тадбирни мактаб директори Дилрабо Шербоева очди ва барчани Бош Қомусимиз қабул қилинганлигининг 32 йиллиги билан самимий табриклади. Дилрабо Шербоева Конституциямизнинг ҳар бир боби тўғрисида алоҳида тўхталиб, бугунги фаровон, тинч ва осойишта ҳаётимизни барпо этишда Бош Қомусимизда белгилаб қўйилган нормаларнинг аҳамияти катталигини, жамиятимизнинг ҳар томонлама тараққий этишида муҳим ҳуқуқий асос бўлган Конституция ҳар бир фуқаро учун истиқболли режаларни амалга ошириш йўлида дастуриламал бўлиб хизмат қилишини, айниқса, ўқувчи-ёшларнинг конституциявий билимларини ошириш, ушбу ҳуқуқий ҳужжатни моддама-модда чуқур ўрганишларини таъминлаш ҳар бир педагог ходимнинг зиммасидаги масъулиятли вазифаси эканлигини таъкидлади.
Шунингдек, тадбирда Миллий гварди инспектори, тарбиячи-психолог Нурлан Ўразбаев ва ижтимоий фанлар ўқитувчилари ҳам Янги таҳрирдаги Ўзбекистон Республикаси Конституцияси тўғрисида, хусусан, Бош Қомусимизга киритилган ўзгартиришлар, янги нормалар ҳақида батафсил сўз юритишиб, унда инсонпарварлик ва халқпарварлик тамойиллари янада мустаҳкамланганини мисоллар билан ифодалаб бердилар.
Тадбирнинг адабий-мусиқий қисмида мактабнинг юқори синфлар ўқувчилари ўзларининг Конституция билимдонлари сифатидаги маҳоратларини амалда намоён этишди ва ҳар бир модда бўйича шеърий таърифлар беришди. Конституциямизни мадҳ этувчи куй ва қўшиқлар эса ҳар бир қалбга Бош Қомусимиздан фахрланиш туйғусини бағишлади. Ўқувчи- ёшлар Конституциямиз қабул қилинганининг 32 йиллигини устозлари ва тадбир меҳмонлари билан биргаликда тинчлик, дўстлик, миллатлараро тотувлик ва тенглик мадҳ этилган куй-қўшиқлар, рақслар орқали фахр-у ифтихор билан тантанали нишонладилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
