Beshtomlik oila kir yuvish mashinasi xarid qilib, "Damas" avtomobilini yutib oldi

Soʻnggi yillarda mamlakatimizda tadbirkorlikni rivojlantirish va xususiy sektorni qoʻllab-quvvatlashga alohida eʼtibor qaratilmoqda. Xususan, savdo sohasida biznesni yuritish uchun qulay sharoitlar yaratilmoqda. Yangi qonun va normativ hujjatlar tadbirkorlarga soliq yukini kamaytirish, kredit olishni osonlashtirish va sarmoya kiritish uchun xavf-xatarlarni qisqartirishga xizmat qilmoqda.

Ishbilarmonlarga yer maydonlari ajratish, savdo binolarini qurish va qayta rekonstruktsiya qilish uchun davlat tomonidan koʻmak berilayotgani ularga oʻz biznesini kengaytirish imkonini bermoqda. Bu kabi chora-tadbirlar savdo sohasining oʻsishiga turtki berayotgani shubhasiz.

Amudaryo tumanida ham davlatimizning ana shunday imkoniyat va imtiyozlaridan foydalanib, samarali faoliyat olib borayotgan, nafaqat biznesini kengaytirib, balki xaridorlarni xursand qilish uchun turli aktsiyalar oʻtkazib, xalqimizning duosini olayotgan tadbirkorlar safi kengayib bormoqda. Shunday tadbirkorlardan biri Baxtiyor Oʻrazimbetov boʻlib, u “Texno oray” brendining asoschisi hisoblanadi. Ushbu brend ostida Mangʻit shahrida “IDEAL” va Choykoʻl ovulida “PREMIER” doʻkonlari mijozlarga sifatli xizmat koʻrsatib kelmoqda.

Mazkur doʻkonlar bir necha oy ilgari xaridorlar uchun “Manfaatli xarid” mega aktsiyasini eʼlon qilgan edi. Aktsiya shartiga koʻra “Texno oray” brendining istalgan doʻkonidan bir yarim million soʻmdan ortiq miqdorda xaridni amalga oshirgan har bir mijoz ushbu mega aktsiyada ishtirok etish imkoniyatiga ega boʻldi. Nafaqat naqd pulga, balki 24 oygacha boʻlib toʻlash yoʻli bilan mahsulot xarid qilgan mijozlar ham aktsiyada ishtirok etishdi.

Doʻkonlardan dunyoga taniqli brendlar va mahalliy ishlab chiqaruvchilardan maishiy texnika, ofis jihozlari, uy-roʻzgʻor buyumlari hamda turli gadjetlarni arzon narxlarda xarid qilgan va aktsiya yakunidagi teleoʻyinda omadi kelgan ishtirokchilar yutuqlardan birining egasi boʻlishi mumkinligi haqidagi reklamalar xaridorlar sonini yanada oshirdi.

2024-yil 28-dekabr kuni ushbu aktsiyaga yakun yasalib, “ATV” telekanalining jonli efirida tasodifiy tanlash yoʻli bilan gʻoliblar aniqlandi. Jamoat tashkilotlari, blogerlar va mahalla faollaridan iborat hakamlar ishtirokida 4ta televizor, 3ta kir yuvish mashinasi, 2ta gaz plitasi va bosh sovrin – “Damas” avtomobilining egalari aniqlandi.

Xolis va odilona oʻtgan oʻyin natijasi koʻra super yutuq – “Damas” avtomobili Beshtom mahallasida yashovchi Bekat Turgʻanbayevga nasib qildi.

2024-yil 29-dekabr kuni ushbu yutuq savdo majmuasi rahbariyati, blogerlar va mahalla faollari, jamoatchilik vakillari ishtirokida gʻolibga tantanali ravishda topshirildi.

Roʻzgʻori uchun kir yuvish mashinasi xarid qilgan va omadi kelib, “Damas” avtomobilini yutib olgan mijozning va oila aʼzolari, qoʻni-qoʻshnilari hamda yaqinlarining quvonchini soʻz bilan taʼriflash qiyin. Yangi yil bayramini kutilmagan katta sovgʻa bilan qarshi olgan oilaga havas qilib, yigʻilganlar ham yaxshi tilaklar tilashdi.

Aytish joizki, mamlakatimizda tadbirkorlik muhitining rivojlanishi va savdo shoxobchalari sonining ortishi bilan sogʻlom raqobat muhiti ham rivojlanmoqda. Savdo sohasida raqobat kuchayishi tovarlar va xizmatlar narxining pasayishiga olib kelmoqda. Narxlarning tushishi nafaqat xaridorlar uchun moliyaviy jihatdan qulaylik yaratmoqda, balki tadbirkorlarni ham oʻz mahsulotlari va xizmatlarini sifat jihatdan yaxshilashga undamoqda.

Bugungi kunda har bir tadbirkor uchun xaridorlarning ishonchi muhim omil boʻlib, u bozorda muvaffaqiyatli faoliyat yuritishning asosiy shartidir. Shu bois, “IDEAL” va “PREMIER” doʻkonlarida mahsulotlarning turli-tumanligi va ularning sifatini yaxshilash, eng muhimi narxlarning hamyonbopligini taʼminlash ustuvor vazifalardan biriga aylangan.

Doʻkonlar maʼmuriyati bundan keyin ham xaridorlarni jalb qilish va ragʻbatlantirish maqsadida innovatsion yondashuvlarni qoʻllashni niyat qilgan. Turli xil chegirmalar, bonuslar va aktsiyalar tashkil etib, mijozlar uchun yanada foydali sharoitlar yaratish, mijozlarni xursand qilish “Texno oray” brendi ostida xizmat koʻrsatayotgan doʻkonlarning bosh shioriga aylangan.