Бештомлик оила кир ювиш машинаси харид қилиб, "Дамас" автомобилини ютиб олди

Сўнгги йилларда мамлакатимизда тадбиркорликни ривожлантириш ва хусусий секторни қўллаб-қувватлашга алоҳида эътибор қаратилмоқда. Хусусан, савдо соҳасида бизнесни юритиш учун қулай шароитлар яратилмоқда. Янги қонун ва норматив ҳужжатлар тадбиркорларга солиқ юкини камайтириш, кредит олишни осонлаштириш ва сармоя киритиш учун хавф-хатарларни қисқартиришга хизмат қилмоқда.

Ишбилармонларга ер майдонлари ажратиш, савдо биноларини қуриш ва қайта реконструкция қилиш учун давлат томонидан кўмак берилаётгани уларга ўз бизнесини кенгайтириш имконини бермоқда. Бу каби чора-тадбирлар савдо соҳасининг ўсишига туртки бераётгани шубҳасиз.

Амударё туманида ҳам давлатимизнинг ана шундай имконият ва имтиёзларидан фойдаланиб, самарали фаолият олиб бораётган, нафақат бизнесини кенгайтириб, балки харидорларни хурсанд қилиш учун турли акциялар ўтказиб, халқимизнинг дуосини олаётган тадбиркорлар сафи кенгайиб бормоқда. Шундай тадбиркорлардан бири Бахтиёр Ўразимбетов бўлиб, у “Техно орай” брендининг асосчиси ҳисобланади. Ушбу бренд остида Манғит шаҳрида “IDEAL” ва Чойкўл овулида “PREMIER” дўконлари мижозларга сифатли хизмат кўрсатиб келмоқда.

Мазкур дўконлар бир неча ой илгари харидорлар учун “Манфаатли харид” мега акциясини эълон қилган эди. Акция шартига кўра “Техно орай” брендининг исталган дўконидан бир ярим миллион сўмдан ортиқ миқдорда харидни амалга оширган ҳар бир мижоз ушбу мега акцияда иштирок этиш имкониятига эга бўлди. Нафақат нақд пулга, балки 24 ойгача бўлиб тўлаш йўли билан маҳсулот харид қилган мижозлар ҳам акцияда иштирок этишди.

Дўконлардан дунёга таниқли брендлар ва маҳаллий ишлаб чиқарувчилардан маиший техника, офис жиҳозлари, уй-рўзғор буюмлари ҳамда турли гаджетларни арзон нархларда харид қилган ва акция якунидаги телеўйинда омади келган иштирокчилар ютуқлардан бирининг эгаси бўлиши мумкинлиги ҳақидаги рекламалар харидорлар сонини янада оширди.

2024 йил 28 декабрь куни ушбу акцияга якун ясалиб, “ATV” телеканалининг жонли эфирида тасодифий танлаш йўли билан ғолиблар аниқланди. Жамоат ташкилотлари, блогерлар ва маҳалла фаолларидан иборат ҳакамлар иштирокида 4та телевизор, 3та кир ювиш машинаси, 2та газ плитаси ва бош соврин – “Дамас” автомобилининг эгалари аниқланди.

Холис ва одилона ўтган ўйин натижаси кўра супер ютуқ – “Дамас” автомобили Бештом маҳалласида яшовчи Бекат Турғанбаевга насиб қилди.

2024 йил 29 декабрь куни ушбу ютуқ савдо мажмуаси раҳбарияти, блогерлар ва маҳалла фаоллари, жамоатчилик вакиллари иштирокида ғолибга тантанали равишда топширилди.

Рўзғори учун кир ювиш машинаси харид қилган ва омади келиб, “Дамас” автомобилини ютиб олган мижознинг ва оила аъзолари, қўни-қўшнилари ҳамда яқинларининг қувончини сўз билан таърифлаш қийин. Янги йил байрамини кутилмаган катта совға билан қарши олган оилага ҳавас қилиб, йиғилганлар ҳам яхши тилаклар тилашди.

Айтиш жоизки, мамлакатимизда тадбиркорлик муҳитининг ривожланиши ва савдо шохобчалари сонининг ортиши билан соғлом рақобат муҳити ҳам ривожланмоқда. Савдо соҳасида рақобат кучайиши товарлар ва хизматлар нархининг пасайишига олиб келмоқда. Нархларнинг тушиши нафақат харидорлар учун молиявий жиҳатдан қулайлик яратмоқда, балки тадбиркорларни ҳам ўз маҳсулотлари ва хизматларини сифат жиҳатдан яхшилашга ундамоқда.

Бугунги кунда ҳар бир тадбиркор учун харидорларнинг ишончи муҳим омил бўлиб, у бозорда муваффақиятли фаолият юритишнинг асосий шартидир. Шу боис, “IDEAL” ва “PREMIER” дўконларида маҳсулотларнинг турли-туманлиги ва уларнинг сифатини яхшилаш, энг муҳими нархларнинг ҳамёнбоплигини таъминлаш устувор вазифалардан бирига айланган.

Дўконлар маъмурияти бундан кейин ҳам харидорларни жалб қилиш ва рағбатлантириш мақсадида инновацион ёндашувларни қўллашни ният қилган. Турли хил чегирмалар, бонуслар ва акциялар ташкил этиб, мижозлар учун янада фойдали шароитлар яратиш, мижозларни хурсанд қилиш “Техно орай” бренди остида хизмат кўрсатаётган дўконларнинг бош шиорига айланган.